.jpg)
.jpg)
«សង្ក្រាន្តពោធិ៍សាត់ ២០២៥» រៀបចំ៤ថ្ងៃ នៅ៤ទីតាំងផ្សេងគ្នា
- ថ្ងៃពុធ ទី៩ ខែមេសា ឆ្នាំ២០២៥ ម៉ោង ៩:៥៩ នាទី យប់
រូបភាពពីរដ្ឋបាលខេត្តពោធិ៍សាត់។
ព្រឹត្តិការណ៍«សង្ក្រាន្តពោធិ៍សាត់ ២០២៥» នឹងរៀបចំរយៈពេល៤ថ្ងៃ ចាប់ពីថ្ងៃទី១៣-១៦ ខែមេសា នៅទីតាំងចំនួន ៤ រួមមាន នៅលើបុរីវប្បធម៌កោះសំពៅមាស, ទីធ្លាខាងមុខសាលាខេត្ត, ៣សួន១៤មករា និងពហុកីឡាដ្ឋានខេត្ត។ បើតាមរដ្ឋបាលខេត្តពោធិ៍សាត់ ព្រឹត្តិការណ៍នេះ នឹងមានការប្រគំតន្ត្រីប្រពៃណី និងសម័យ ការរាំលេងកម្សាន្ត ការតាំងពិព័រណ៌ និងការលេងល្បែងប្រជាប្រិយគ្រប់ប្រភេទ។
ដើម្បីចូលរួមអបអរសាទរទទួលទេវតាឆ្នាំថ្មី រដ្ឋបាលខេត្តពោធិ៍សាត់ ប្រកាសរៀបចំព្រឹត្តិការណ៍សង្ក្រាន្តពោធិ៍សាត់ ២០២៥ រយៈពេល៤ថ្ងៃ ចាប់ពីថ្ងៃទី១៣-១៦ ខែមេសា។ ប្រជាពលរដ្ឋ និងភ្ញៀវទេសចរ នឹងទទួលបានអារម្មណ៍តាមរយៈកម្មវិធីសប្បាយក្នុងព្រឹត្តិការណ៍។
រដ្ឋបាលខេត្តពោធិ៍សាត់ បញ្ជាក់ថា ក្នុងព្រឹត្តិការណ៍នេះ នឹងមានការប្រគំតន្ត្រីប្រពៃណី និងសម័យ ការរាំលេងកម្សាន្ត ការតាំងពិព័រណ៌បង្ហាញផលិតផល និងសម្ភារ ប្រើប្រាស់ក្នុងស្រុក ការលេងល្បែងប្រជាប្រិយគ្រប់ប្រភេទ។ ក្រៅពីនេះ ក៏មានការចូលរួមពីតារាចម្រៀងល្បីៗប្រចាំប្រទេស គឺលោកស្រី ឱក សុគន្ធកញ្ញា លោក ណុបបាយ៉ារិទ្ធ លោក លឹម តិចម៉េង និងតារាល្បីៗជាច្រើនទៀតផងដែរ។
រដ្ឋបាលខេត្តពោធិ៍សាត់ អំពាវនាវដល់ប្រជាពលរដ្ឋ និងភ្ញៀវទេសចរ ចូលរួមកម្សាន្តសប្បាយរីករាយឱ្យបានច្រើនកុះករ ដើម្បីរួមចំណែកលើកកម្ពស់វប្បធម៌ប្រពៃណីជាតិខ្មែរ កិត្យានុភាពជាតិ ពិសេសសក្តានុពលនៃនៃខេត្តពោធិ៍សាត់។ នេះបើតាមសេចក្ដីជូនដំណឹងរបស់រដ្ឋបាលខេត្តពោធិ៍សាត់៕
© រក្សាសិទ្ធិដោយ thmeythmey.com
Tag:
