.jpg)
.jpg)
សោកស្ដាយ! ផ្សោតពណ៌ផ្កាឈូក១ក្បាលត្រូវបានប្រទះឃើញងាប់ នៅដែនសមុទ្រខេត្តកំពត
- ថ្ងៃសុក្រ ទី១៨ ខែមេសា ឆ្នាំ២០២៥ ម៉ោង ១:០០ នាទី រសៀល
រូបភាព៖ ហ្វេសប៊ុក «ផែសមុទ្រ PheSamout Camping»
ភ្នំពេញ៖ ផ្សោតឃ្លាចពណ៌ផ្កាឈូកឈ្មោល ១ក្បាល ត្រូវបានអ្នកនេសាទ ប្រទះឃើញងាប់អណ្ដែតនៅកណ្ដាលសមុទ្រ ស្ថិតក្នុងភូមិសាស្រ្តខេត្តកំពត។ នេះបើតាមព័ត៌មានដែលទទួលបានពី លោក លី ធារិទ្ធ ពលរដ្ឋរស់នៅក្នុងតំបន់។
លោក លី ធារិទ្ធ បានបញ្ជាក់នៅថ្ងៃទី១៨ ខែមេសានេះថា ផ្សោតដែលងាប់នេះមានទម្ងន់ប្រហែល ៥០គីឡូក្រាម និងប្រវែង១,៩៨ម៉ែត្រ។ សត្វដ៏កម្រនេះ បានងាប់នៅកណ្ដាលសមុទ្រ ហើយត្រូវបានប្រជានេសាទប្រទះឃើញ និងបានអូសយកមកទុកនៅជិតឆ្នេរដូង ស្ថិតក្នុងភូមិសាស្រ្តសង្កាត់ត្រើយកោះ ក្រុងកំពត ខេត្តកំពត កាលពីថ្ងៃទី១៧ ខែមេសា។
មកទល់ពេលនេះ គេមិនទាន់អាចសន្និដ្ឋានថា វាងាប់ដោយសារអ្វីនោះទេ ប៉ុន្តែសាកសពរបស់វា ត្រូវបានមន្រ្តីជំនាញនៃរដ្ឋបាលជលផល កប់ចោលរួចហើយ។ ទន្ទឹមនោះ ពួកគេក៏បានយកសំណាក ដើម្បីធ្វើកោសល្យវិច័យ រកមូលហេតុនៃការងាប់ផងដែរ។ នេះបើតាម លោក លី ធារិទ្ធ ដោយលោកបញ្ជាក់ដូច្នេះថា៖« មកទល់ពេលនេះ គេអត់ទាន់ដឹងថាងាប់ដោយសាអ្វីទេ ព្រោះគាត់ (មន្រ្តីជំនាញរដ្ឋបាលជលផល) ទើបតែមកយកសំណាក ដើម្បីកោសល្យវិច័យ រកមូលហេតុ។ ផ្សោតនេះ គេបានយកទៅកប់រួចហើយ តាំងពីថ្ងៃទី១៧ មេសាម្ល៉េះ។»។
ផ្សោតពណ៌ផ្កាឈូក ជាប្រភេទមានដោយកម្រ និងបានចុះបញ្ជីក្រហម IUCN។ តំបន់សមុទ្រក្នុងភូមិសាស្រ្តខេត្តកំពត មានផ្សោតឃ្លាចពណ៌ផ្កាឈូកប្រហែល ៤០ទៅ ៤៦ក្បាល។ លោក ចាន់ រិទ្ធី ប្រធានមន្ទីរកសិកម្ម រុក្ខាប្រមាញ់ និងនេសាទ បញ្ជាក់ប្រាប់សារព័ត៌មានឌីជលថ្មីៗ កាលពីឆ្នាំ២០២៣៕
© រក្សាសិទ្ធិដោយ thmeythmey.com
Tag:
