.jpg)
.jpg)
អង្គការ WHO ប្រកាសកាត់បន្ថយបុគ្គលិក ក្រោយអាម៉េរិកផ្អាកជំនួយ
- ថ្ងៃពុធ ទី២៣ ខែមេសា ឆ្នាំ២០២៥ ម៉ោង ១១:០៩ នាទី ព្រឹក
លោក Tedros Adhanom Ghebreyesus ប្រមុខអង្គការសុខភាពពិភពលោក។ រូបភាព AFP
ប្រមុខអង្គការសុខភាពពិភពលោក (WHO) នៅថ្ងៃទី២២ ខែមេសា បានប្រកាសពីផែនការកាត់បន្ថយបុគ្គលិកជាច្រើននាក់ ក្រោយរដ្ឋបាលអាម៉េរិក ប្រកាសផ្អាកជំនួយ។ អង្គការសុខភាពពិភពលោក នឹងកាត់បន្ថយមន្រ្តីជាន់ខ្ពស់ និងនាយកដ្ឋានរបស់ខ្លួនលើសពីពាក់កណ្តាល។
ក្រោយអាម៉េរិក ប្រកាសដកខ្លួនពី អង្គការសុខភាពពិភពលោក (WHO) ដែលពឹងផ្អែកលើជំនួយ និងការបរិច្ចាគ បានប្រកាសកាត់បន្ថយបុគ្គលិក និងនាយកដ្ឋានជាច្រើន ដ្បិតកញ្ចប់ថវិកាចំណាយមានការថយចុះ។ លោកប្រធានាធិបតីអាម៉េរិក ដូណាល់ ត្រាំ នៅថ្ងៃទី២០ ខែមករា បានចុះហត្ថលេខាលើបញ្ជាប្រតិបត្តិដកខ្លួនចេញពីអង្គការសុខភាពពិភពលោក ក្រោមហេតុផល មិនអាចគ្រប់គ្រងជំងឺកូវីដ-១៩, រងឥទ្ធិពលពីរដ្ឋសមាជិក និងមិនអាចធ្វើកំណែទម្រង់បានត្រឹមត្រូវ។
«ការធ្លាក់ចុះប្រភពថវិកាភ្លាមៗ បានធ្វើឱ្យយើងប្រឈមនឹងភាពខ្វះខាតផ្នែកប្រាក់បៀវត្ស និងគ្មានជម្រើស ប៉ុន្តែត្រូវកាត់បន្ថយចំនួនបុគ្គលិក និងការងារជាច្រើន»។ លោក Tedros Adhanom Ghebreyesus អគ្គនាយកអង្គការ WHO បែបនេះនៅថ្ងៃទី២២ ខែមេសា ដោយបន្ថែមថា បញ្ហានេះធ្វើឱ្យអង្គការមួយនេះ ត្រូវរៀបចំហេដ្ឋារចនាសម្ព័ន្ធឡើងវិញ។
អាម៉េរិកជាម្ចាស់ជំនួយធំរបស់អង្គការសុខភាពពិភពលោក ដោយបានផ្តល់ជំនួយទំហំ១,៣ពាន់លានដុល្លារ ក្នុងផែនការថវិកាឆ្នាំ២០២២-២០២៣។ នៅក្នុងឆ្នាំ២០២៤ អាម៉េរិក មិនបានផ្តល់វិភាគទានរបស់ខ្លួនឡើយ ហើយឆ្នាំ២០២៥ រឹតតែមិនអាចទៅរួច ព្រោះលោកត្រាំ បានប្រកាសដកខ្លួនចេញពីអង្គការអន្តរជាតិមួយនេះហើយ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
បើតាមលោក Tedros ការបដិសេធរបស់អាម៉េរិក ក្នុងការបង់វិភាគទាននៅឆ្នាំ២០២៤ និងឆ្នាំ២០២៥ និងការកាត់បន្ថយជំនួយអភិវឌ្ឍន៍ពីបណ្តាប្រទេសផ្សេង ធ្វើឱ្យអង្គការ WHO ប្រឈមការខ្វះខាតថវិកាបើកឱ្យបុគ្គលិកសម្រាប់ឆ្នាំ២០២៦ ដល់ឆ្នាំ២០២៧ ចន្លោះពី៥៦០លានដុល្លារ ដល់៦៥០លានដុល្លារ។ ក្នុងទំហំប៉ុននេះ វាស្មើនឹងការចំណាយបុគ្គលិក ២៥ភាគរយរបស់អង្គការ។ ក្នុងពេលបច្ចុប្បន្ន អង្គការសុខភាពពិភពលោក មានបុគ្គលិកប្រមាណ ៨ ០០០នាក់ នៅជុំវិញពិភពលោក។
ដ្បិតចំណូល កំពុងខ្វះខាតច្រើន ប៉ុន្តែប្រមុខអង្គការសុខភាពពិភពលោករូបនេះ មិនបានបញ្ជាក់ឱ្យបានលម្អិតឡើយ ថាតើការងារប៉ុន្មាន នឹងត្រូវបាត់បង់។ ជុំវិញការកាត់បន្ថយបុគ្គលិក លោក Tedros បានអះអាងថា មន្រ្តីជាន់ខ្ពស់ នៅស្នាក់ការកណ្តាល នឹងកាត់បន្ថយពី១២នាក់ ទៅ៧នាក់ ហើយចំនួននាយកដ្ឋាននឹងកាត់បន្ថយពី ៧៦ ទៅ៣៤។
សូមបញ្ជាក់ថា កញ្ចប់ការចំណាយរបស់អង្គការសុខភាពពិភពលោក នៅក្នុងឆ្នាំ២០២៤-២០២៤ មានទំហំ ៦,៨៣ ពាន់លានដុល្លារ៕
© រក្សាសិទ្ធិដោយ thmeythmey.com
Tag:
