ដោយឃើញប្រទេសឧស្សាហកម្មធំៗ​ ចាប់ផ្តើមដង្ហែគ្នា​ទៅចរចា សុំ​ការអនុគ្រោះពន្ធ​ពី​រដ្ឋបាលលោកដូណាល់ ត្រាំ ប្រទេស​ចិន តាមរយៈ​អ្នកនាំពាក្យ​របស់​ក្រសួងការបរទេស​កាលពីថ្ងៃចន្ទ បាន​ចេញសេចក្តីព្រមាន ដាស់តឿន​កុំ​ឲ្យ​ប្រទេស​ទាំងនោះ​ប្រមាថ សុខចិត្ត​កាត់បន្ថយ​ទំនាក់ទំនងពាណិជ្ជកម្មជាមួយចិន ដើម្បី​បាន​ទទួល​ការអនុគ្រោះពន្ធ​ពី​រដ្ឋបាល​អាមេរិក។ ពាក្យព្រមានរបស់ចិន ធ្វើឡើង​នៅ​ខណៈពេល កូរ៉េខាងត្បូង​បញ្ជូន​រដ្ឋមន្រ្តីពាណិជ្ជកម្ម​ទៅចរចា​ជាមួយភាគីអាមេរិក​នៅ​រដ្ឋធានីវ៉ាស៊ីនតោន ចំណែក អនុប្រធានាធិបតីអាមេរិក​កំពុងធ្វើដំណើរ​ទស្សនកិច្ច​នៅ​ទីក្រុង​ញូវដេលី​នៅថ្ងៃនេះ ដោយ​ផ្តោតលើ​ការចរចា​ពាណិជ្ជកម្មជាមួយ​ប្រទេស​យក្សអាស៊ីមួយនេះ។

បន្ទាប់ពីរដ្ឋមន្ត្រីពាណិជ្ជកម្មជប៉ុន​ធ្វើដំណើរ​ទៅវ៉ាស៊ីនតោន​ដើម្បីចរចា​ស្នើសុំ​ឲ្យ​រដ្ឋបាលអាមេរិកផ្លាស់ប្តូរជំហរ នៅក្នុង​រឿង​ដាក់ពន្ធធ្ងន់ លើ​ទំនិញនាំចូលទៅអាមេរិក ដល់​វេន​កូរ៉េខាងត្បូង​ដែលត្រូវ​បញ្ជូន​រដ្ឋមន្រ្តីសំខាន់ពីររូបទៅ​ជួបចរចាទ្វេភាគីជាមួយ​រដ្ឋបាលលោកដូណាល់ ត្រាំ។ យោងតាម​ការប្រកាស​របស់​ប្រធានាធិបតីស្តីទីរបស់កូរ៉េខាងត្បូង ហាន ដុកសូ នៅថ្ងៃចន្ទ​ទី​២១​មេសា រដ្ឋមន្រ្តីហិរញ្ញវត្ថុ និង​រដ្ឋមន្រ្តី​ទទួលបន្ទុកពាណិជ្ជកម្ម ឧស្សាហកម្មនឹង​ធ្វើដំណើរទៅ​រដ្ឋធានីវ៉ាស៊ីនតោន​នៅសប្តាហ៍នេះ ដើម្បី​បើកចរចា ព្រោះថា ការដំឡើងពន្ធ​២៥%​របស់​រដ្ឋបាលលោកដូណាល់ ត្រាំ​នឹង​ប៉ះពាល់​ខ្លាំង​ដល់​ឧស្សាហកម្ម​ផលិតរថយន្ត និង​សឺមីកុងឌុចទ័រ ដែល​កូរ៉េខាងត្បូង ត្រូវនាំចូលទៅ​ទឹកដីអាមេរិក។

បើតាម​ប្រធានាធិបតីស្តីទី​របស់​កូរ៉េខាងត្បូង ការពិភាក្សា​រវាងភាគីទាំងពីរ​នឹង​ផ្តោត​លើ​ជញ្ជីងពាណិជ្ជកម្ម ការសាងសង់​កប៉ាល់ និង​ឧស្ម័នធម្មជាតិរាវ។ នៅ​ខែ​មីនាមុន ពោលគឺនៅបន្ទាប់ពីប្រកាស​ដំឡើងពន្ធ​លើ​ទំនិញ​នាំចូល​ពី​គ្រប់ប្រទេស ដោយមិនលើកលែង សូម្បីប្រទេស​សម្ព័ន្ធមិត្ត លោកដូណាល់ ត្រាំ​ដែល​ចង់​ប្រើវិធានការដំឡើង​ពន្ធ​ដើម្បី​ទាក់ទាញ​ក្រុមហ៊ុន​បរទេស​ឲ្យត្រលប់មក​បោះទុនវិនិយោគ និង​បង្កើតទីតាំងរោងចក្រ​នៅទឹកដីអាមេរិក ធ្លាប់បានអះអាងថា ជប៉ុន ហើយនិង​កូរ៉េខាងត្បូង បាន​យល់ព្រម​វិនិយោគ​លើ​អាជីវកម្មបូមឧស្ម័ន​នៅ​រដ្ឋអាឡាស្កា ដែលជា​គម្រោង​ដ៏ធំមហិមា។

ក្រៅជប៉ុន កូរ៉េខាងត្បូង រដ្ឋបាលលោកដូណាល់ ត្រាំ​បាន​អួតថា នៅមានប្រទេស​ជាច្រើនដែលបាន​បន្តកន្ទុយគ្នា​ទាក់ទង សុំចរចា ដើម្បី​អាច​ជៀសផុត​ពី​ការដំឡើងពន្ធ​ធ្ងន់ ក របស់អាមេរិក។ នៅសប្តាហ៍មុននេះ លោកដូណាល់ ត្រាំ​បានទទួល​នាយករដ្ឋមន្រ្តីអ៊ីតាលី នៅ​សេតវិមាន។ 

កាលពីថ្ងៃចន្ទ លោកអនុប្រធានាធិបតី​អាមេរិក JD Vance ផ្តើមទស្សនកិច្ច​រយៈពេល៤ថ្ងៃ​នៅប្រទេស​ឥណ្ឌា ដោយផ្តោតលើទំនាក់ទំនងពាណិជ្ជកម្ម​រវាង​ប្រទេស​ទាំងពីរ។ គួរដឹងថា អាមេរិក​ជា​ដៃគូពាណិជ្ជកម្ម​ធំជាងគេ​របស់ឥណ្ឌា ជាមួយការដោះដូរពាណិជ្ជកម្ម​ក្នុងទំហំទឹកប្រាក់ ១២៩ពាន់លាន​ដុល្លារ នៅ​ឆ្នាំ ២០២៤។ ប៉ុន្តែ យោងតាម​ទិន្នន័យ​របស់​រដ្ឋាភិបាលអាមេរិក អាមេរិកមានអតិរេកពាណិជ្ជកម្ម​ជាមួយ​ឥណ្ឌា​ដល់ទៅជាង ៤៥ពាន់លាន​ដុល្លារ។ ញូវដេលី​សង្ឃឹម​យកពេល​៩០ថ្ងៃ​ដែល​លោកដូណាល់ ត្រាំ​ផ្អាក ព្យួរមិនទាន់អនុវត្តអត្រាពន្ធក្នុងកម្រិតមួយដ៏ខ្ពស់មិនធ្លាប់មាន ដើម្បីបើកការចរចា​ស្វែងរកកិច្ចព្រមព្រៀង​ពាណិជ្ជកម្ម​ថ្មី​ជាមួយ​អាមេរិក នៅក្នុងគោលដៅ​គេចផុតពី​រនាំងពន្ធធ្ងន់របស់អាមេរិក។

ចិនវិញ ដែលប្រកាស​ធ្វើសង្រ្គាមពាណិជ្ជកម្ម​រហូត ដល់ទីបញ្ចប់​ជាមួយ​អាមេរិក ជាមួយ​ការដំឡើង​ពន្ធសងសឹកគ្នាទៅវិញទៅមក ក្នុងកម្រិត ១២៥% បាន​បរិហាររិះគន់​បណ្តា​ប្រទេស​ដែលចុះញ៉ម យល់ព្រម​តាម​ការដាក់​លក្ខខណ្ឌ​របស់​រដ្ឋបាល លោក ដូណាល់ ត្រាំ ជាថ្នូរ​នឹង​ការបន្ធូរបន្ថយ​ពន្ធ​របស់​អាមេរិក។

នៅក្នុង​សេចក្តីប្រកាសព័ត៌មាន នៅថ្ងៃចន្ទដដែល អ្នកនាំពាក្យ​របស់ក្រសួងការបរទេស​ចិន​បាន​ព្រមានពីផលវិបាក ប្រសិនបើប្រទេសទាំងឡាយណា ​បើកការចរចា​ជាមួយអាមេរិក រហូត​ធ្វើ​ឲ្យប៉ះពាល់​ដល់​ផលប្រយោជន៍​របស់​ចិន។ ប៉េកាំង​ បាន​ចោទ​រដ្ឋបាលអាមេរិក​ថា ប្រើ​នយោបាយចរចាទ្វេភាគី ដើម្បីដាក់សម្ពាធ​ឲ្យ​គេ​ កាត់បន្ថយ​ការធ្វើជំនួញ​ជាមួយ​ប្រទេស​ចិន៕

ដោយ៖ ឈាង បុប្ផា (RFI ខេមរភាសា)