កាលពីថ្ងៃចន្ទ​ទី​២១មេសា លោកម៉ាក្រុង ​ប្រធានាធិបតីបារាំង បានធ្វើដំណើរទៅកោះម៉ាយ៉ុត ដែនដីបារាំងដែលស្ថិតនៅក្នុងមហាសមុទ្រឥណ្ឌា​។ កម្មវត្ថុនៃ​ទស្សនកិច្ចនេះ គឺដើម្បីពន្លឿនការក​សាងឡើងវិញនូ​វផ្ទះសម្បែង ក៏ដូចជាហេដ្ឋារចនាសម្ព័ន្ធរបស់កោះនេះ ដែលបានរងការខូចខាតយ៉ាងដំណំ ដោយ​សារតែខ្យល់ព្យុះសង្ឃរា​ឈីដូ កាលពី​ខែធ្នូ​កន្លងទៅ។ សូមបញ្ជាក់ថា កោះម៉ៃយ៉ុត​គឺជាដែនដីមួយរបស់បារាំង មាន​ក្រីក្របំផុត​។

៤ខែបន្ទាប់ពីកោះម៉ាយ៉ុត បានរងគ្រោះយ៉ាងធ្ងន់ធ្ងរដោយសារខ្យល់ព្យុះសង្ឃរា​ឈីដូ លោក​ម៉ាក្រុង​បានធ្វើដំណើរទៅ​ដល់​នៅព្រឹកថ្ងៃចន្ទ ទី​២១មេសា ដើម្បី​ពិនិត្យ​មើលដំណើរការនៃការសងសង់ឡើងវិញ នូវ​ផ្ទះសម្បែងប្រជាជន សាលារៀន មន្ទីរពេទ្យ បណ្តាញទឹកស្អាត ចរន្តអគ្គិសនី​ និងហេដ្ឋារចនាសម្ព័ន្ធរដ្ឋនានានៅលើកោះនេះ​។ 

អមដំណើរដោយ​ភរិយាលោក និង​រដ្ឋមន្ត្រីពាក់ព័ន្ធជាច្រើនរូប លោក​ម៉ាក្រុង​បានចុះទៅជួប​ប្រជាពលរដ្ឋ និងថ្នាក់ដឹកនាំ​កោះម៉ាយ៉ុតជាច្រើនទីតាំង​។

ក្រៅពី​មានបំណងពន្លឿនការសាងសង់ឡើងវិញ លោក​ម៉ាក្រុង​បានឆ្លៀតឱកាសទស្សនកិច្ចនេះ ដើម្បី​ដាក់​បង្ហាញ​នូវ​គម្រោងច្បាប់ពិសេសមួយ ដើម្បី​រៀបចំ​ពង្រឹងគ្រិះកោះម៉ាយ៉ុតឡើងវិញ។ ជាគម្រោងការដែលរដ្ឋបារាំង នឹងចាត់វិធានការចាំបាច់មួយចំនួន ដូចជា​ការ​​ប្រយុទ្ធប្រឆាំងនឹង​អន្តោប្រវេសន៍ខុសច្បាប់ ទប់ស្កាត់សំណង់អាណាធិបតេយ្យដែល​មិន​ឆ្លើយតបទៅនឹង​លក្ខខណ្ឌសុវត្ថិភាព ដោះស្រាយ​បញ្ហាអសន្តិសុខ ព្រមទាំងការជំរុញអភិវឌ្ឍន៍​សេដ្ឋកិច្ចមូលដ្ឋាន​។

​អត្ថបទគម្រោងច្បាប់នេះ នឹងត្រូវ​លោក​ម៉ាក្រុងយកទៅបង្ហាញ​ក្រុមប្រឹក្សា​តំណាងរាស្ត្រនៃតំបន់​កោះម៉ាយ៉ុត មុននឹងយលមកពិនិត្យលម្អិតនៅក្នុង​គណរដ្ឋមន្ត្រីបារាំង​។

សូមបញ្ជាក់ថា ព្យុះសង្ឃរាឈីដូ បាន​ផ្តាច់ជីវិតមនុស្ស​ចំនួន​ជាង​៤០នាក់នៅកោះម៉ាយ៉ុត កាលពី​ខែធ្នូឆ្នាំ​២០២៤។ ព្យុះដ៏កំណាចនេះ បាន​បំផ្លាញផ្ទះសំបែង សំណង់អគារ ​ដំណាំភោគផល និងបណ្តាញសេវាសាធារណៈ គិតជាទឹកប្រាក់សរុប ប្រមាណ​៣៥០០លានអឺរ៉ូ។ ស្ថិតនៅក្នុងមហាសមុទ្រឥណ្ឌា កោះម៉ាយ៉ុត គឺជាដែន​ដីរបស់បារាំង តែគឺជាតំបន់ដែលក្រីក្របំផុត។ មិនត្រឹមប៉ុណ្ណោះទេ ប៉ុន្មានឆ្នាំមកនេះ កោះម៉ាយ៉ុតបាន​រងនូវជំនន់យ៉ាងគំហុក នៃជនអន្តោប្រវេសន៍​ខុសច្បាប់ មកពី​ប្រជុំ​កោះកូម៉រ និងមួយផ្នែក​ខ្លះ​មកពី​ទ្វីបអាហ្វ្រិក។ មុននឹង​រងគ្រោះដោយ​ព្យុះសង្ឃរា អត្រាអ្នកអត់ការងារធ្វើនៅកោះម៉ាយ៉ុត មាន​ដល់ទៅ​៣៧% ចំណែក​កម្រិតជីវភាពវិញគឺក្រីក្រខ្លាំងជាង​តំបន់ផ្សេងៗទៀតរបស់បារាំងចំនួន​៧ដង​។

ស្ថានភាពសេដ្ឋកិច្ចដ៏លំបាកលំបិន បូកបន្ថែម​និងកត្តាសន្តិសុខសុវត្ថិភាព​កាន់តែចុះអន់ថយ​ បានធ្វើឲ្យ​កោះម៉ាយ៉ុតធ្លាក់ចូលទៅក្នុងវិបត្តិ​ ដែលរដ្ឋបារាំងពិបាកដោះស្រាយ​រួចទៅហើយ។ ក្រោយព្យុះឈីដូបោកសង្គ្រុប​ ប្រជាជន​កោះម៉ាយ៉ុត បានរិះគន់យ៉ាងខ្លាំងចំពោះភាពយឺតយ៉ាវ នៃអន្តរាគមន៍ជួយ​របស់អាជ្ញាធររដ្ឋបារាំង។ បញ្ហាខ្វះថវិកា ខ្វះទំនាក់ទំនង​ឲ្យ​មានប្រសិទ្ធភាព ព្រមទាំង​លក្ខខណ្ឌ​ភូមិសាស្រ្តនៅឆ្ងាយក្នុងមហាសមុទ្រឥណ្ឌា បានធ្វើ​ឲ្យ​ការសាងសង់ឡើងវិញជួបការយឺតយ៉ាង ខណៈប្រជាជន​ក្រីក្រជាច្រើនសែននាក់ រួមទាំងអន្តោប្រវេសន៍ខុសច្បាប់ផង ត្រូវបន្តរស់នៅក្រោមដំបូលតង់ជាច្រើនខែមកហើយ​៕

ដោយ៖ ម៉ម ពិសី (RFI ខេមរភាសា)