.jpg)
.jpg)
ពលរដ្ឋគាំទ្រ លោក យូន ស៊ុកយោល ទម្លាក់កំហុសលើចិនថានាំឲ្យកូរ៉េខាងត្បូងចលាចល
- ថ្ងៃចន្ទ ទី២១ ខែមេសា ឆ្នាំ២០២៥ ម៉ោង ៣:២៩ នាទី រសៀល
នៅប្រទេសកូរ៉េខាងត្បូង មនោសញ្ចេតនាស្អប់ខ្ពើមជនជាតិចិន កាន់តែពុះកញ្ច្រោល ជាពិសេស ក្នុងចំណោមបណ្តាអ្នកគាំទ្រប្រធានាធិបតីធ្លាក់ពីតំណែង លោក យូន ស៊ុកយោល។ ក្រៅពីចោទប្រកាន់ថាចិនជាប្រភពនៃភាពចលាចលនៅក្នុងស្រុក អ្នកទាំងនោះបានសម្តែងសកម្មភាពហិង្សា និងគំរាមឲ្យពលរដ្ឋចិនចាកចេញពីកូរ៉េខាងត្បូង ទៀតផង។
«ពួកជនជាតិចិន និងពួកក្រហមកុម្មុយនិស្ត ត្រូវប្រាសព្រាត់ចេញទៅ» ជាសម្រែករបស់ក្រុមពលរដ្ឋកូរ៉េខាងត្បូង ដែលជាអ្នកនិយមគាំទ្រគណបក្សអភិរក្សនិយម របស់លោក យូន ស៊ុកយោល អតីតប្រធានាធិបតីដែលទើបតែធ្លាក់ពីតំណែង ពេលថ្មីៗ។ សម្រែកនិងពាក្យសម្តីហិង្សាបណ្តេញជនជាតិចិន បានបង្ហើរចេញមកពីបាតុករនិស្សិតមួយក្រុម ដែលជាអ្នកគាំទ្រលោក យូន ស៊ុកយោល យ៉ាងផ្កាប់មុខ។
មនោសញ្ចេតនាស្អប់ខ្ពើមជនជាតិចិន កាន់តែពុះកញ្ច្រោលក៏ព្រោះតែមានការជំរុញជាខ្លាំងពីសំណាក់គណបក្សអភិរក្សនិយម ដែលតែងតែថ្លែងវោហារសាស្ត្រនយោបាយទម្លាក់កំហុសទៅលើរដ្ឋអំណាចចិនកុម្មុយនិស្ត។
ចំពោះពួកគេទាំងនោះដែលជាអ្នកគាំទ្រលោក យោន ស៊ុកយោល, រដ្ឋាភិបាលក្រុងប៉េកាំងជាប្រភពនៃវិបត្តិនយោបាយក្នុងប្រទេសកូរ៉េខាងត្បូង ពោលគឺទាំងភាពចលាចលក្នុងផ្ទៃប្រទេសកូរ៉េខាងត្បូង ចាប់តាំងពីខែធ្នូ ឆ្នាំ២០២៤រហូតមក រួមទាំងការជំរុញលោក យូន ស៊ុកយោល ឲ្យជ្រុះពីកៅអីប្រធានាធិបតី ពីពេលថ្មីៗនេះទៀត គឺជាកំហុសនិងជាស្នាដៃរបស់ចិនទាំងស្រុង ហើយរដ្ឋអំណាចក្រុងប៉េកាំង ជាអ្នកដឹកមុខពីក្រោយភាពរញ៉េរញ៉ៃក្នុងសង្គមកូរ៉េ។ ដោយសារតែយល់ឃើញបែបនេះ ទើបពួកគេទាំងនោះ ធ្វើបាតុកម្មនៅក្រុងស៊េអូល ត្រង់ទីប្រជុំជនដែលមានជនជាតិចិនរស់នៅច្រើន និងនៅតាមសង្កាត់ដែលមានហាងភោជនីយដ្ឋានចិនច្រើន។
ចលនាបាតុកម្មកាលពីចុងសប្តាហ៍ បណ្តាលឲ្យមានអំពើហិង្សា និងមានអ្នករងរបួសទៀតផង។ នេះបើតាមសេចក្តីរាយការណ៍របស់វិទ្យុបារាំង ដែលមានអ្នកឆ្លើយឆ្លងព័ត៌មានប្រចាំក្រុងសេអ៊ូល។
ប្រឈមនឹងសកម្មភាពហិង្សានេះ សហគមន៍ចិននៅកូរ៉េខាងត្បូង កាន់តែព្រួយបារម្ភពីសុវត្ថិភាព។ ឯកអគ្គរដ្ឋទូតចិនប្រចាំកូរ៉េខាងត្បូង បានសម្តែងក្តីព្រួយបារម្ភជាពន់ពេកចំពោះការកើនឡើងមនោសញ្ចេតនាស្អប់ចិន នៅក្នុងស្រុកកូរ៉េខាងត្បូង។ លោកទូតចិនប្រចាំសេអ៊ូល ក៏បានអំពាវនាវឲ្យពលរដ្ឋចិន ត្រូវជៀសឲ្យឆ្ងាយៗពីក្រុមបាតុករទាំងនោះ។
ជាការគួរឲ្យកត់សម្គាល់ កាលពីខែកុម្ភៈកន្លងទៅ មានបុរសម្នាក់ដែលជាអ្នកគាំទ្រលោក យូន ស៊ុកយោល បានព្យាយាមជម្នះសម្រុករត់ចូលស្ថានទូតចិននៅសេអ៊ូល។ ក្រោយហេតុការណ៍នេះ អាជ្ញាធរកូរ៉េខាងត្បូង បានប្រកាសពង្រឹងសន្តិសុខបន្ថែមទៀត នៅបណ្តាសង្កាត់និងទីប្រជុំជនដែលសម្បូរជនជាតិចិនរស់នៅ ដ្បិតថា ប្រជាជនចិនអាចនឹងក្លាយជាជនរងគ្រោះព្រោះអំពើហិង្សាផ្សេងៗ៕
ដោយ៖ ហេង ឧត្តម (RFI ខេមរភាសា)
© រក្សាសិទ្ធិដោយ thmeythmey.com
