.jpg)
.jpg)
រំលំដើមសំរងយកផ្លែ! ប្ដីប្រពន្ធនៅខេត្តកោះកុងបានស្លាប់ ដោយសារដើមសំរងសង្កត់លើ
- ថ្ងៃពុធ ទី២៣ ខែមេសា ឆ្នាំ២០២៥ ម៉ោង ១០:០៩ នាទី ព្រឹក
រូបភាព៖ ក្រសួងបរិស្ថាន
ភ្នំពេញ៖ ប្ដីប្រពន្ធមួយគូនៅខេត្តកោះកុង ត្រូវបានគេប្រទះឃើញស្លាប់ នៅក្រោមដើមសំរង ក្រោយពេលកាប់រំលំដើម ដើម្បីប្រមូលយកផ្លែទៅលក់។ ក្រសួងបរិស្ថាន បានផ្សាយករណីនេះ នៅទំព័រហ្វេសប៊ុក នៅថ្ងៃទី២២ ខែមេសា។
លោក យួត ហេងប៊ុនម៉ា អធិការស្រុកបូទូមសាគរ ដែលត្រូវបានក្រសួងបរិស្ថានស្រង់សម្តីមកចុះផ្សាយ បានបញ្ជាក់ថា ជនរងគ្រោះទាំង២រូបនេះបានបាត់ខ្លួនជាច្រើនថ្ងៃហើយ។ ក្រោយការស្វែងរក គេបានប្រទះឃើញសពប្តីប្រពន្ធទាំង២ ដែលត្រូវត្រូវដើមសំរងរលំសង្កត់លើ នៅម៉ោងជិត ៨យប់ ថ្ងៃទី២២ ខែមេសា នៅក្នុងព្រៃនៃភ្នំកំពង់ប្លូ ស្ថិតនៅភូមិទួលពោធិ៍ ឃុំតានូន ស្រុកបូទុមសាគរ ខេត្តកោះកុង។
បើតាមអធិការស្រុកបូទូមសាគរដដែល ក្នុងឆ្នាំ២០២៥នេះ មានមនុស្ស៤នាក់ហើយ បានស្លាប់ ពាក់ព័ន្ធនឹងករណីកាប់ដើមសំរង ហើយបណ្តាលឱ្យបាក់សង្កត់លើ។
ក្រសួងរិស្ថាន សោកស្ដាយចំពោះមរណភាពរបស់ពលរដ្ឋទាំង២។ កន្លងមក ក្រសួងតែងរំឭកដាស់តឿន និងហាមពលរដ្ឋ កាប់រំដើមសំរងដើម្បីយកផ្លែ ដ្បិតវានឹងមិនត្រឹមតែអាចបណ្ដាលឱ្យបាត់បង់ជីវិតដោយយថាហេតុប៉ុណ្ណោះទេ ប៉ុន្តែទង្វើល្មើសច្បាប់ ក៏ធ្វើឱ្យបាត់បង់ប្រភេទជីវៈចម្រុះដ៏សំខាន់សម្រាប់បរិស្ថាន និងសេដ្ឋកិច្ចមូលដ្ឋានផងដែរ។
នៅអំឡុងខែមីនា និងមេសា ដែលជារដូវប្រមូលផ្លែសំរង មានជនខិលខូចមួយចំនួនតូច បានចូលប្រមូលផ្លែសំរ៉ង ដោយការកាប់រំលំដើម ឬកាប់មែក ដែលបង្កឱ្យបាត់បង់ធ្ងន់ធ្ងរ ដល់ពូជរុក្ខជាតិ ប្រភេទជីវៈចម្រុះ ពិសេសតម្លៃនៃការអភិរក្ស និងការរស់នៅប្រដោយចីរភាព របស់ពលរដ្ឋនៅសហគមន៍នោះ។ ក្រសួងបរិស្ថានបញ្ជាក់ដូច្នេះ ដោយបន្តទទូចជាថ្មី ដល់ក្រសួង ស្ថាប័នពាក់ព័ន្ធ សមត្ថកិច្ច និងកងកម្លាំងគ្រប់លំដាប់ថ្នាក់ ព្រមទាំងប្រជា សហគមន៍ ឱ្យបន្តសហការគ្នាក្នុងការពង្រឹងការអនុវត្តច្បាប់ ជាពិសេសចាត់វិធានការការពារ និងទប់ស្កាត់ការកាប់ដើមសំរង ឬមែកសំរង។
យោងតាមក្រមបរិស្ថាន និងធនធានធម្មជាតិ តាមមាត្រា៨៥០ ក្នុងចំណុច «គ» ការកាប់ ផ្តួល រំលំ គ្រៀវ ចងរិត បំពុល ធ្វើឱ្យរបួស ធ្វើឱ្យខូចខាត គាស់រម្លើង រុករាន ឬបំផ្លាញព្រៃឈើ និងរុក្ខជាតិព្រៃ ដែលស្ថិតក្នុងចំណាត់ថ្នាក់ទី៥ និងទី៦ នៃចំណាត់ថ្នាក់ប្រភេទរុក្ខជាតិព្រៃ ដោយគ្មានការអនុញ្ញាត ត្រូវផ្តន្ទាទោសដាក់ពន្ធនាគារពី១ឆ្នាំ ទៅ៥ឆ្នាំ និងពិន័យជាប្រាក់ពី ១០០ ០០០ ០០០រៀល ទៅ៥០០ ០០០ ០០០រៀល។ ដោយឡែក តាមមាត្រា៨៥១ ក្នុងចំណុច «ខ» ចំពោះជនណា កាប់ ផ្តួល រំលំ គ្រៀវ ចងរិត បំពុល ធ្វើឱ្យរបួស ធ្វើឱ្យខូចខាត គាស់រម្លើង រុករាន ឬបំផ្លាញព្រៃឈើ និងរុក្ខជាតិព្រៃ ដែលស្ថិតក្នុងចំណាត់ថ្នាក់ទី២ ដល់ទី៤ នៃចំណាត់ថ្នាក់ប្រភេទរុក្ខជាតិព្រៃ ត្រូវផ្តន្ទាទោសដាក់ពន្ធនាគារពី៥ឆ្នាំ ទៅ១០ឆ្នាំ៕
អត្ថបទទាក់ទង
© រក្សាសិទ្ធិដោយ thmeythmey.com
Tag:
