.jpg)
.jpg)
ថៃ ប្រកាសច្បាប់ថ្មីប្រឆាំងការបោកប្រាស់តាមអនឡាញ
- ថ្ងៃចន្ទ ទី១៤ ខែមេសា ឆ្នាំ២០២៥ ម៉ោង ៣:៥៩ នាទី រសៀល
នាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត់ ។ រូបភាព ៖ X/@ingshin
ថៃបានចេញក្រឹត្យបន្ទាន់មួយ ដែលតម្រូវឱ្យស្ថាប័នហិរញ្ញវត្ថុ ប្រតិបត្តិករទូរគមនាគមន៍ និងបណ្តាញសង្គម ចែករំលែកការទទួលខុសត្រូវក្នុងការការពារការបោកប្រាស់តាមអនឡាញ។
ក្រឹត្យថ្មីដែលចូលជាធរមានចាប់ពីថ្ងៃទី១៣ ខែមេសា តម្រូវឱ្យស្ថាប័នហិរញ្ញវត្ថុ ប្រតិបត្តិករទូរគមនាគមន៍ និងបណ្ដាញសង្គមពិនិត្យ ផ្តល់ព័ត៌មាន និងបង្កកគណនី ប្រតិបត្តិការហិរញ្ញវត្ថុ និងសេវាទូរគមនាគមន៍ ដែលសង្ស័យថាពាក់ព័ន្ធនឹងការបោកប្រាស់តាមអនឡាញ។
រដ្ឋមន្ត្រីក្រសួងសេដ្ឋកិច្ច និងសង្គមឌីជីថល លោក Prasert Jantararauangtong បាននិយាយថា ក្រឹត្យថ្មីនេះមានគោលបំណងការពារប្រជាពលរដ្ឋពីការបោកប្រាស់តាមទូរស័ព្ទ និងអ៊ីនធឺណិត។ ភ្នាក់ងារ និងអាជីវកម្មដែលមិនគោរពតាមក្រឹត្យនេះអាចនឹងត្រូវពិន័យជាប្រាក់រហូតដល់ ៥០០ ០០០ (១៥ ០០០ដុល្លារ)។ បុគ្គលដែលទទួលខុសត្រូវ ប៉ុន្តែមិនគោរពតាម អាចត្រូវបានពិន័យជាប្រាក់រហូតដល់ ៣០០០ដុល្លារ ឬដាក់ពន្ធនាគាររហូតដល់មួយឆ្នាំ។
ប្រតិបត្តិករទូរគមនាគមន៍ដែលខកខានក្នុងការធានាថាអតិថិជនទូរស័ព្ទចល័តត្រូវបានចុះឈ្មោះឱ្យបានត្រឹមត្រូវ ដើម្បីការពារការបោកប្រាស់អនឡាញ អាចប្រឈមនឹងការជាប់ពន្ធនាគាររហូតដល់១ឆ្នាំ ឬពិន័យជាប្រាក់រហូតដល់ ៣០០០ដុល្លារ។ ភាគីដែលប្រមូល លាតត្រដាង ឬប្រើប្រាស់ទិន្នន័យរបស់អ្នកស្លាប់ ដែលអាចជួយសម្រួលដល់ការបោកប្រាស់ ក៏អាចនឹងត្រូវទទួលទោសដូចគ្នាដែរ។
អាជ្ញាធរក៏បានធ្វើវិសោធនកម្មបទបញ្ញត្តិដែលតម្រូវឱ្យមានការដោះដូរទ្រព្យសម្បត្តិឌីជីថលបរទេស ដើម្បីស្នើសុំអាជ្ញាប័ណ្ណដើម្បីផ្តល់សេវានៅក្នុងប្រទេសថៃ។
កន្លងមក ប្រទេសនេះបានប្រឈមនឹងបញ្ហាក្នុងកិច្ចខិតខំប្រឹងប្រែងរបស់ខ្លួនដើម្បីការពារប្រតិបត្តិការគួរឱ្យសង្ស័យ លើការផ្លាស់ប្តូរទ្រព្យសម្បត្តិឌីជីថលបរទេសដែលត្រូវបានគេសង្ស័យថា បានជួយសម្រួលដល់ការផ្ទេរប្រាក់សម្រាប់បណ្តាអង្គភាពបោកប្រាស់។ វិសោធនកម្មថ្មីនេះ ក៏ចូលជាធរមានចាប់ពីថ្ងៃទី១៣ ខែមេសា។
ថ្មីៗនេះ ថៃបានបង្កើនកិច្ចសហប្រតិបត្តិការជាមួយចិន ដើម្បីបង្ក្រាបការជួញដូរមនុស្ស និងការក្លែងបន្លំតាមអនឡាញដោយហៅវាថាជា«បញ្ហាសន្តិសុខជាតិ»។ អ្នកសង្កេតការណ៍ប៉ាន់ស្មានថា មជ្ឈមណ្ឌលបោកប្រាស់នៅអាស៊ីអាគ្នេយ៍បានបោកប្រាស់ជនរងគ្រោះរាប់សិបពាន់លានដុល្លារក្នុងមួយឆ្នាំៗ។ មនុស្សរាប់សែននាក់ត្រូវបានចាប់ខ្លួនដោយក្រុមឧក្រិដ្ឋជន និងបង្ខំឱ្យធ្វើការនៅក្នុងមជ្ឈមណ្ឌលបន្លំនៅទូទាំងតំបន់៕
© រក្សាសិទ្ធិដោយ thmeythmey.com
Tag:
