.jpg)
.jpg)
កម្ពុជា រំពឹងលើការគាំទ្រផ្នែកហិរញ្ញវត្ថុបន្ថែមទៀតពីចិន រួមទាំងគម្រោងហេដ្ឋារចនាសម្ព័ន្ធ
- ថ្ងៃព្រហស្បតិ៍ ទី១៧ ខែមេសា ឆ្នាំ២០២៥ ម៉ោង ១២:២០ នាទី រសៀល
រូបភាព ៖ STPM
កម្ពុជា រំពឹងលើការគាំទ្រផ្នែកហិរញ្ញវត្ថុបន្ថែមទៀតពីចិន រួមទាំងគម្រោងហេដ្ឋារចនាសម្ព័ន្ធ នៅពេលលោកប្រធានាធិបតី ស៊ី ជិនភីង បំពេញទស្សនកិច្ចនៅថ្ងៃទី១៧ ខែមេសា នៅចុងបញ្ចប់នៃដំណើរទស្សនកិច្ច ៣ ប្រទេសនៅអាស៊ីអាគ្នេយ៍។
កម្ពុជា ដែលជាប្រទេសនាំចេញសម្លៀកបំពាក់ និងស្បែកជើងដ៏សំខាន់ទៅកាន់អាម៉េរិកនោះ ត្រូវបានរងការវាយប្រហារដោយពន្ធគយ ៤៩ភាគរយ ដោយប្រធានាធិបតីអាម៉េរិក លោក ដូណាល់ ត្រាំ ។ នេះជាអត្រាខ្ពស់បំផុតមួយនៅទូទាំងពិភពលោក មុនពេលពន្ធភាគច្រើនត្រូវបានផ្អាករហូតដល់ខែកក្កដា ឆ្នាំ២០២៥។
កម្ពុជា ជាដៃគូជិតស្និទ្ធរបស់ចិន ដែលបានបណ្តាក់ទុនរាប់ពាន់លានដុល្លារក្នុងគម្រោងនានា រួមទាំងផ្លូវថ្នល់ និងអាកាសយានដ្ឋាន ហើយក៏ជាម្ចាស់បំណុលធំជាងគេរបស់ប្រទេសកម្ពុជាផងដែរ។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុកម្ពុជា បានប្រាប់សារព័ត៌មាន Reuters នៅមុនថ្ងៃការមកដល់របស់ប្រធានាធិបតីចិន លោក ស៊ី ជិនភីង នៅទីក្រុងភ្នំពេញថា៖« យើងរំពឹងថានឹងមានកិច្ចសហប្រតិបត្តិការបន្ថែមទៀត រួមទាំងការអភិវឌ្ឍហេដ្ឋារចនាសម្ព័ន្ធផងដែរ»។
ជុំវិញការរំពឹងថាទីក្រុងប៉េកាំង នឹងប្រកាសការគាំទ្រផ្នែកហិរញ្ញវត្ថុសម្រាប់ព្រែកជីកហ្វូណនតេជោ ១៨០គីឡូម៉ែត្រ ដែលជាគម្រោងហេដ្ឋារចនាសម្ព័ន្ធដែលធំបំផុត រដ្ឋាភិបាលកម្ពុជា ធ្លាប់អះអាងថា ចិននឹងជួយសាងសង់ព្រែកជីកនេះ។
យ៉ាងណាមិញ រហូតមកដល់ពេលនេះ ចិនមិនបានធ្វើការប្តេជ្ញាចិត្តផ្នែកហិរញ្ញវត្ថុសាធារណៈលើគម្រោងនេះទេ ខណៈទីក្រុងភ្នំពេញបានផ្លាស់ប្តូររបាយការណ៍របស់ខ្លួនស្តីពីការចូលរួមរបស់ចិនពី ១០០ភាគរយទៅ ៤៩ភាគរយនៃការចំណាយសរុប ដែលប៉ាន់ស្មានថាមានចំនួន ១,៧ពាន់លានដុល្លារអាមេរិក ជិត៤ភាគរយនៃផលិតផលក្នុងស្រុកសរុបប្រចាំឆ្នាំរបស់កម្ពុជា។
ដំណើរទស្សនកិច្ចរបស់លោក ស៊ី មកកាន់កម្ពុជា គឺជាផ្នែកមួយនៃការធ្វើដំណើរដែលបានគ្រោងទុកជាយូរមកហើយ ត្រូវបានគេមើលឃើញថាជា ការទាក់ទាញប្រជាប្រិយមួយនៅក្នុងតំបន់អាស៊ីអាគ្នេយ៍ ដែលជាតំបន់មួយក្នុងចំណោមតំបន់ដែលរងគ្រោះខ្លាំងបំផុតដោយពន្ធគយរបស់អាម៉េរិក។ មុនមកកម្ពុជា លោក ស៊ី ធ្វើទស្សនកិច្ចនៅម៉ាឡេស៊ី និងវៀតណាម ដែលនិន្នាការប្រឆាំងនឹងគម្រោងព្រែកជីកហ្វូណនតេជោ។
យោងតាម Reuters ដែលទទួលទិន្នន័យផ្លូវការរបស់រដ្ឋាភិបាលកម្ពុជា ទីក្រុងប៉េកាំងមិនបានចុះហត្ថលេខាលើប្រាក់កម្ចីថ្មីដល់កម្ពុជាក្នុងឆ្នាំ២០២៤ នោះទេ ពោលគឺផ្ទុយស្រឡះពីឆ្នាំមុនៗដែលខ្លួនផ្តល់ប្រាក់កម្ចីដល់ប្រទេសរាប់រយលានដុល្លារ។ ការធ្លាក់ចុះនៃការផ្តល់មូលនិធិបានកើតឡើងនៅពេលចិនបានកាត់បន្ថយការវិនិយោគនៅបរទេសជារួម ស្របពេលមានវិបត្តិសេដ្ឋកិច្ចក្នុងស្រុក។
កម្ពុជា និងចិន តែងតែអះអាងថាជាមិត្តដែកថែប ទោះបីជាមានភាពតានតឹងនាពេលថ្មីៗនេះលើមជ្ឈមណ្ឌលឆបោកនៅកម្ពុជា ដែលមួយចំនួនត្រូវបានគ្រប់គ្រងដោយជនជាតិចិន។ កាលពីដើមខែមេសា ប្រទេសទាំងពីរបានធ្វើសមយុទ្ធយោធារួមនៅ មូលដ្ឋានទ័ពជើងទឹករាម ដែលជាកន្លែងអាម៉េរិកបារម្ភអាចនឹងក្លាយជាមូលដ្ឋានយោធារបស់ចិន៕
© រក្សាសិទ្ធិដោយ thmeythmey.com
Tag:
.gif)