.jpg)
.jpg)
លោកតាឆ្កួតបានធ្វើដំណើរទៅប្រទេសឡាវ ជិះម៉ូតូអាយុកាល៥០ឆ្នាំ ចម្ងាយ២៨២៦គីឡូម៉ែត្រ
- ថ្ងៃព្រហស្បតិ៍ ទី១៧ ខែមេសា ឆ្នាំ២០២៥ ម៉ោង ៨:០០ នាទី ព្រឹក
សៀមរាប៖ ខែមករាកន្លងមក លោក លី ប៉េងហេង ហៅតាឆ្កួត បានធ្វើដំណើរកម្សាន្តជិះម៉ូតូទៅប្រទេសឡាវ។ គាត់ជានាយកសារមន្ទីរ វិមានសុខា នៅខេត្តសៀមរា ដែលជាសារមន្ទីរតាំងបង្ហាញវត្ថុបុរាណ ជាពិសេសយានជំនិះ។ ថ្ងៃទី៣ ខែមករា ឆ្នាំ២០២៥នេះ គាត់បានជិះម៉ូតូម៉ាក HONDA ប្រភេទ Benly 50S ចេញពីក្រុងសៀមរាបទៅ ជាមួយក្រុម Moto vintage Siem Reap ។ ម៉ូតូរបស់គាត់មានអាយុកាលជាង ៥០ឆ្នាំ។
អ្នកចូលរួមទាំងអស់ មាន១៦នាក់ ដែលមានទោចក្រយានយន្ដម៉ាក HONDA ៧គ្រឿង ម៉ាក KAWASAKI ១គ្រឿង និងត្រីចក្រយានយន្ដម៉ាក OURAL ១គ្រឿងដែរ។ ថ្ងៃដំបូង ពួកគាត់បានជិះអស់ ៦០០គីឡូម៉ែត្រ ទៅដល់ក្រុងប៉ាក់សេ នៅប្រទេសឡាវ។ រយៈពេល៩ថ្ងៃ ពួកគាត់បានធ្វើដំណើរទៅស្ទឹងត្រែង ប៉ាក់សេ មឿងហ្វឿង និង វៀងច័ន្ទន៍ ហើយត្រឡប់ទៅវិញថ្ងៃទី១១ ខែមករា។ ក្រុមអ្នកស្រឡាញ់ យានបុរាណនេះបានជិះអស់ ២៨២៦គីឡូម៉ែត្រ។
សារមន្ទីរ វិមានសុខា នៅក្រុងសៀមរាប តាំងវត្ថុបុរាណជាច្រើនមុខ ដូចជាយានជំនិះបុរាណ នាឡិកាបុរាណ ឧបករណ៍សោតទស្សន៍បុរាណ និងវត្ថុបុរាណផ្សេងៗទៀតខ្លះៗដែរ។ សារមន្ទីរ វិមានសុខា បើករៀងរាល់ថ្ងៃ ពីម៉ោង៨ព្រឹក ដល់ម៉ោង៥ល្ងាច។ វាស្ថិតនៅផ្លូវលេខ២២ ភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប។ សំបុត្រចូលមានតម្លៃ ១០០០០រៀល សម្រាប់ពលរដ្ឋខ្មែរម្នាក់ និង ២០០០០៛ សម្រាប់ពលរដ្ឋបរទេសម្នាក់។ សូមបញ្ជាក់ថា សារមន្ទីរក៏មានហាងកាហ្វេតុបតែងបែបបុរាណមួយដែរ។ ក្រៅពីនេះក៏អាចជួលទោចក្រយាន និងត្រីចក្រយានបានដែរ៕
© រក្សាសិទ្ធិដោយ thmeythmey.com
.gif)