.jpg)
.jpg)
ថៃរំពឹងទទួលភ្ញៀវបរទេសជាង ៤៧ម៉ឺននាក់ អំឡុងថ្ងៃបុណ្យចូលឆ្នាំថ្មី
- ថ្ងៃអាទិត្យ ទី១៣ ខែមេសា ឆ្នាំ២០២៥ ម៉ោង ៧:៣០ នាទី ល្ងាច
ការលេងជះទឹកនៅថ្ងៃចូលឆ្នាំថៃ ២០២៤ ។ រូបភាព ៖ AFP
ថៃរំពឹងថា នឹងរកចំណូលបាន ជាង ២៦,៥ ពាន់លានបាត (៧៦៣លានដុល្លារ) អំឡុងថ្ងៃ បុណ្យចូលឆ្នាំថ្មី ឆ្នាំ២០២៥ ដែលជាការរំពឹងក្នុងកំណើន ៨ភាគរយ បើប្រៀបធៀបឆ្នាំមុន។ ក្នុងនោះ ប្រទេសនេះ រំពឹងមានទេសចរបរទេស ប្រមាណ ៤៧៦ ០០០នាក់ ដែលកើនឡើង ៣ភាគរយ ធៀបគ្រាដូចគ្នាឆ្នាំមុន។
ចាប់ពីថ្ងៃទី១ ខែមករា ដល់ថ្ងៃទី៦ ខែមេសា ឆ្នាំ២០២៥ ថៃ បានស្វាគមន៍ទេសចរបរទេសជាង ១០ លាននាក់ ដែលបង្កើតប្រាក់ចំណូលជិត ៥០០ ពាន់លានបាត (១៤,៣ពាន់លានដុល្លារ)។ នេះបើតាមសារព័ត៌មាន Khaosod ស្រង់ទិន្នន័យពីក្រសួងទេសចរណ៍ និងកីឡាថៃ។
បើតាមក្រសួងទេសចរណ៍ថៃ អំឡុងថ្ងៃចូលឆ្នាំថ្មី ២០២៥ ការមកដល់របស់ទេសចរបរទេសនឹងកើនឡើងបន្ថែមទៀត ដោយសារកត្តាផ្សព្វផ្សាយ រួមទាំងការឈប់សម្រាកសិក្សានៅអឺរ៉ុប និងវិធានការផ្តល់ភាពងាយស្រួលនៃការធ្វើដំណើររបស់រដ្ឋាភិបាលថៃ ក៏ដូចជាការលើកលែងតម្រូវការកាតអន្តោប្រវេសន៍ TM6 និងលើកទឹកចិត្តឱ្យក្រុមហ៊ុនអាកាសចរណ៍ បង្កើនជើងហោះហើរជាដើម។
ក្រុមហ៊ុន Airports of Thailand Public Company Limited បានប៉ាន់ស្មានជើងហោះហើរ ចន្លោះថ្ងៃទី ១១-១៧ ខែមេសា ដោយជើងហោះហើរអន្តរជាតិ មានចំនួន ២៦៧ ៦០៣ជើង កើនឡើង ៩,១ភាគរយធៀបគ្រាដូចគ្នាឆ្នាំមុន។ សម្រាប់ជើងហោះហើរក្នុងស្រុក មានចំនួន ២១៣ ៧៩២ជើង កើនឡើង ២២,៧ភាគរយ។
សម្រាប់អ្នកដំណើរសរុបក្នុងរយៈពេល ៧ថ្ងៃខាងលើនេះ ក្រុមហ៊ុនប៉ាន់ស្មានថា មានចំនួន ៧៩ ១៩១ ៤៣១នាក់ កើនឡើង ១៨,៣ភាគរយ។ ក្នុងនោះអ្នកដំណើរអន្តរជាតិ មានចំនួន ៤៨ ២៤៣ ៨៤៥នាក់ កើនឡើង ១៤,១ភាគរយ។
ទន្ទឹមនេះ អាកាសយានដ្ឋានអន្តរជាតិទាំង៦ របស់ថៃរួមមាន សុវណ្ណភូមិ ដូនមឿង ឈៀងម៉ៃ ម៉ែហ្វាហ្លួង-ឈៀងរ៉ៃ ភូកេត និងហាតយ៉ៃ) នឹងបង្កើនបុគ្គលិកដើម្បីត្រួតពិនិត្យស្ថានីយអ្នកដំណើរ និងជួយក្នុងការផ្ទៀងផ្ទាត់ឯកសារធ្វើដំណើរ។
លើសពីនេះ អាកាសយានដ្ឋានចំនួន៤ នឹងផ្តល់ជូនកន្លែងចតរថយន្ត ដោយឥតគិតថ្លៃចាប់ពីថ្ងៃទី១២-១៦ ខែមេសា៕
© រក្សាសិទ្ធិដោយ thmeythmey.com
Tag:
