លោក ហែល គីរី អគ្គលេខាធិការសហព័ន្ធខ្មែរកីឡាហែលទឹក លើកឡើងថា កីឡាករ-កីឡា ការិនី នឹងមិនខ្លាំងឡើយ ប្រសិនជាគ្រាន់តែមានឆន្ទៈចង់ឈ្នះ អំឡុងពេលប្រកួត តែ​ពេល​ហ្វឹកហាត់ គឺគ្រាន់តែ​បំពេញកិច្ច ព្រមទាំងគ្មានសីលធម៌ និងគ្មានវិន័យត្រឹមត្រូវ។

សហព័ន្ធខ្មែរកីឡាហែលទឹក មានភារកិច្ចច្រើន ​ក្នុងការចូលរួមប្រកួតព្រឹត្តិការណ៍​អន្ដរ​ជាតិ​នានា ក្នុងឆ្នាំ២០២៥។ ព្រឹត្តិការណ៍អន្ដរជាតិទាំងនោះ មានដូចជា៖ ការប្រកួត​ហែល​ទឹក​ជើងឯកពិភពលោក នៅអំឡុងខែកក្កដា ក្នុងប្រទេសសិង្ហបុរី, ព្រឹត្តិការណ៍កីឡាយុវជន​អាស៊ី លើកទី៣ នៅប្រទេសបារ៉ែន, ព្រឹត្តិការណ៍ស៊ីហ្គេម លើកទី៣៣ នៅប្រទេសថៃ និង​ព្រឹត្តិការណ៍ហែលទឹកជើងទាជើងឯកអាស៊ីអាគ្នេយ៍ នៅប្រទេសឥណ្ឌូណេស៊ី នាអំឡុង​ខែធ្នូ។

ដោយឡែកកាលពីថ្ងៃទី៩ សហព័ន្ធខ្មែរកីឡាហែលទឹក មានកិច្ចប្រជុំមួយ​ស្ដីពីការត្រៀម​ប្រមូលផ្ដុំអត្ដពលិក ឆ្នាំ២០២៥។ តាមការបញ្ជាក់ពីលោក ហែម គីរី សហព័ន្ធ បានផ្ដោតលើ​ការពង្រឹងសីលធម៌ វិន័យទៅដល់អត្ដពលិក ទន្ទឹមជាមួយការបង្វឹកនូវបច្ចេកទេសនានា។ 

 សហព័ន្ធខ្មែរកីឡាហែលទឹក មានលក្ខណៈវិនិច្ឆ័យ ៣យ៉ាង ក្នុងការប្រមូលផ្ដុំកីឡាករ-កីឡា​ការិនី​ជម្រើសជាតិ ដូចជា៖ ជ្រើសរើសអត្ដពលិក ដែលមានវិន័យខ្ពស់, ជ្រើសរើសអត្ដ​ពលិក ដែលប្រឹងប្រែងហ្វឹកហាត់ និងជ្រើសរើសអត្ដពលិក ដែលបានចម្រាញ់ចេញ​ពីការ​ប្រកួតជ្រើសរើសជើងឯកថ្នាក់ជាតិ។

អគ្គលេខាធិការរូបនេះ សង្កត់ធ្ងន់ថា សហព័ន្ធ ពង្រឹង និងណែនាំខ្លាំង​អំពីក្រមសីលធម៌​ក្នុង​នាម​ជាអត្ដពលិកជម្រើសជាតិ។ តាមការពន្យល់ពីលោក ហែម គីរី ក្នុងនាមជា​អត្ដពលិក​ជម្រើសជាតិ អ្នកទាំងនោះ ត្រូវមានភាពច្បាស់លាស់អំពីការគោរពបទបញ្ជាផ្ទៃ​ក្នុងរបស់​សហព័ន្ធ និងត្រូវមានសីលធម៌ខ្ពស់ ព្រមទាំងវិន័យក្នុងការហ្វឹកហាត់។

លោក ហែម គីរី និយាយថា ៖«ក្រមសីលធម៌របស់អ្នកកីឡា គឺត្រូវតែមានភាពច្បាស់លាស់​អំ​ពី​ការគោរពនូវ បទបញ្ជាផ្ទៃក្នុងក្រុមកីឡាករ-កីឡាការិនីជម្រើសជាតិ ជាពិសេសបទបញ្ជា​របស់សហព័ន្ធ ដែលបានដាក់ចេញឲ្យពួកគាត់គោរព ហើយសំខាន់បំផុត ត្រូវតែឲ្យពួកគាត់​គោរព​ឲ្យបានខ្ជាប់ខ្ជួននូវវិន័យក្នុងពេលហ្វឹកហាត់។ យើង មិនអនុញ្ញាតឲ្យពួកគាត់ ធ្វើនូវ​អាកប្បកិរិយាណាមួយ ដែលមិនអាចទទួលយកបានជាពិសេស គឺត្រូវឲ្យពួកគាត់គោរពនូវ អ្វីជារបៀបនៃការបដិសណ្ឋារកិច្ច ដែលជារបៀបរបស់ខ្មែរ ដូចជាមានការសំពះ និងរឿង​សីលធម៌​តូចៗ។ យើងត្រូវឲ្យគាត់ផ្ចិតផ្ចង់នូវរឿងទាំងអស់នេះដែរ។ នេះ គឺរាប់បញ្ចូល​ទាំងការនិយាយស្ដី ចេះគោរពចាស់ទុំ ទាំងអស់នេះ គឺធ្វើឲ្យពួកគាត់ មានអត្ដចរិកល្អ។»។

អគ្គលេខាធិការរូបនេះ បន្ដទៀតថា កីឡាករ-កីឡាការិនី នឹងមិនងាយសម្រេចបាន​លទ្ធផល​ល្អទេ ប្រសិនជាពួកគេ មានឆន្ទៈចង់ឈ្នះ ត្រឹមតែក្នុងពេលប្រកួត។ ដើម្បីឲ្យបានលទ្ធផល​ល្អ អត្ដពលិកទាំងនោះ ត្រូវមានឆន្ទៈចង់ឈ្នះ គឺចាប់តាំងពីពេលចូលហ្វឹកហាត់ រហូត​មក​ដល់ពេលប្រកួត។ អត្ដពលិកតំណាងជាតិ ត្រូវមានគោលដៅច្បាស់លាស់។ នេះ បើ​តាម​ការលើកឡើង របស់លោក ហែម គីរី។

«អ្វី ដែលខ្ញុំសង្កត់ធ្ងន់ក្នុងការពង្រឹងស្មារតី ហ្វឹកហាត់របស់ក្មេងៗកីឡាករ គឺឆន្ទៈនៃការចង់​ឈ្នះ។ កន្លងទៅ កីឡាករ-កីឡាការិនីខ្មែរយើងមួយចំនួន តែងគិតថាពេលប្រកួត ជាការងារ​សំខាន់ត្រូវតែប្រឹងឲ្យឈ្នះគេ ប៉ុន្ដែគាត់បានភ្លេចគិតអំពីបញ្ហាមួយ គឺអ្វីដែលសំខាន់ គាត់ត្រូវ​តែ​មានឆន្ទៈចង់ឈ្នះនៅពេល ដែលហ្វឹកហាត់ មុនទៅដល់ពេលប្រកួត។ ប្រសិនជាគាត់ ហ្វឹកហាត់គ្មានឆន្ទៈចង់ឈ្នះទេ ហាត់ឲ្យតែបាន ហាត់ឲ្យតែមាន ហើយគោលដៅអត់ច្បាស់​លាស់ ក៏គាត់មិនអាចជោគជ័យក្នុងពេលប្រកួតបានដែរ។»។ លោក ហែម គីរី បាននិយាយដូច្នេះ៕