.jpg)
.jpg)
សហព័ន្ធកីឡាប្រដាល់គុនខ្មែរ គ្រោងបង្កើតមេធាវី ដើម្បីការពាររាល់ការបំពាន លើអត្ដពលិក
- ថ្ងៃពុធ ទី៩ ខែមេសា ឆ្នាំ២០២៥ ម៉ោង ៥:៥៩ នាទី ល្ងាច
លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ សំណេះសំណាលជាមួយ លោក នួន សុរិយា រូបពី សេង ម៉ូលីនី
លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានលើកឡើងថា សហព័ន្ធ មានផែនការបង្កើតមេធាវី ដើម្បីការពារផលប្រយោជន៍អត្ដពលិកគុនខ្មែរ ដោយនឹងមានចំណាត់ការលើជនណា ដែលបំពាន់លើសលប់លើសិទ្ធិកីឡាករ-កីឡាការិនី។ នេះ បើតាមកិច្ចសន្ទនាមួយ ដែលបានផ្សាយលើហ្វេសប៊ុក Seng Moliny Journalist ដោយប្រធានសហព័ន្ធរូបនេះ បានប្រាប់ទៅលោក នួន សុរិយា អតីតកីឡាករគុនខ្មែរ កាលពីថ្ងៃទី៧ មេសា នៅរដ្ឋ California សហរដ្ឋអាម៉េរិក។
លោក ខូវ ឆាយ ធ្លាប់មានបទពិសោធ ដែលត្រូវបានមនុស្សមួយចំនួន បានរិះគន់យ៉ាងធន់ធ្ងរ ដោយប្រើពាក្យជេរប្រមាថ។ ប៉ុន្ដែប្រធានសហព័ទ្ធរូបនេះ និយាយថារូបលោក អាចទទួលយកបាន ដោយសារតែផ្លូវចិត្តរឹងមាំ។ ដោយឡែក ប្រធានសហព័ន្ធរូបនេះ សំណូមពរឱ្យអ្នករិះគន់ទាំងនោះ ប្រើការបញ្ចេញមតិ ក្នុងន័យស្ថាបនា ជាជាងការជេរប្រមាថទៅលើកីឡាករ ម្ដាយឪពុក ឬក៏ប្រមាថដល់ជីវិតកីឡាករ។
ប្រធានសហព័ន្ធកីឡាប្រដាល់គុនខ្មែររូបនេះ ចាត់ទុកថា ការជេរប្រមាថទាំងនោះ អាចនឹងធ្វើឱ្យបាត់បង់ធនធានអត្ដពលិកជាតិ ព្រោះកីឡាករ-កីឡាការិនីមួយចំនួន មានអារម្មណ៍ ផ្លូវចិត្តមិនរឹងមាំ ដែលជាហេតុធ្វើឱ្យពួកគេខ្លាច និងបាក់ទឹកចិត្ត ហើយឈានដល់ការបោះបង់អាជីព។
«អ្នកជេរខ្ញុំ ខ្ញុំមិនតបតទេ ប៉ុន្ដែកីឡាករខ្លះ ពួកគាត់មានផ្លូវចិត្តមិនរឹងមាំ។ ដូច្នេះ ពួកគាត់ អាចបោះបង់ចោលអាជីពនេះ ហើយពួកគាត់អាចទៅជាអន់ចិត្ត ខូចចិត្ត លែងហាត់ ហើយធ្វើឱ្យយើងបាត់បង់ធនធានកីឡាករ។»។ លោក ខូវ ឆាយ លើកឡើងដូច្នេះ។
លោក ខូវ ឆាយ លើកទឹកចិត្តឱ្យអ្នកគាំទ្រប្រដាល់គុនខ្មែរ លុបបំបាត់ការជេរប្រមាថជីវិត ទៅលើកីឡាករ និងក្រុមគ្រួសារកីឡាករ។ ដោយឡែក តាមការបញ្ជាក់របស់លោក ខូវ ឆាយ ជាមួយលោក នួន សុរិយា សហព័ន្ធកីឡាប្រដាល់គុនខ្មែរ មានគម្រោងនឹងបង្កើតមេធាវីសម្រាប់ស្ថាប័នខ្លួន ដើម្បីការពារដល់កីឡាករ-កីឡាការិនី។
លោក ខូវ ឆាយ បាននិយាយថា៖«យើង ត្រូវតែលុបបំបាត់បញ្ហាជេរនេះ។ យើង ចូលរួមរិះគន់ដើម្បីស្ថាបនា។ ប៉ុន្ដែ បើចូលមកជេរម្ដាយគេ ជេរឪពុកគេ ឬប្រមាថដល់ជីវិតរបស់គេ តើវាមានអ្វីដែលបានជួយស្ថាបនា? សហព័ន្ធ មានផែនការ នឹងបង្កើតមេធាវីប្រចាំសហព័ន្ធ។ ប្រសិនជាជនណាដែលធ្វើលើសលប់ពេក គឺយើងដាក់ពាក្យប្ដឹងតែម្ដង។»៕
© រក្សាសិទ្ធិដោយ thmeythmey.com
Tag:
