ព្រះខ័នរាជស្វាយរៀង ​មានឱកាសកាន់តែច្រើន សម្រាប់ការឈ្នះជើងឯកលីគកំពូលកម្ពុជា រដូវកាល២០២៤-២០២៥ ដោយសារតែពិន្ទុខ្ពស់ជាងគេ និងមានតែក្រុមភ្នំពេញក្រោន មួយ​ប៉ុណ្ណោះ ដែលកំពុងប្រដេញពិន្ទុយ៉ាងប្រកៀកប្រកិត។ ចំណែកក្តីសង្ឃឹម​ប្រជែងជើងឯក​លីគ​ រដូវកាលនេះ សម្រាប់ វិសាខា កាន់តែស្តើង បន្ទាប់ពីចាញ់ភ្នំពេញក្រោន លទ្ធផល ១-០ កាលពីថ្ងៃទី១៩ ខែមេសា ឆ្នាំ២០២៥ នៅកីឡដ្ឋាន Smart RSN។

ការប្រកួតលីគ រដូវកាល២០២៤-២០២៥ នៅសល់តែ ៤ប្រកួតទៀតប៉ុណ្ណោះ។ ក្នុងចំណោម ១១​ក្រុម មាន៣ក្រុម ដែល​មានឱកាសប្រជែងយកជើងឯក ក្នុងនោះព្រះខ័នរាជស្វាយ​រៀង មាន ៦៧ពិន្ទុ តាមពីក្រោយដោយភ្នំពេញក្រោន ៦៣ពិន្ទុ ខណៈ វិសាខា មានត្រឹមតែ​៥៩​ពិន្ទុ​។

ក្នុងករណី ដែលវិសាខា ចាញ់ប្រកួតណាមួយក្នុងចំណោម ៤ប្រកួតនោះ ឬក៏ព្រះខ័ន​រាជ​ស្វាយរៀង ឈ្នះ ២ប្រកួតបន្ថែមទៀត វិសាខា នឹងអស់ឱកាសប្រជែងជើងឯកលីគ ដោយ​សារតែគម្លាតពិន្ទុនៅឆ្ងាយពេក។

ការប្រកួតរវាងភ្នំពេញក្រោន និង វិសាខា រូបពី Cambodian Premier League

រីឯភ្នំពេញក្រោន ក្រុមនេះ កំពុងប្រដេញពីក្រោយយ៉ាងប្រកៀកប្រកិតជាមួយ ព្រះខ័នរាជ​ស្វាយរៀង ដោយចាញ់តែ ៤ពិន្ទុប៉ុណ្ណោះ។ ក្នុងសប្ដាហ៍ទី២៨ នៃពានរង្វាន់ Cambodian Premier League នាថ្ងៃទី១៩ មេសា ភ្នំពេញក្រោន បានយកឈ្នះ វិសាខា លទ្ធផល ១-០ នៅកីឡដ្ឋាន Smart RSN។ ជោគជ័យនេះ ធ្វើឲ្យភ្នំពេញក្រោន នៅតែមានឱកាសច្រើន​ប្រ​ជែងជើងឯក ខណៈ វិសាខា កាន់តែអស់សង្ឃឹម និងគ្រាន់តែអាចសម្លឹងរកជើងឯករង ឬ​ចំណាត់ថ្នាក់លេខ៣ វិញ។

ចំណែក ព្រះខ័នរាជស្វាយរៀង ក្រុមនេះក៏មិនប្រហែសដែរ។ លោក Pep Munoz គ្រូ​បង្វឹក​ព្រះខ័នរាជស្វាយរៀង យកចិត្តទុកដាក់ខ្លាំង ចំពោះ ៤ប្រកួតដែលនៅសល់ក្នុងលីគ ជាខ្លាំង ទោះបីជាក្រុមមមាញឹកក្នុងការប្រកួតអន្ដរជាតិ និងពានរង្វាន់សំខាន់ៗ ផ្សេងទៀតក៏ដោយ​។ ក្នុងសប្ដាហ៍ទី២៨ នៃលីគកំពូលកម្ពុជា នាថ្ងៃទី២០ មេសា ព្រះខ័នរាជស្វាយរៀង បាន​យកឈ្នះ លើក្រុមបឹងកេត នៅពហុកីឡដ្ឋានជាតិអូឡាំពិក លទ្ធផល ១-០។ 

កែវ សុខសិលា អ្នកចាំទីវិសាខា រូបពី Cambodian Premier League

ក្នុងសប្ដាហ៍ដដែលនេះ គិរីវង់សុខសែនជ័យ បានយកឈ្នះលើ សមាគមបាល់ទាត់ក្រសួង​មហាផ្ទៃ លទ្ធផល២-១ នៅកីឡដ្ឋានគិរីវង់។ ចំណែក ក្រុមដែលមានទីតាំងនៅខេត្ត​សៀម​​រាប អង្គរថាយហ្គឺរ បានចាញ់ណាហ្គាវើលដ៍ លទ្ធផល ១-០ នៅកីឡដ្ឋាន Akihiro Kato។ រីឯ​ក្រុមកងយោធពលខេមរភូមិន្ទ​ ក្រុមទ័ពនេះ បានឈ្នះលើ ឡាយហ្វ ព្រះសីហនុ លទ្ធផល១-០ នៅកីឡដ្ឋានស្ដាតចាស់។

គួរបញ្ជាក់​​ថា គិតត្រឹមសប្ដាហ៍ទី២៨ ព្រះខ័នរាជស្វាយរៀង ឈរនៅចំណាត់ថ្នាក់លេខ១​ មាន៦៧ពិន្ទុ។ រីឯភ្នំពេញក្រោន ចំណាត់ថ្នាក់លេខ២ មាន ៦៣ពិន្ទុ តាមពីក្រោយដោយ វិ​សា​​ខា មាន៥៩ពិន្ទុ ចំណាត់ថ្នាក់លេខ៣។ រីឯក្រុមលេខ៤ អង្គរថាយហ្គឺរ មាន៤០ពិន្ទុ ស្មើ​គ្នាជាមួយណាហ្គាវើលដ៍ ដែលនៅចំណាត់ថ្នាក់លេខ៥។ បឹងកេត នៅចំណាត់ថ្នាក់លេខ៦ មាន៣៤ពិន្ទុ តាមពីក្រោយដោយ អាយ អេស អាយ ដង្កោសែនជ័យ លេខ៧ មាន ៣៣​​ពិន្ទុ។

កងយោធពលខេមរភូមិន្ទ ឈរចំណាត់ថ្នាក់លេខ៨ មាន ២៨ពិន្ទុ និងលេខ៩ គិរីវង់សុខ​សែនជ័យ មាន១៨ពិន្ទុ។ ចំណែកឡាយហព្រះសីហនុ នៅចំណាត់ថ្នាក់លេខ១០ មាន​១៦​ពិន្ទុ ខណៈសមាគមបាល់ទាត់ក្រសួងមហាផ្ទៃ នៅបាតតារាង មាន៥ពិន្ទុ៕

ការប្រកួតរវាងវិសាខា និងភ្នំពេញក្រោន រូបពី Cambodian Premier League