.jpg)
.jpg)
Phnom Penh insolite ជាកម្មវិធីដើរស្គាល់ភ្នំពេញតាមរបៀបប្លែក ដោយចេញដំណើរពីស្ថានីយរថភ្លើង
- ថ្ងៃអង្គារ ទី១៥ ខែមេសា ឆ្នាំ២០២៥ ម៉ោង ៩:៣៩ នាទី យប់
ភ្នំពេញ៖ លោក ឃុន វណ្ណៈ បានបង្កើតដំណើរ Phnom Penh insolite (អាំងសូលីត) ជាមួយលោក PEZARD Emmanuel។ Phnom Penh insolite មិនមែនជាឈ្មោះផ្លូវថ្មើរជើងទេ មិនមែនជាទីភ្នាក់ងារទេសចរណ៍ទេ ប៉ុន្តែ Phnom Penh insolite ជាកម្មវិធីដើរកម្សាន្តក្នុងរាជធានីភ្នំពេញ។ ភ្ញៀវអាចស្នើសុំឱ្យលោក វណ្ណៈ នាំពួកគាត់ដើរតាមផ្លូវលំ ក្នុងកណ្ដាលទីក្រុងបាន ដោយណាត់ជួបគ្នានៅស្ថានីយអយស្ម័យយានភ្នំពេញ (ស្ថានីយរថភ្លើង)។ នៅឯស្ថានីយអយស្ម័យយាន លោក វណ្ណៈ ជជែកអំពីរឿងអតីតកាលជាច្រើន ទាក់ទងអំពីរថភ្លើង ដែលគាត់ធ្លាប់ជួបកាលពីកុមារភាព។
ដំណើរ Phnom Penh insolite ប្រើពេលវេលាជិត៤ម៉ោង ដោយក្នុងដំណើរនេះ គឺជាឱកាសដែលគេនឹងជួបជាមួយប្រជាពលរដ្ឋ ដែលស្នាក់នៅ ឬធ្វើការកន្លែងនោះ។ អ្នកភ្នំពេញទាំងអស់នោះ ម្នាក់ៗមានចំណុចពិសេសប្លែកៗគ្នា ដូចជាមុខរបរ សកម្មភាព ទម្លាប់ ស្នាដៃ ឬវត្ថុដែលខុសគេ។ កាលពីនៅវ័យក្មេង លោក វណ្ណៈ បានរៀនផ្នែកធនាគារ។ បន្ទាប់មក គាត់រៀនបន្ថែមវគ្គថតរូប ដើម្បីក្លាយទៅជាសិល្បករថតរូប។ ឥឡូវនេះ គាត់ក៏ជាវិចិត្រករផងដែរ ជាពិសេសគាត់ចាប់អារម្មណ៍នឹងគូរសត្វឆ្មា។ ដើម្បីដើរស្គាល់ Phnom Penh insolite ត្រូវតេទូរស័ព្ទទៅកាន់លេខ ០៧៧ ២១ ២១ ៧៣ ឬផ្ញើសារអេឡិចត្រូនិកទាក់ទង់លោក វណ្ណៈ ទៅ [email protected] ។ Insolite គឺជាពាក្យបារាំង ដែលមានន័យថា មិនធម្មតា ចម្លែក ខុសគេប្លែក។
ស្ថានីយអយស្ម័យយានភ្នំពេញ ត្រូវបានសាងសង់កាលពីសម័យអាណានិគមបារាំង ក្នុងឆ្នាំ១៩៣២។ គឺជាស្នាដៃរបស់ស្ថាបត្យករ DESBOIS Jean (កើតឆ្នាំ១៨៩១ ស្លាប់ឆ្នាំ១៩៧១)។ អគារនេះធ្វើអំពីបេតុងអាមេ។
គួរកត់សម្គាល់ថា កម្ពុជាមានផ្លូវរថភ្លើងចំនួន២ខ្សែ គឺខ្សែភាគខាងជើង និងខ្សែភាគខាងត្បូង ដែលមានប្រវែងសរុប ៦៥០គីឡូម៉ែត្រ។ ខ្សែភាគខាងជើង ពីរាជធានីភ្នំពេញ ទៅក្រុងប៉ោយប៉ែត មានប្រវែងសរុប ៣៨៦គីឡូម៉ែត្រ និងបានចាប់បើកដំណើរការទាំងស្រុងឡើងវិញ នៅខែកក្កដា ឆ្នាំ២០១៨។ ចំណែកខ្សែភាគខាងត្បូង ពីភ្នំពេញ ទៅខេត្តព្រះសីហនុ មានប្រវែង ២៦៤គីឡូម៉ែត្រ និងបានបើកឱ្យដំណើរការឡើងវិញ នាខែមេសា ឆ្នាំ២០១៦។ ឆ្នាំ២០១៧ ក្រុមហ៊ុនរ៉ូយ៉ាល់រេលវេ (រាជាយស្ម័យយានកម្ពុជា) ទទួលបាននូវសម្បទានរយៈពេល៣០ឆ្នាំ លើការដឹកជញ្ជូនតាមរថភ្លើងក្នុងប្រទេស។
អំឡុងពេលជំងឺកូវីដ-១៩ បានរាលដាលនៅកម្ពុជា ក្រុមហ៊ុនរ៉ូយ៉ាល់រេលវេ ដែលគ្រប់គ្រងការជិះអយស្ម័យយានទូទាំងប្រទេស បានផ្អាកការជិះរថភ្លើង លើខ្សែទាំង២សម្រាប់អ្នកដំណើរ ម្តងជាពីរដង។ ការធ្វើដំណើរតាមរថភ្លើងនេះ ត្រូវបានបើកឡើងវិញ កាលពី៣ឆ្នាំមុន នៅក្រោយវិបត្តិជំងឺឆ្លងកូវីដ-១៩។
តាមពិត ខ្សែរថភ្លើងដំបូងបង្អស់ ត្រូវបានបើកឆ្នាំ១៨៩៥។ វាចេញពីកំពង់ផែមាត់ពាម ទៅដល់ក្រុងសៀមរាប។ ដោយឡែក មិនសល់អ្វីសោះពីផ្លូវដែក៨គីឡូម៉ែត្រនោះទ។
នៅស្ថានីយអយស្ម័យយានភ្នំពេញ មានក្បាលរថយន្តភ្លើងចំណាស់ចំនួន២ ដែលត្រូវបានគេទុកចោល ដោយសារតែវាខូចប្រើលែងកើត។ ដ្បិតប្រើការមិនបាន តែក្បាលរថភ្លើងចំណាស់នេះ ក៏ជាផ្នែកមួយដែលគួរជាទីចាប់អារម្មណ៍របស់អ្នកដំណើរទូទៅដែរ៕
អត្ថបទទាក់ទង
© រក្សាសិទ្ធិដោយ thmeythmey.com
Tag:
.gif)