.jpg)
.jpg)
កូរ៉េខាងត្បូង និងវៀតណាម ប្តេជ្ញាសហការគ្នា ក្នុងពេលអាម៉េរិកដំឡើងពន្ធគយ
- ថ្ងៃពុធ ទី១៦ ខែមេសា ឆ្នាំ២០២៥ ម៉ោង ២:៣០ នាទី រសៀល
លោក Bui Thanh Son រដ្ឋមន្រ្តីការបរទេសវៀតណាម (ស្តាំ) និងសមភាគីកូរ៉េខាងត្បូង លោកCho Tae-yul។ រូបភាព AFP
ប្រមុខការទូតវៀតណាម និងកូរ៉េខាងត្បូង នៅថ្ងៃទី១៥ ខែមេសា បានឯកភាពសហការគ្នាឱ្យកាន់តែជិតស្និទ្ធ ស្របពេលប្រធានាធិបតីអាម៉េរិក ដំឡើងពន្ធគយ។ ក្រុមហ៊ុន Samsung របស់កូរ៉េខាងត្បូង មានរោងចក្រជាច្រើននៅវៀតណាម ដ្បិតតម្លៃពលកម្មទាបជាងចិន។
វៀតណាម និងកូរ៉េខាងត្បូង សុទ្ធតែរងពន្ធគយបដិការរបស់អាម៉េរិក ដោយរងពន្ធ ៤៦ភាគរយ និង២៦ភាគរយរៀងៗខ្លួន។ យ៉ាងណាមិញ លោក ដូណាល់ ត្រាំ ប្រធានាធិបតីអាម៉េរិក បានប្រកាសព្យួរពន្ធនោះរយៈពេល ៩០ថ្ងៃ សម្រាប់ចរចា។ ក្នុងពេលរងពន្ធគយបែបនេះ រដ្ឋមន្រ្តីការបរទេសវៀតណាម និងកូរ៉េខាងត្បូង បានប្រកាសសហការគ្នាលើវិស័យជាច្រើន។
តាមសេចក្តីប្រកាសរបស់ក្រសួងការបរទេសវៀតណាម ប្រទេសទាំងពីរ នឹងស្វះស្វែងរកការដំឡើងទំហំពាណិជ្ជកម្មរហូតដល់ ១៥០ពាន់លានដុល្លារ ត្រឹមឆ្នាំ២០៣០ ក្នុងលក្ខណៈប្រកបដោយចីរភាព និងតុល្យភាព។
ពីទីក្រុងហាណូយ លោក Bui Thanh Son រដ្ឋមន្រ្តីការបរទេសវៀតណាម បានលើកទឹកចិត្តឱ្យក្រុមហ៊ុនកូរ៉េខាងត្បូងវិនិយោគបន្ថែមទៀត ដោយផ្តោតលើហេដ្ឋារចនាសម្ព័ន្ធ, អេឡិចត្រូនិច, បន្ទះឈីប, និងថាមពលកកើតឡើងវិញជាដើម។
ចំណែកនៅថ្នាក់ពហុភាគី ប្រទេសទាំងពីរ បានសន្យាសហការ និងគាំទ្រគ្នាទៅវិញទៅមក ក្នុងការដោះស្រាយបញ្ហាតំបន់ និងអន្តរជាតិ និងដោះស្រាយបញ្ហារួមជាមួយគ្នា។
សូមបញ្ជាក់ថា ក្រុមហ៊ុនវៀតណាម Samsung ដែលជាក្រុមហ៊ុនយក្ស បានផលិតទូរសព្ទច្រើនជាង ៦០ភាគរយនៅវៀតណាម ដើម្បីលក់នៅទីផ្សារអន្តរជាតិ៕
© រក្សាសិទ្ធិដោយ thmeythmey.com
Tag:
