.jpg)
.jpg)
ចូលឆ្នាំ៖ កសិករពិបាករក«មាន់ស្រែ» ផ្គត់ផ្គង់ឱ្យអ្នកទិញ ព្រោះតម្រូវការខ្ពស់ពេក
- ថ្ងៃអាទិត្យ ទី១៣ ខែមេសា ឆ្នាំ២០២៥ ម៉ោង ៨:០០ នាទី យប់
រូបភាព៖ កសិដ្ឋានមាន់ស្រែ ស្វាយរៀង
ភ្នំពេញ៖ តម្រូវការ «មាន់ស្រែ» កាន់តែកើនឡើងខ្លាំងក្នុងអំឡុងពេលកម្ពុជា ត្រៀមប្រារព្ធពិធីបុណ្យចូលឆ្នាំខ្មែរ។ ការណ៍នេះ ធ្វើឱ្យកសិករខ្លះបង្ហាញការស្ដាយ ដែលពុំមានលទ្ធភាពផ្គត់ផ្គង់ទីផ្សារតាមការចង់បាន។
លោក តូច សេង ស្ថិតក្នុងចំណោមកសិករម្នាក់នៅខេត្តស្វាយរៀង ដែលខ្វះលទ្ធភាពផ្គត់ផ្គង់មាន់ស្រែ សម្រាប់ឱកាសបុណ្យចូលឆ្នាំខ្មែរនេះ។ លោក បានរៀបរាប់ថា ជាធម្មតាកសិដ្ឋានរបស់លោក មានមាន់លក់ចេញជាហូរហែ ប៉ុន្តែនៅពេលតម្រូវការ និងតម្លៃកើនឡើង បែរជាលោកមិនមានមាន់ច្រើន សម្រាប់លក់ទៅវិញ។
ម្ចាស់កសិដ្ឋានខ្នាតតូចរូបនេះ បង្ហាញការសោកស្ដាយ ដ្បិតថ្ងៃចូលឆ្នាំខ្មែរនេះ លោក មានមាន់ប្រហែល ៣០ ក្បាលប៉ុណ្ណោះ សម្រាប់លក់ឱ្យអតិថិជនក្នុងតំបន់។
បច្ចុប្បន្ន មាន់ស្រែមានតម្លៃចន្លោះពី១៨០០០រៀល ទៅ២០០០០រៀល ក្នុងមួយគីឡូក្រាម ធៀបនឹងថ្ងៃធម្មតាបានតម្លៃក្រោម១៧០០០រៀលប៉ុណ្ណោះ ក្នុងមួយគីឡូក្រាម។ មូលហេតុមាន់ស្រែត្រូវប៉ាន់ ដោយសារវាមានរសជាតិឆ្ងាញ់ជាងមានចិញ្ចឹមផ្សេងៗ ស្របពេលតម្លៃសាច់គោ និងសាច់ជ្រូកឡើងថ្លៃដែរនោះ ក៏ជាកត្តាជំរុញឱ្យពលរដ្ឋកាន់តែច្រើន ងាកមកទទួលទានមាន់ស្រែវិញ។ នេះបើតាម លោក តូច សេង។
លោក តូច សេង ប្រាប់ដូច្នេះថា៖ «សម្រាប់ចូលឆ្នាំខ្មែរ គេចូលចិត្តហូបមាន់ស្រែណាស់ ព្រោះវាមានរសជាតិឆ្ងាញ់ គួបផ្សំបច្ចុប្បន្ន សាច់គោ និងសាច់ជ្រូកឡើងថ្លៃប្រហាក់ប្រហែលសាច់មាន់ដែរ ដូច្នេះការបញ្ជាទិញ និងការលក់របស់ខ្ញុំក៏ប្រសើរដែរ។ ប៉ុន្តែស្ដាយដែលអត់សូវមានមាន់លក់។»។
ចំណែក លោក ភូ ធា កសិករម្នាក់មកពីខេត្តកំពង់ស្ពឺ បានឱ្យដឹងដែរថា មុនចូលឆ្នាំប៉ុន្មានថ្ងៃ លោកលក់មាន់បានប្រមាណ ១០០ក្បាល រួចទៅហើយ។ សម្រាប់ថ្ងៃចូលឆ្នាំ លោកនៅសល់មាន់តែ ៤០ ក្បាលប៉ុណ្ណោះ សម្រាប់លក់រាយបែបលក្ខណៈគ្រួសារ។
មិនខុសពី លោក តូច សេង ប៉ុន្មានទេ លោក ភូ ធា បានអះអាងថា ឆ្នាំនេះពលរដ្ឋនិយមបរិភោគមាន់ស្រែច្រើន។ រីឯតម្លៃដែលលោកទទួលបាន ក៏ល្អប្រសើរផងដែរ។ នៅប៉ែកស្រុកសំរោង ខេត្តកំពង់ស្ពឺ មាន់ស្រែមានតម្លៃលក់រាយចន្លោះពី ១៩ ០០០រៀល ទៅ ២០ ០០០រៀល ក្នុងមួយគីឡូក្រាម ធៀបនឹងថ្ងៃធម្មតា បានត្រឹម ១៤ ០០០ រៀលប៉ុណ្ណោះ ក្នុងមួយគីឡូក្រាម។
លោក ភូ ធា ប្រាប់ដូច្នេះថា៖ «ឆ្នាំនេះ មាន់ស្រែ គេត្រូវការច្រើនណាស់។ ហើយឥឡូវ ខ្ញុំឡើងអស់មានលក់ឱ្យគេ(អតិថិជន)ហើយ។ គ្រាន់តែមុនចូលឆ្នាំប៉ុន្មានថ្ងៃ ខ្ញុំលក់អស់ប្រហែល ១០០ ក្បាល។ នៅថ្ងៃចូលឆ្នាំ ខ្ញុំសល់ប្រហែល ៤០ក្បាលដែរ ប៉ុន្តែ គេបានកក់ទុកអស់ហើយ។»។
បើតាមកសិករទាំងពីរ មាន់ស្រែ ងាយស្រួលចិញ្ចឹម ដោយគ្រាន់តែលែងចោលក្នុងទីធ្លាផ្ទះ ឬចម្ការ ហើយក្នុងមួយថ្ងៃ គេផ្ដល់ចំណីតែម្ដង ឬពីរដងប៉ុណ្ណោះ។ មាន់មួយក្បាលត្រូវចំណាយពេលចិញ្ចឹមជាង៣ខែ ទើបបានទម្ងន់ ១,២ ទៅ១,៥គីឡូក្រាម៕
© រក្សាសិទ្ធិដោយ thmeythmey.com
Tag:
