.jpg)
.jpg)
លោក ស៊ី ចាត់ទុកកម្ពុជាថាជា«ផ្ទះរបស់មិត្តល្អម្នាក់»
- ថ្ងៃព្រហស្បតិ៍ ទី១៧ ខែមេសា ឆ្នាំ២០២៥ ម៉ោង ១១:៤០ នាទី ព្រឹក
ព្រះបាទសម្តេចព្រះបរមនាថ នរោត្តម សីហមុនី ជាមួយនិងប្រធានាធិបតី ចិន លោក ស៊ី ជិនភីង អំឡុងឆ្នាំ២០២៣។ រូបភាព ៖ Xinhua
ប្រធានាធិបតីចិនលោក ស៊ី ជិនភីង នឹងធ្វើទស្សនកិច្ចផ្លូវរដ្ឋនៅកម្ពុជារយៈពេល ២ថ្ងៃ គឺនថ្ងៃទី១៧-១៨ ខែមេសា។ នៅក្នុងសេចក្តីប្រកាសរបស់ក្រសួងការបរទេសចិន លោក ស៊ី ចាត់ទុកកម្ពុជាថាជា«ផ្ទះរបស់មិត្តល្អម្នាក់»។ លោករំពឹងថា ដំណើរទស្សនៈកិច្ចនេះនឹងនាំវឌ្ឍនភាពក្នុងការកសាងសហគមន៍ចិន-កម្ពុជា ជាមួយនឹងអនាគតរួមគ្នា។
ក្នុងដំណើរទស្សនកិច្ចជាលើកទី២ នៅកម្ពុជា ក្រោយរយៈពេល ៩ឆ្នាំ លោក ស៊ី ជិនភីង បានអរគុណចំពោះភាពជិតស្និតរបស់កម្ពុជា និងការផ្លាស់ប្តូរមិត្តភាពដែលមានរយៈពេលពីរសហស្សវត្សនៃប្រវត្តិសាស្រ្តរវាងប្រទេសទាំងពីរ។
«ខ្ញុំរីករាយណាស់ដែលបានមកលេងប្រទេសកម្ពុជាក្នុងឱកាសបុណ្យចូលឆ្នាំខ្មែរ។ សម្រាប់ខ្ញុំ វាមានអារម្មណ៍ថាទៅផ្ទះរបស់មិត្តល្អម្នាក់។ ខ្ញុំសូមជូនពរចូលឆ្នាំថ្មីយ៉ាងកក់ក្ដៅបំផុតចំពោះបងប្អូនក្នុងប្រទេសកម្ពុជា»។ លោក ស៊ី បានបញ្ជាក់បែបនេះនៅក្នុងសេចក្តីប្រកាសរបស់ក្រសួងការបរទេសចិននៅថ្ងៃទី១៧ ខែមេសា។
ជាច្រើនឆ្នាំមកនេះ ចិនជាដៃគូពាណិជ្ជកម្មដ៏ធំបំផុតរបស់កម្ពុជា និងជាប្រភពនៃការវិនិយោគដ៏ធំបំផុត ហើយកិច្ចសហប្រតិបត្តិការឧស្សាហកម្ម និងច្រវាក់ផ្គត់ផ្គង់របស់ចិន។ ដោយសារកិច្ចព្រមព្រៀងពាណិជ្ជកម្មសេរីចិន-កម្ពុជា ផលិតផលកសិកម្មលំដាប់ថ្នាក់ខ្ពស់ពីកម្ពុជា រួមមាន ចេក ស្វាយ និងមៀន កំពុងស្វែងរកផ្លូវចូលទៅប្រទេសចិន។ តំបន់សេដ្ឋកិច្ចពិសេសក្រុងព្រះសីហនុ ដែលត្រូវបានអភិវឌ្ឍតាមរយៈកិច្ចសហប្រតិបត្តិការចិន-កម្ពុជា បានទាក់ទាញក្រុមហ៊ុនអន្តរជាតិជាង ២០០ មកបង្កើតប្រតិបត្តិការ ដោយដាក់មូលដ្ឋានរឹងមាំសម្រាប់ទំនើបកម្មឧស្សាហកម្មរបស់កម្ពុជា។
បន្ថែមពីនេះ គម្រោងហេដ្ឋារចនាសម្ព័ន្ធដែលគាំទ្រដោយប្រទេសចិន ដូចជាផ្លូវល្បឿនលឿនទីមួយរបស់កម្ពុជា រោងចក្រថាមពលដ៏ធំ និងពហុកីឡដ្ឋានធំជាងគេ បាននាំមកជូនប្រជាជនកម្ពុជានូវអត្ថប្រយោជន៍ជាក់ស្តែង និងជំរុញយ៉ាងខ្លាំងដល់ការអភិវឌ្ឍន៍ប្រទេសរយៈពេលវែង។ អ្នកជំនាញចិន បានជួយបង្កើតផែនការអភិវឌ្ឍន៍កសិកម្មទំនើបរបស់ប្រទេសកម្ពុជាដោយឈរលើមូលដ្ឋាននៃការធ្វើទស្សនកិច្ចសិក្សាយ៉ាងទូលំទូលាយក្នុងប្រទេស។ កិច្ចសហប្រតិបត្តិការ Diamond Hexagon ចិន-កម្ពុជា បានជំរុញការអភិវឌ្ឍន៍របស់កម្ពុជា។ នេះបើតាមសេចក្តីប្រកាសរបស់ក្រសួងការបរទេសចិននៅថ្ងៃទី១៧ ខែមេសា។
គិតត្រឹមឆ្នាំ ២០២៥ ទំនាក់ទំនងការទូតរវាងកម្ពុជា និងចិនមានរយៈពេល ៦៧ឆ្នាំ។ ទំហំពាណិជ្ជកម្មរវាងប្រទេសទាំងពីរក្នុងរយៈពេល៣ខែឆ្នាំនេះមាន ៤,០៦៨ លានដុល្លារ កើន២៦,៧ ភាគរយធៀបនឹងឆ្នាំមុន។ ក្នុងរយៈពេល៥ឆ្នាំចុងក្រោយនេះ ទំហំពាណិជ្ជកម្មរវាងប្រទេសទាំងពីរ គឺមានកំណើនកាន់តែល្អប្រសើរ ដោយកើនជាង៧០០០លានដុល្លារ ក្នុងឆ្នាំ២០២០ ឡើងដល់ជាង១៥ ០០០លានដុល្លារក្នុងឆ្នាំ២០២៤៕
© រក្សាសិទ្ធិដោយ thmeythmey.com
Tag:
.gif)