.jpg)
.jpg)
រដ្ឋបាលស្រុកពួក ជំរុញឱ្យនគរបាល រកយុត្តិធម៌ដល់ស្ត្រីដែលរងហិង្សានៅផ្ទះអភិបាលរងស្រុក
- ថ្ងៃអង្គារ ទី២២ ខែមេសា ឆ្នាំ២០២៥ ម៉ោង ៤:៥០ នាទី រសៀល
ភ្នំពេញ៖ រដ្ឋបាលស្រុកពួក អះអាងថា ករណីហិង្សាលើស្ត្រីម្នាក់ នៅគេហដ្ឋានអភិបាលរងស្រុកពួក អំឡុងពេលកម្មវិធីខួបកំណើត មិនជាប់ពាក់ព័ន្ធជាមួយអភិបាលរងស្រុកពួកឡើយ ហើយស្នើឱ្យមន្ត្រីនគរបាលចាត់វិធានការច្បាប់លើសំណុំរឿងនេះ ឱ្យបានឆាប់។
យោងតាមសេចក្ដីបំភ្លឺ របស់រដ្ឋបាលស្រុក ចេញថ្ងៃទី២១មេសា ករណីហិង្សាខាងលើ ផ្ដើមចេញពី ទំនាស់ពាក្យសម្ដីរឿងបាត់ស្រា រវាងមន្ត្រីយោធា និងស្ត្រីរងគ្រោះ។ មន្ត្រីយោធានោះ បានចោទស្ត្រីរងគ្រោះ ថាបានលួចស្រា ហើយក៏ឈានដល់ការប្រើប្រាស់ហិង្សា នៅផ្ទះអភិបាលរងស្រុកពួក អំឡុងពេលកម្មវិធីខួបកំណើតកូន។
ហេតុនេះ រដ្ឋបាលស្រុកពួក ចាត់ទុករឿងនេះ ជាវិវាទបុគ្គល ខណៈពេលកើតហេតុ អភិបាលរងស្រុកក៏មិននៅផ្ទះ។ ចំណែក ស្ត្រីរងគ្រោះ ក៏បានដាក់ពាក្យបណ្ដឹង នៅប៉ុស្តិ៍នគរបាលរដ្ឋបាលខ្នាត។
ពាក់ព័ន្ធនឹងករណីនេះ រដ្ឋបាលស្រុកពួកបានណែនាំបែបនេះ៖ «ជំរុញឱ្យអធិការដ្ឋាននគរបាលស្រុក និងប៉ុស្តិ៍នគរបាលរដ្ឋបាលខ្នាត បន្តនីតិវិធីករណីនេះ ឱ្យបានលឿនបំផុត»។
ជុំវិញករណីស្រាដប ដែលជាដើមចមនៃជម្លោះនោះ រដ្ឋបាលស្រុកពួក បញ្ជាក់ពីតម្លៃប្រមាណ១០ដុល្លារប៉ុណ្ណោះ មិនមែនតម្លៃរាប់ពាន់ដុល្លារនោះទេ៕
© រក្សាសិទ្ធិដោយ thmeythmey.com
Tag:
.gif)