.jpg)
.jpg)
ប្រធានាធិបតីបារាំង គ្រោងប្រកាសទទួលស្គាល់រដ្ឋប៉ាឡេស្ទីន
- ថ្ងៃសៅរ៍ ទី១២ ខែមេសា ឆ្នាំ២០២៥ ម៉ោង ៨:៣៩ នាទី ព្រឹក
ប្រធានាធិបតីបារាំង អេម៉ានុយអែល ម៉ាក្រុង ស្វាគមប្រមុខដឹកនាំប៉ាឡេស្ទីន ម៉ះមូដ អាបាស់ នៅឆ្នាំ២០២០។ AP - Majdi Mohammed
ក្នុងសំណុំរឿងសង្គ្រាមហ្កាហ្សា ប្រធានាធិបតីបារាំង លោក អេម៉ានុយអែល ម៉ាក្រុង បានប្រកាសគាំទ្រដំណោះស្រាយរដ្ឋពីររស់នៅក្បែរគ្នា គឺប៉ាឡេស្ទីន និងអ៊ីស្រាអែល ដោយបញ្ជាក់ថា ប្រទេសបារាំង គ្រោងនឹងទទួលស្គាល់រដ្ឋប៉ាឡេស្ទីនជាផ្លូវការ នៅខែមិថុនាខាងមុខ។ ទន្ទឹមនឹងគ្នានេះ លោកប្រមុខរដ្ឋបារាំង ម៉ាក្រុង ក៏សន្យាជំរុញឲ្យប្រទេសដែលមិនទាន់ទទួលស្គាល់រដ្ឋអ៊ីស្រាអែល ឲ្យព្រមទទួលស្គាល់ដែរ។
ការទទួលស្គាល់រដ្ឋប៉ាឡេស្ទីន និងរដ្ឋអ៊ីស្រាអែល ជាសំណុំរឿងដ៏ចម្រូងចម្រាសនៅលើឆាកអន្តរជាតិ។ ទីបំផុតទៅ លោក ប្រធានាធិបតីបារាំង អេម៉ានុយអែល ម៉ាក្រុង បានចេញមុខបញ្ជាក់ថា ប្រទេសបារាំងអាចនឹងទទួលស្គាល់រដ្ឋប៉ាឡេស្ទីន នៅខែមិថុនា ឆ្នាំ២០២៥ ពោលគឺក្នុងឱកាសដែលបារាំងនិងអារ៉ាប៊ីសាអូឌីត ធ្វើជាសហប្រធានដឹកនាំសន្និសីទអង្គការសហប្រជាជាតិ ក្នុងបុរីញូវយ៉ក សហរដ្ឋអាមេរិក។ ការប្រកាសដូច្នេះបានធ្វើឡើងក្នុងបទសម្ភាសរបស់ទូរទស្សន៍បារាំងប៉ុស្តិ៍លេខ ៥ ក្នុងកម្មវិធី C’est à vous កាលពីថ្ងៃពុធ ទី៩មេសា។
ខុសស្រឡះពីនាយករដ្ឋមន្ត្រីអ៊ីស្រាអែល បេនចាមិន នេតាន់យ៉ាហ៊ូ ដែលធ្លាប់តែបដិសេធដំណោះស្រាយរដ្ឋពីរ លោកប្រមុខរដ្ឋបារាំង ម៉ាក្រុង បានពន្យល់ថា កិច្ចសហការរវាងបារាំងនិងអារ៉ាប៊ីសាអូឌីត នឹងជំរុញឲ្យទទួលយកដំណោះស្រាយរដ្ឋពីររស់នៅក្បែរគ្នា និងបំផុសស្មារតីរួបរួមសាមគ្គី។ វត្ថុបំណងគឺជំរុញឲ្យទទួលស្គាល់គ្នាទៅវិញទៅមក។ ពោលគឺលើកទឹកចិត្តឲ្យក្រុមប្រទេស ដែលគាំទ្ររដ្ឋប៉ាឡេស្ទីន ពិសេសរដ្ឋសមាជិកសម្ព័ន្ធអារ៉ាប់ ក៏ឲ្យគេទទួលស្គាល់រដ្ឋអ៊ីស្រាអែល ដ្បិតថា រហូតមកទល់ពេលនេះ មានប្រទេសជាច្រើន នៅមិនទាន់ទទួលស្គាល់អ៊ីស្រាអែល នោះទេ។
គួរជ្រាបថា ប្រទេសកាន់សាសនាអ៊ីស្លាម តួយ៉ាង អេមីរ៉ាត់អារ៉ាបរួម បារ៉ែន ស៊ូដង់ និងម៉ារ៉ុក ទើបតែប្រកាសទទួលស្គាល់រដ្ឋអ៊ីស្រាអែល នៅឆ្នាំ២០២០តែប៉ុណ្ណោះ។ អារ៉ាប៊ីសាអូឌីត បានត្រៀមផ្តើមនីតិវិធីចរចាទទួលស្គាល់អ៊ីស្រាអែលដែរ ប៉ុន្តែត្រូវខកខានព្រោះតែភ្លើងសង្គ្រាមនៅហ្កាហ្សា។
សព្វថ្ងៃនេះ ប្រទេសជិត១៥០ដែលបានទទួលស្គាល់រដ្ឋប៉ាឡេស្ទីន។ ជាច្រើនខែក្រោយផ្ទុះសង្គ្រាមសន្ធោសន្ធៅនៅហ្កាហ្សា ប្រទេសអៀរឡង់ ន័រវែស អេស្ប៉ាញ និងស្លូវេនី បានប្រកាសទទួលស្គាល់ រដ្ឋប៉ាឡេស្ទីន ព្រមៗគ្នា ក្នុងឆ្នាំ២០២៤។ គ្រានេះ អាជ្ញាធរប៉ាឡេស្ទីនទទួលបន្ទុកកិច្ចការបរទេស Varsen Aghabekian Shahin ប្រកាសត្រេកអរថា គម្រោងទទួលស្គាល់អត្ថិភាពរដ្ឋប៉ាឡេស្ទីនពីសំណាក់ប្រធានាធិបតីបារាំង ជាជំហានមួយល្អនៅលើគន្លងផ្លូវដ៏ប្រសើរ។
ផ្ទុយទៅវិញ ថ្នាក់ដឹកនាំអ៊ីស្រាអែលនៅតែប្រតិកម្មជំទាស់នឹងដំណោះស្រាយរដ្ឋពីរ។ គម្រោងការទទួលស្គាល់រដ្ឋប៉ាឡេស្ទីនជាការផ្តល់រង្វាន់ដល់ក្រុមភេរវជន។ នេះបើតាមប្រមុខការទូតអ៊ីស្រាអែល លោក Gideon Saar ដោយបញ្ជាក់ទៀតថា ទង្វើនេះនឹងមិននាំឲ្យមានសន្តិភាព និងស្ថិរភាពក្នុងតំបន់នោះឡើយ តែវាកាន់តែធ្វើឲ្យពួកភេរវជនហាម៉ាស ឡើងចាងបានចិត្ត និងច្រានសន្តិភាពឲ្យចេញឆ្ងាយ៕
ដោយ៖ហេង ឧត្តម (RFI ខេមរភាសា)
© រក្សាសិទ្ធិដោយ thmeythmey.com
