.jpg)
.jpg)
កង់បុរាណ ក្លាយជាវត្ថុលម្អហាងកាហ្វេសម័យទំនើប
- ថ្ងៃអាទិត្យ ទី១៣ ខែមេសា ឆ្នាំ២០២៥ ម៉ោង ១:០០ នាទី រសៀល
ភ្នំពេញ៖ ទោចក្រយានចាស់ៗ៥គ្រឿង ត្រូវបានគេដាក់តាំងលម្អ នៅហាងកាហ្វេ MOBYLETTE (ម៉ូប៊ីលែត) ស្ថិតនៅវិថី១០៨ ក្នុងសង្កាត់ចោមចៅ ខណ្ឌពោធិ៍សែនជ័យ ក្នុងរាជធានីភ្នំពេញ។ គេយកម៉ាកកង់ MOBYLETTE ដាក់ឈ្មោះហាង កាហ្វេតែម្តង ហើយនៅទីនេះក៏មានកង់ម៉ាស៊ីនម៉ាក MOBYLETTE មួយគ្រឿងដែរ។ ក្រៅពីនេះ ក៏មានទោចក្រយានយន្ដផ្សេងទៀត៣គ្រឿង និងកង់ធម្មតា១គ្រឿងដែរ ដែលសុទ្ធតែបុរាណ។ កង់នេះវាធម្មតាត្រង់ថាគ្មានម៉ាស៊ីនទេ។ ព្រោះក្នុងចំណោមទោចក្រយានយន្ដ ក្នុងហាងកាហ្វេនេះ មានកង់ម៉ាស៊ីន ៣គ្រឿង។ ក៏ប៉ុន្តែអាចនិយាយបានថា វាមិនធម្មតាត្រង់ថា មានតួរាងប្លែក ហើយកែបជាប្រភេទអង្រឹងទៀត! កង់បុរាណម៉ូឌែល Kemper នេះ ត្រូវបានគេផលិតរយៈពេលកន្លះសតវត្ស។ ហេតុនេះពិបាកដឹងថា វាមានអាយុកាលប៉ុន្មានឆ្នាំដែរ។ គេព្យួរកង់ពណ៌លឿងខ្ចីនេះនៅនឹងជញ្ជាំងម្ខាងនៃហាងកាហ្វេនេះ។ តួរបស់វាមិនមែនធ្វើអំពីដែកទិបធំ បីបួនដើមទេ ប៉ុន្តែវាធ្វើអំពីដែកទិបតូច បួនដប់ដើម ដែលខុសស្តង់ដារ។ ពិតមែនហើយ កង់ម៉ាក PEDERSEN មានស្តង់ដារខុសគេទាំងអស់។
ដើម្បីជ្រាបអញ្ជើញលោកអ្នកនាងទស្សនាវីដេអូខាងក្រោមនេះ៖
កង់ដំបូងគេបង្អស់ត្រូវបានបង្កើត ឆ្នាំ១៨១៧ នៅប្រទេសអាល្លឺម៉ង់។ បច្ចេកទេសវាខុសគ្នាឆ្ងាយ ពីកង់បច្ចុប្បន្ន ព្រោះគ្មានច្រវាក់ ហើយវាធ្វើពីឈើ។ ចាប់ពីទស្សវត្សរ៍១៨៧០ ត្រូវប្រើដែកច្រើនជាង។ សម័យនោះ នៅមិនទាន់មានច្រវាក់ ដែលធ្វើឱ្យជិះមិនបានលឿនទេ ដោយសារឈ្នាន់នៅផ្ចិតកង់ខាងមុខផ្ទាល់។ ឆ្នាំ១៨៧៩ គេបង្កើតច្រវាក់។ ហើយឆ្នាំ១៨៩៧ លោក JUZAN Georges សញ្ជាតិបារាំង បង្កើតប្រភេទកង់មួយ ដែលមានរាងដូចទោចក្រយានសម័យបច្ចុប្បន្ន។ ទន្ទឹមនឹងនេះ ឆ្នាំ១៨៩០ លោក PEDERSEN Mikael បង្កើតកង់តួឈើ កែបបែបអង្រឹង នាប្រទេសអង់គ្លេស។ គំនិតរបស់ពលរដ្ឋដាណឺម៉ាករូបនេះ គឺឱ្យអ្នកជិះអង្គុយបានផាសុកភាព។ យូរៗទៅ ក្រៅពីប្រភេទ Kemper ដែលជាប្រភេទធម្មតា គាត់បង្កើតកង់កែបអង្រឹងប្រភេទផ្សេងៗ ដោយមានប្រភេទស្រាល ប្រភេទប្រណាំង ប្រភេទជិះពីរនាក់ និងប្រភេទបត់ជាពីរដើម្បីយកទៅឆ្ងាយ។ ដោយឡែកគ្មានម៉ាកផ្សេងណាមួយ ដែលយកប្រព័ន្ធរបស់គាត់ទៅអភិវឌ្ឍ ឬទៅផលិតទេ។ គាត់មិនដែលបានលក់កង់ច្រើនទេ។ រហូតដល់សព្វថ្ងៃនេះ នៅតែមានការផលិតមួយៗ ទោះបីជាមានតែម៉ាក PEDERSEN មួយគត់ ដែលប្រើស្តង់ដារ PERDESEN ហើយតម្លៃកង់ម៉ាកនេះថ្លៃណាស់។ ពេលបច្ចុប្បន្នគេផលិតកង់កែបអង្រឹង តាមការបញ្ជាទិញ។ មានតម្លៃចាប់ពី ១ ៦០០ អឺរ៉ូ ដែលស្មើនឹង ៦ ៦៤០ ០០០ រៀល។ យ៉ាងណាក៏ដោយ កង់កែបអង្រឹងមានរាងគួរឱ្យស្រឡាញ់ នេះជាមូលហេតុដែលអ្នកទិញបានបង្កើតក្លិបមួយ នៅទ្វីបអឺរ៉ុប៕
អត្ថបទទាក់ទង
:
© រក្សាសិទ្ធិដោយ thmeythmey.com
Tag:
.gif)