.jpg)
.jpg)
ចិន សរសើរកម្ពុជាលើកិច្ចខិតខំទប់ស្កាត់ការឆបោកតាមប្រព័ន្ធបច្ចេកវិទ្យា
- ថ្ងៃសុក្រ ទី១៨ ខែមេសា ឆ្នាំ២០២៥ ម៉ោង ១១:៣០ នាទី ព្រឹក
រូបភាព STPM
ចិន បានកោតសរសើរកម្ពុជា លើកិច្ចខិតខំប្រឹងប្រែងក្នុងការទប់ស្កាត់ការឆបោកតាមប្រព័ន្ធបច្ចេកវិទ្យា។ សេចក្តីប្រកាសរបស់ក្រសួងការបរទេសកម្ពុជា បានចេញផ្សាយបែបនេះ នៅថ្ងៃទី១៨ ខែមេសា។ ទន្ទឹមនេះ ចិន នឹងបន្តពង្រឹងកិច្ចសហប្រតិបត្តិការជាមួយកម្ពុជាលើការទប់ស្កាត់ឧក្រិដ្ឋកម្មឆ្លងព្រំដែន លែ្បងឆ្លងដែនខុសច្បាប់ និងការជួញដូរគ្រឿងញៀនផងដែរ។
អត្ថបទទាក់ទង
មួយរយៈចុងក្រោយ កម្ពុជា បានដាក់ចេញវិធានការជាច្រើន ដើម្បីបង្រ្កាបការឆបោកតាមប្រព័ន្ធបច្ចេកវិទ្យា និងឧក្រិដ្ឋកម្មផ្សេងៗ។ នៅក្នុងខែកុម្ភៈ កន្លងមក កម្ពុជា បានបង្កើតគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាថែមទៀត ដើម្បីទប់ស្កាត់បទល្មើសនៅក្នុងប្រទេស។
ជុំវិញសកម្មភាពរបស់រដ្ឋាភិបាលកម្ពុជាបែបនេះ មេដឹកនាំចិន លោក ស៊ី ជិនភីង បានសរសើរកម្ពុជា លើការប្រឹងប្រែង ដើម្បីទប់ស្កាត់ការឆបោកតាមប្រព័ន្ធបច្ចេកវិទ្យា។
«ភាគីចិន បានកោតសរសើរកិច្ចខិតខំប្រឹងប្រែងរបស់កម្ពុជា ក្នុងការបង្រ្កាបល្បែងស៊ីសងតាមប្រព័ន្ធអ៊ីនធឺណិតខុសច្បាប់ និងការឆបោកតាមប្រព័ន្ធបច្ចេកវិទ្យា»។ សេចក្តីប្រកាសរបស់ក្រសួងការបរទេសកម្ពុជា ជុំវិញដំណើរទស្សនកិច្ចរបស់លោក ស៊ី ជិនភីង ប្រធានាធិបតីចិន បានបញ្ជាក់បែបនេះ នៅថ្ងៃទី១៨ ខែមេសា។
តាមសេចក្តីប្រកាសនោះ ភាគីចិន បានប្តេជ្ញាពង្រឹងកិច្ចសហប្រតិបត្តិការជាមួយកម្ពុជា ដើម្បីអនុវត្តច្បាប់ និងបង្រ្កាបឧក្រិដ្ឋកម្មឆ្លងព្រំដែន, ល្បែងឆ្លងដែនខុសច្បាប់, ការជួញដូរគ្រឿងញៀន, ការរត់ពន្ធមនុស្ស និងការក្លែងបន្លំ៕
© រក្សាសិទ្ធិដោយ thmeythmey.com
Tag:
