.jpg)
.jpg)
អង្គរសង្ក្រាន្ត ជាឱកាសទាក់ទាញទេសចរជាតិ និងអន្តរជាតិក្នុងរដូវកាលបៃតង
- ថ្ងៃសៅរ៍ ទី១២ ខែមេសា ឆ្នាំ២០២៥ ម៉ោង ៦:៥៩ នាទី ល្ងាច
«រដូវកាលបៃតង» (Green Season) ជាយុទ្ធនាការដែលក្រសួងទេសចរណ៍ប្រើដើម្បីដាក់ជំនួសឱ្យពាក្យ «រដូវកាលភ្ញៀវតិច» (Low Season) ហើយក៏ទទួលបានការគាំទ្រយ៉ាងពេញទំហឹងពីសម្តេច ហ៊ុន ម៉ាណែត ផងដែរ។ ប្រមុខរដ្ឋាភិបាល បានជំរុញសកម្មភាពទេសចរណ៍ក្នុងរដូវកាលបៃតងពីខែមេសា ដល់ខែតុលា ហើយការបង្កើតព្រឹត្តិការណ៍អង្គរសង្ក្រាន្ត និងសង្ក្រាន្តតាមបណ្តារាជធានី-ខេត្ត ជាផ្នែកមួយដ៏សំខាន់ក្នុងការទាក់ទាញទេសចរណ៍។
ពី High-Low ទៅ High-Green
ក្នុងពិធីចែកសញ្ញាបត្រមួយកាលពីខែមីនា សម្តេច ហ៊ុន ម៉ាណែត បានប្រតិកម្មចំពោះមតិរិះគន់មួយចំនួនដែលលើកឡើងថា ការរៀបចំអង្គរសង្ក្រាន្តជាការចំណាយលុយឥតប្រយោជន៍។ ត្រង់ន័យនេះ សម្តេចមានទស្សនៈផ្អែកទៅភាពជាក់ស្តែង ពោលគឺព្រឹត្តិការណ៍ដែលរៀបចំដោយសហភាពសហព័ន្ធយុវជនកម្ពុជា (ស.ស.យ.ក.) ជាការរួមចំណែកលើកកម្ពស់វិស័យទេសចរណ៍ ជាពិសេសជីវភាពរស់នៅរបស់អ្នកសៀមរាប។ «ខែ High ខែ Low ឥឡូវឯកឧត្តម ហួត ហាក់ ថា ខែ Green »។ សម្តេចបានឯកភាពចំពោះការកំណត់បែបនេះ របស់រដ្ឋមន្ត្រីទេសចរណ៍ ប៉ុន្តែសម្តេចណែនាំឱ្យធានាកុំឱ្យមានគម្លាតខុសគ្នាឆ្ងាយ។
នាពិធីបុណ្យទន្លេលើកទី៩នៅខេត្តតាកែវ សម្តេច ហ៊ុន ម៉ាណែត បានលើកឡើងថា៖ «ក្នុង low season ឬ green season នេះ ធ្វើម៉េចដើម្បីទាញភ្ញៀវបាន។ អ៊ីចឹងឆ្នាំនេះ យើងបង្កើតព្រឹត្តិការណ៍អង្គរ (សង្ក្រាន)ហ្នឹងដើម្បីទាញឲ្យបានច្រើន។ ភ្ញៀវមកកាន់តែច្រើន គេស្គាល់យើងកាន់តែច្រើន បានផលប្រជាជនច្រើន»។
ជាទូទៅឱកាសបុណ្យចូលឆ្នាំ ខ្សត់ភ្ញៀវអន្តរជាតិ
ពលរដ្ឋខ្មែរមួយចំនួនបានយកឱកាសនៃពេលឈប់សម្រាកថ្ងៃបុណ្យចូលឆ្នាំថ្មី សម្រាប់ដំណើរកម្សាន្តនៅក្រៅប្រទេស ខណៈលំហូរភ្ញៀវអន្តរជាតិចូលមកកម្ពុជាវិញ នៅមានកម្រិត។ បើតាមលោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល ចូលដល់ខែមេសា ជាទូទៅ គឺដល់រដូវកាលខ្សត់ភ្ញៀវអន្តរជាតិ។
លោកបានគូសបញ្ជាក់ថា អ្នកដែលហោះចូលមកកម្ពុជា នាឱកាសប្រារព្ធពិធីបុណ្យចូលឆ្នាំខ្មែរនេះ ភាគច្រើនលើសលុប ជាសាច់ញាតិអ្នកនៅក្នុងស្រុកតែម្តង។ ផ្ទុយពីចំនួនភ្ញៀវបរទេសចូលកម្ពុជា នាឱកាសបុណ្យចូលឆ្នាំថ្មីនេះ បែរជាមានពលរដ្ឋជាច្រើនចេញទៅលេងដើរកម្សាន្តនៅឯក្រៅប្រទេស។
លោក ស៊ីន ចាន់សេរីវត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល។ រូបថត៖ អង្គភាពអ្នកនាំពាក្យរដ្ឋាភិបាល
បើតាមលោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា ប្រទេសដែលជាគោលទេសចរណ៍របស់ពលរដ្ឋខ្មែរនាឱកាសបុណ្យចូលឆ្នាំខ្មែរនេះ រួមមាន ប្រទេសនៅតំបន់អឺរ៉ុប (បារាំង អ៊ីតាលី អាល្លឺម៉ង់) សហរដ្ឋអាម៉េរិក ឌូបៃ (អេមីរ៉ាតអារ៉ាប់រួម) អូស្រា្តលី ចិន ជប៉ុន កូរ៉េខាងត្បូង តៃវ៉ាន់ រួមទាំងបណ្តាប្រទេសមួយចំនួនក្នុងតំបន់ ជាពិសេសវៀតណាម និងសិង្ហបុរី-ម៉ាឡេស៊ី។
តែយ៉ាងណាមិញ លោកស្រី ឆាយ ស៊ីវលីន បានបញ្ជាក់ថា ចំនួនភ្ញៀវទេសចរខ្មែរប្រមាណ៦ម៉ឺននាក់ ដែលចេញទៅដើរលេងកម្សាន្តនៅបរទេសនាឱកាសបុណ្យចូលឆ្នាំខ្មែរនេះ គឺមានការធ្លាក់ចុះបន្តិចបើធៀបនឹងឆ្នាំ២០២៤។ ការណ៍នេះ ក៏ព្រោះតែនៅក្នុងប្រទេសមានការរៀបចំនូវព្រឹត្តិការណ៍សង្ក្រាន្ត ស្ទើតែគ្រប់រាជធានី-ខេត្ត ជាពិសេសព្រឹត្តិការណ៍អង្គរសង្ក្រាន្ត នៅខេត្តសៀមរាប ដើម្បីអបអរសាទរនូវបុណ្យចូលឆ្នាំថ្មីប្រពៃណីជាតិ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា
កញ្ចប់ទេសចរណ៍ក្រៅបរទេស គឺអាស្រ័យទៅតាមប្រទេស និងតំបន់ ដែលពលរដ្ឋខ្មែរទៅដើរលេងកម្សាន្ត។ ប្រធានសមាគមទីភ្នាក់ងារទេសចរណ៍កម្ពុជា បានបញ្ជាក់ប្រាប់សារព័ត៌មានឌីជីថលថ្មីៗថា៖ « ការចំណាយរបស់ភ្ញៀវយើងទៅក្រៅប្រទេសឆ្នាំនេះ គឺមានភាពប្រយ័ត្នខ្លាំង។ មានន័យថា ទីកន្លែងដែលពួកគាត់ជ្រើសរើសដើរកម្សាន្តនោះ ក៏មានតម្លៃទាបជាងឆ្នាំមុនៗ ដោយពួកគាត់ទៅលេងដើរនៅកន្លែងមានកញ្ចប់ទេសចរទាប ដូចជា នៅចិន និងវៀតណាម ជាដើម»។
ព្រឹត្តិការណ៍សង្ក្រាន្តបង្កើនចរន្តទេសចរផ្ទៃក្នុង
ពិតណាស់ ពិធីបុណ្យចូលឆ្នាំពីថ្ងៃទី១៤ ដល់ថ្ងៃទី១៦ ខែមេសា គឺចំរដូវកាលខ្សត់ភ្ញៀវ (Low Season) ប៉ុន្តែតាមរយៈផែនការសកម្មភាពពិពិធកម្មកម្មវិធីឱ្យមានភាពសម្បូរបែប ព្រឹត្តិការណ៍សង្ក្រាន្តតាមបណ្តារាជធានី-ខេត្ត ជាពិសេសអង្គរសង្ក្រាន្ត ជាចំណែកដ៏សំខាន់ក្នុងការពង្រីកផលិតផលទេសចរណ៍ក្នុងខែបៃតង។
លោក ឌុច សារ៉េត អនុប្រធានសមាគមទេសចរណ៍កម្ពុជា បានបញ្ជាក់ថា នាអំឡុងប្រារព្ធព្រឹត្តិការណ៍អង្គរសង្ក្រាន្ត សណ្ឋាគារ និងផ្ទះសំណាក់ ទទួលបានការកក់បន្ទប់ស្នាក់នៅស្ទើរតែពេញគ្រប់ទីកន្លែង។ ទិន្នន័យនេះ បង្ហាញឱ្យឃើញថា បពលរដ្ឋដែលជាភ្ញៀវទេសចរក្នុងស្រុក ចាប់អារម្មណ៍ខ្លាំងទៅលើព្រឹត្តិការណ៍អង្គរសង្ក្រាន្តនេះ។
«ចំនួនកក់សណ្ឋាគារ និងផ្ទះសំណាក់ដែលយើងទទួលបាន គឺមានការកើនឡើងច្រើន បើធៀបនឹងឆ្នាំមុនៗ។ ការកក់នោះ គឺមាននៅគ្រប់បណ្តាសណ្ឋាគារ អាចសណ្ឋាគារផ្កាយ៣ ផ្កាយ៤...ជាដើម។ ហើយក៏មានការកក់សណ្ឋាគារលំដាប់ខ្ពស់មួយចំនួនដែរ»។ នេះជាការអះអាងរបស់លោក ឌុច សារ៉េត។
លោក ឌុច សារ៉េត អនុប្រធានសមាគមទេសចរណ៍កម្ពុជា។ រូបថត៖ Duch Sareth
តាមរយៈការកក់បន្ទប់ស្នាក់នៅនេះ បង្ហាញឱ្យឃើញថា ទេសចរក្នុងស្រុកផ្តោតអារម្មណ៍មកលេងកម្សាន្តខេត្តសៀមរាបច្រើន ។ ការណ៍នេះហើយធ្វើឱ្យលោក ឌុច សារ៉េត មានសុទិដ្ឋិនិយមខ្ពស់ចំពោះកំណើនភ្ញៀវទេសចរផ្ទៃ ដែលមកលេងកម្សាន្តក្នុងព្រឹត្តិការណ៍អង្គរសង្រ្កាន្ត។
«ចំនួនភ្ញៀវទេសចរមកលេងអង្គរសង្ក្រាន្តសម្រាប់ឆ្នាំនេះ! ពិតប្រាកដណាស់ នឹងមានចំនួនកាន់តែច្រើន។ នេះជារឿងដែលយើងគិតថា មិនខុសទេ ហើយវាពិតជាកើនឡើងច្រើនជាងរាល់ឆ្នាំ»។ លោកអនុប្រធានសមាគមទេសចរណ៍កម្ពុជាបានអះអាងបែបនេះ ដោយមើលឃើញថា ព្រឹត្តិការណ៍អង្គរសង្រ្កាន្ត នឹងបង្កើនសន្ទុះកំណើនសេដ្ឋកិច្ចមូលដ្ឋាន។
លោកស្រី ឆាយ ស៊ីវលីន ក៏មើលឃើញដូចគ្នាពីកំណើនភ្ញៀវទេសចរក្នុងស្រុកក្នុងព្រឹត្តិការណ៍អង្គរសង្រា្កន្តនេះផងដែរ។ តែយ៉ាងណាមិញ លោកស្រី ក៏បានបង្ហាញការស្តោកស្តាយផងដែរ ចំពោះព្រឹត្តិការណ៍នេះ ដែលមិនអាចទាក់ទាញភ្ញៀវទេសចរអន្តរជាតិឱ្យបានច្រើនកុះករមកកាន់កម្ពុជា។
«ភ្ញៀវទេសចរអន្តរជាតិ! នៅពេលយើងប្រកាស និងចែករំលែកទៅភាគីនៅក្រៅប្រទេសអំពីព្រឹត្តិការណ៍អង្គរសង្ក្រាន្ត គឺមានការចាប់អារម្មណ៍ គ្រាន់តែថា ការប្រកាសរបស់យើងហាក់ដូចជាកៀកពេលបន្តិច ធ្វើឱ្យអ្នកចាប់អារម្មណ៍ អត់អាចកក់សំបុត្រយន្តហោះបាន ហើយពិបាកក្នុងការផ្លាស់ប្តូរទិសដៅមកកម្ពុជា»។ នេះជាការលើកឡើងរបស់ប្រធានសមាគមទីភ្នាក់ងារទេសចរណ៍កម្ពុជា។
តាមរបាយការណ៍របស់ក្រសួងទេសចរណ៍ ពីខែមករា-ខែកុម្ភៈ ឆ្នាំ២០២៥ កម្ពុជាទទួលបានភ្ញៀវទេសអន្តរជាតិចំនួន ១,២៦៣,៩៨៥នាក់ កើន២៧,៩ភាគរយធៀបនឹងឆ្នាំ២០២៤។ ជាមួយគ្នានេះ ភ្ញៀវទេសចរខ្មែរ ដែលទៅកម្សាន្តនៅក្រៅប្រទេសមានចំនួន ៣១២,០៦៤នាក់ កើន១៨,៨ភាគរយ ផងដែរ។
បើតាម លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល ចំនួនជើងហោះហើរនៃអាកាសយានដ្ឋានអន្តរជាតិទាំង៣របស់កម្ពុជា ពីថ្ងៃទី២៤-៣១ខែមីនា គឺមាន៦១៤ជើង ឬស្មើនឹង១,២២ជើង(ទ្វេទិស)។ របាយការណ៍ បង្ហាញថា សប្តាហ៍ទី៣ នៃខែមីនា អាកាសយានអន្តរជាតិភ្នំពេញ មានជើងហោះហើរចំនួន ៤៣៣ជើង ឬស្មើ៨៦៦ជើង (ទ្វេទិស), ព្រលានយន្តហោះខេត្តព្រះសីហនុ មាន១៦៣ជើង ឬ ៣២៦ជើង (ទ្វេទិស)។ ជាមួយគ្នានេះ អាកាសយានដ្ឋានអន្តរជាតិខេត្តសៀមរាប ពីថ្ងៃទី២៤ខែមីនា-ថ្ងៃទី៦ ខែមេសា គឺមាន១៨ជើង ឬ៣៦ជើង (ទ្វេទិស)៕
© រក្សាសិទ្ធិដោយ thmeythmey.com
Tag:
