.jpg)
.jpg)
AFP៖ ប៉ាណាម៉ា អនុញ្ញាតឱ្យអាម៉េរិកពង្រាយទ័ពនៅព្រែកជីករបស់ខ្លួន
- ថ្ងៃសុក្រ ទី១១ ខែមេសា ឆ្នាំ២០២៥ ម៉ោង ៧:២៩ នាទី ល្ងាច
រូបភាព Xinhua
អាម៉េរិក នឹងអាចបញ្ជូនទ័ពទៅមូលដ្ឋានយោធានៅព្រែកជីកប៉ាណាម៉ា ក្រោមកិច្ចព្រមព្រៀងរួមគ្នាមួយ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ ក្រោមកិច្ចព្រមព្រៀងនេះ អាម៉េរិកអាចបញ្ជូនទ័ពទៅព្រែកជីកប៉ាណាម៉ា ដោយចំនួនមិនជាក់លាក់។
ប្រមុខការពារជាតិអាម៉េរិក លោក Pete Hegseth នៅថ្ងៃទី៩ ខែមេសា បានបំពេញទស្សនកិច្ចនៅប៉ាណាម៉ា ក្រោយពេលលោកប្រធានាធិបតី ដូណាល់ ត្រាំ ចោទចិន កំពុងពង្រីកឥទ្ធិពលលើព្រែកជីក ដែលសាងសង់ដោយអាម៉េរិក។
ក្នុងអំឡុងទស្សនកិច្ចនេះ រដ្ឋមន្រ្តីការពារជាតិអាម៉េរិក និងរដ្ឋមន្រ្តីសន្តិសុខសាធារណៈប៉ាណាម៉ា លោក Frank Abrego បានចុះហត្ថលេខាលើអនុស្សរណៈនៃការយោគយល់គ្នាមួយ ហើយត្រូវបានឃើញដោយទីភ្នាក់ងារព័ត៌មាន AFP នៅថ្ងៃទី១០ ខែមេសា។
តាមកិច្ចព្រមព្រៀងនោះ អាម៉េរិក អាចបញ្ជូនទ័ពទៅមូលដ្ឋានយោធានៅព្រែកជីកប៉ាណាម៉ា និងក្នុងចំនួនមិនជាក់លាក់។ អាម៉េរិកអាចបញ្ជូនទ័ពទៅគ្រប់មូលដ្ឋានគ្រប់គ្រងដោយប៉ាណាម៉ាទាំងអស់ ក្រោមលក្ខខណ្ឌហ្វឹកហ្វឺន សមយុទ្ធ និងសកម្មភាពផ្សេងទៀត។
យ៉ាងណាមិញ ក្នុងអនុស្សរណៈនោះមិនបានបញ្ជាក់ពីការកសាងមូលដ្ឋានយោធាអាម៉េរិក នៅព្រែកជីកប៉ាណាម៉ានោះទេ។ ក្នុងដំណើរទស្សនកិច្ចនេះ ប្រមុខការពារជាតិអាម៉េរិក បានលើកឡើងពីលទ្ធភាពក្នុងការបញ្ជូនទ័ពទៅគ្រប់គ្រងព្រែកជីកប៉ាណាម៉ាវិញ។
ជុំវិញបញ្ហានេះ លោក Jose Raul Mulino ប្រធានាធិបតីប៉ាណាម៉ា បានជំទាស់ ដោយចោទរដ្ឋមន្រ្តីការពារជាតិអាម៉េរិក ចង់ដុតប្រទេសរបស់លោក និងបង្កភាពវឹកវរនៅប៉ាណាម៉ា។ បើតាមលោក Mulino វត្តមានមូលដ្ឋានទ័ពអាម៉េរិក នៅប៉ាណាម៉ា ជារឿងមិនអាចទទួលយកបាន។
សូមបញ្ជាក់ថា ព្រែកជីកប៉ាណាម៉ា ជាផ្លូវដឹកជញ្ជូនដ៏សំខាន់មួយដែលជួយសន្សំពេលវេលាធ្វើដំណើរវាងមហាសមុទ្រប៉ាស៊ីហ្វិក និងអាត្លង់ទិក។ ព្រែកជីកនេះ ត្រូវបានសាងសង់ដោយអាមេរិកក្នុងឆ្នាំ១៩១៤ ហើយប្រគល់ឱ្យប៉ាណាម៉ាគ្រប់គ្រងក្រោមកិច្ចព្រមព្រៀងឆ្នាំ១៩៧៧ ហើយប៉ាណាម៉ាបានគ្រប់គ្រងទាំងស្រុងនៅឆ្នាំ១៩៩៩៕
© រក្សាសិទ្ធិដោយ thmeythmey.com
Tag:
