.jpg)
.jpg)
ថៃ ពិចារណាកាត់បន្ថយពន្ធគយលើពោតនាំចូលពីអាម៉េរិក
- ថ្ងៃសៅរ៍ ទី១២ ខែមេសា ឆ្នាំ២០២៥ ម៉ោង ២:៣៩ នាទី រសៀល
រូបភាព Reuters
ថៃ នឹងកាត់បន្ថយពន្ធគយលើផលិតផលពោតនាំចូលពីអាម៉េរិក ដើម្បីជាផ្នែកមួយនៃការចរចាពន្ធគយ។ លោក Pichai Chunhavajira រដ្ឋមន្រ្តីហិរញ្ញវត្ថុថៃ បានបញ្ជាក់បែបនេះ នៅថ្ងៃទី១១ ខែមេសា។ ថៃ ត្រូវការនាំចូលពោតជាច្រើន ដើម្បីផលិតចំណីសត្វ។
ដូចបណ្តាប្រទេសផ្សេងទៀត ថៃ បានរងពន្ធគយបដិការ ៣៦ភាគរយ ប៉ុន្តែត្រូវបានរដ្ឋាភិបាលអាម៉េរិកបញ្ចុះដល់ ១០ភាគរយ សម្រាប់ការផ្អាកពន្ធរយៈពេល ៩០ថ្ងៃ ដើម្បីចរចា។ ក្នុងរយៈពេលនេះ ថៃកំពុងពិចារណាលើការកាត់បន្ថយពន្ធលើទំនិញជាច្រើន ហើយប្តេជ្ញានាំចូលផលិតផលអាម៉េរិកបន្ថែម ដើម្បីបង្ការការដាក់ពន្ធគយពីសំណាក់ប្រធានាធិបតីអាម៉េរិក លោក ដូណាល់ ត្រាំ។
«តម្លៃពោតរបស់អាម៉េរិក គឺទាប ដែលធ្វើឱ្យតម្លៃចំណីសត្វរបស់ថៃទាប»។ លោក Pichai Chunhavajira រដ្ឋមន្រ្តីហិរញ្ញវត្ថុថៃ បានបញ្ជាក់បែបនេះ នៅថ្ងៃទី១១ ខែមេសា ដោយបន្ថែមថា ថៃត្រូវការពោតប្រចាំឆ្នាំរហូតដល់ ៩លានមេទ្រីកតោន ដោយ ៤ទៅ៥លានមេទ្រីកតោន នាំចូល។ ក្នុងពេលបច្ចុប្បន្ន ថៃដាក់ពន្ធលើពោតនាំចូលពីអាម៉េរិកចំនួន ៧៣ភាគរយ។
យ៉ាងណាមិញ ថៃនៅពិចារណាលើទំហំនៃផលប៉ះពាល់លើការនាំចូលពោត ហើយថៃអាចកាត់បន្ថយពន្ធផលិតផលកសិកម្មពីអាម៉េរិកដល់សូន្យភាគរយ និងនាំចូលហ្គាសធម្មជាតិបន្ថែម។ លើសពីនេះ ក្រុមហ៊ុន Thai Airways នឹងទិញយន្តហោះពីអាម៉េរិកបន្ថែម។
សូមបញ្ជាក់ថា អាម៉េរិកជាទីផ្សារដ៏ធំមួយរបស់ថៃ ដោយមានទំហំរហូតដល់ ៥៤,៩៦ពាន់លានដុល្លារ។ ទន្ទឹមនេះ ទំហំអតុល្យភាពរវាងថៃ និងអាម៉េរិក មានដល់៤៥,៦ពាន់លានដុល្លារ៕
© រក្សាសិទ្ធិដោយ thmeythmey.com
Tag:
