.jpg)
.jpg)
អង្គរសង្ក្រាន្ត បានចូលរួមបំផុសស្មារតីស្នេហាជាតិ ការលើកស្ទួយទេសចរណ៍ និងសេដ្ឋកិច្ចមូលដ្ឋាន
- ថ្ងៃចន្ទ ទី១៤ ខែមេសា ឆ្នាំ២០២៥ ម៉ោង ៥:៣៦ នាទី ល្ងាច
សម្តេច ហ៊ុន ម៉ាណែត មានមោទកភាពចំពោះការរៀបចំព្រឹត្តិការណ៍អង្គរសង្ក្រាន្ត ដែលបន្តប្រារព្ធឡើងនៅទឹកដីខេត្តសៀមរាប ជាង ១០ឆ្នាំមកនេះ ក្នុងគោលបំណងលើកតម្កើងវប្បធម៌ ប្រពៃណីជាតិ ផ្សព្វផ្សាយសក្តានុពលទេសចរណ៍ និងទឹកចិត្តល្អរបស់ពលរដ្ឋខ្មែរ។
សម្រាប់ប្រមុខរាជរដ្ឋាភិបាល ព្រឹត្តិការណ៍អង្គរសង្ក្រាន្ត ពុំត្រឹមតែជាឱកាសចូលឆ្នាំថ្មី ប្រពៃណីជាតិខ្មែរនោះទេ តែព្រឹត្តិការណ៍នេះបានក្លាយជាកម្លាំងជំរុញទេសចរណ៍គ្រប់ទម្រង់រួមមាន ទេសចរណ៍វប្បធម៌, ប្រពៃណី ប្រវត្តិសាស្ត្រ និងទេសចរណ៍ធម្មជាតិផង។
ថ្លែងក្នុងពិធីបើកព្រឹត្តិការណ៍អង្គរសង្ក្រាន្តនៅរសៀលថ្ងៃទី១៤ ខែមេសា នៅទីតាំងភូមិខ្ញុំ មុខប្រាសាទអង្គរវត្ត សម្តេច នាយករដ្ឋមន្ត្រី បានថ្លែងថា បានក្លាយជាចំណែកមួយ ក្នុងការជំរុញភាពរីកចម្រើននៅក្នុងខេត្តសៀមរាប និងសេដ្ឋកិច្ចជាតិ។
មិនតែប៉ុណ្ណោះ ព្រឹត្តិការណ៍អង្គរសង្ក្រាន្ត ក៏បានសម្រេចនូវស្មារតីរបស់ព្រឹត្តិការណ៍ដែរ នោះការ បំផុសស្មារតីស្នេហាជាតិក្នុងសង្គម, ជំរុញលើកស្ទួយទេសចរណ៍ និងលើកស្ទួយសេដ្ឋកិច្ចមូលដ្ឋាន ។
ពីពិធីបើកព្រឹត្តិការណ៍អង្គរសង្ក្រាន្តនៅរសៀលថ្ងៃទី១៤ ខែមេសា នៅទីតាំងភូមិខ្ញុំ មុខប្រាសាទអង្គរវត្ត សម្តេច នាយករដ្ឋមន្ត្រី បានបញ្ជាក់ដូច្នេះ ៖«គោលដៅសំខាន់នៃការរៀបចំអង្គរសង្ក្រាន្ត ពីមុនខ្ញុំគិតថា ក៏ដូចជានៅឆ្នាំនេះ គោលបំណងធំ៣ ទី១ បំផុសស្មារតីស្នេហាជាតិ តាមរយៈរួមគ្នា សាមគ្គីគ្នាជាកម្លាំងជាតិមួយ ដើម្បីលើកតម្កើងវប្បធម៌ ប្រពៃណីជាតិខ្មែរ។ ទី២ គឺបំផុសការផ្សព្វផ្សាយនូវវិស័យទេសចរណ៍ និងទី៣គឺលើកស្ទួយសកម្មភាពសេដ្ឋកិច្ច និងជីវភាពរស់នៅរបស់ប្រជាពលរដ្ឋ នៅក្នុងខេត្តសៀមរាប ជាពិសេសនៅក្នុងក្រុងសៀមរាប និងតំបន់ទេសចរណ៍មួយចំនួន នៅទូទាំងប្រទេស។ តាមរបាយការណ៍របស់ ឯកឧត្តមអភិបាល(ខេត្ត) និងឯកឧត្តម ហ៊ុន ម៉ានី ហើយតាមព័ត៌មានដែលខ្ញុំបានពីក្រុមការងារ ក៏ដូចជាខ្លួនខ្ញុំផ្ទាល់[…] អាចនិយាយយ៉ាងមោទកភាពថា គោលបំណងទាំង៣នេះ គឺបានសម្រេច។»។
ក្រៅពីថ្លែងនូវមោទកភាពចំពោះព្រឹត្តិការណ៍វប្បធម៌ដ៏ធំនេះ សម្តេចនាយករដ្ឋមន្ត្រី ក៏រំពឹងដែរថា អង្គរសង្ក្រាន្ត ឆ្នាំ២០២៥នេះ នឹងបន្តទាក់ទាញនូវកំណើនទេសចរកាន់តែច្រើនជាងការរៀបចំមុនៗបន្ថែមទៀត។ យោងតាមរបាយការណ៍ ព្រឹត្តិការណ៍អង្គរសង្ក្រាន្តឆ្នាំ២០១៣ ទាក់ទាញបានភ្ញៀវទេសចរជាតិ និងអន្តរជាតិប្រមាណ ១៨ម៉ឺននាក់ និងបានហក់កើនឡើង ដល់ប្រមាណ ១២លាននាក់ នៅក្នុងព្រឹត្តិការណ៍អង្គរសង្ក្រាន្ត ឆ្នាំ២០២៣៕
© រក្សាសិទ្ធិដោយ thmeythmey.com
