.jpg)
.jpg)
វិបត្តិថវិកា៖ កម្មវិធីស្បៀងអាហារពិភពលោក ប្រកាសផ្តាច់ជំនួយនៅអេត្យូពី
- ថ្ងៃពុធ ទី២៣ ខែមេសា ឆ្នាំ២០២៥ ម៉ោង ៩:២៩ នាទី យប់
កម្មវិធីស្បៀងអាហារពិភពលោក បានប្រកាសផ្តាច់ជំនួយឧបត្ថម្ភគម្រោងផ្គត់ផ្គង់អាហារូបត្ថម្ភ ក្នុងប្រទេស អេត្យូពី។ ការផ្តាច់ជំនួយរបស់ស្ថាប័នអង្គការសហប្រជាជាតិនេះ នឹងប៉ះពាល់ទៅដល់ស្ត្រីនិងកុមារ យ៉ាងតិច ៦៥០ ០០០ នាក់។
នៅប្រទេសអេត្យូពី កម្មវិធីស្បៀងអាហារពិភពលោកត្រូវបង្ខំចិត្តបញ្ចប់គម្រោងផ្តល់ជំនួយអាហារូបត្ថម្ភ ចំពោះស្ត្រីនិងកុមារ ចំនួន យ៉ាងតិច ៦៥០ ០០០ នាក់ យ៉ាងយូរបំផុត ត្រឹមខែឧសភា ខាងមុខ។ នេះបើតាមសេចក្តីប្រកាសរបស់ស្ថាប័នអង្គការសហប្រជាជាតិ នៅថ្ងៃអង្គារ ទី២២ ខែមេសា ឆ្នាំ២០២៥ ដោយបញ្ជាក់លម្អិតថា ខ្លួនគ្រោងនឹងជួយក្មេងៗនិងស្រីៗឲ្យបាន ២លាននាក់ នៅអេត្យូពី ក្នុងឆ្នាំនេះ ក៏ប៉ុន្តែ ដោយសារតែខ្វះថវិកា ម្ល៉ោះហើយ ប្រហែលជាវត្ថុបំណងលំបាកនឹងសម្រេចទៅបានណាស់។
បើតាមកម្មវិធីស្បៀងអាហារពិភពលោកដដែល ប្រសិនបើគ្មានជំនួយថវិកាបន្ថែមនិងជាបន្ទាន់នោះទេ មនុស្សប្រមាណ ៣,៦ លាននាក់ ត្រូវប្រឈមនឹងការលំបាកក្នុងទទួលជំនួយស្បៀងចំណីអាហារ នៅអេត្យូពី។
ជាការកត់សម្គាល់ វិបត្តិថវិកាក្នុងវិស័យមនុស្សធម៌នេះ ដចេញពីវិបត្តិអន្តរជាតិជាច្រើន ហើយជាពិសេស គឺការផ្តាច់ជំនួយអន្តរជាតិពីសំណាក់រដ្ឋាភិបាលអាមេរិកក្រោមការដឹកនាំរបស់ប្រធានាធិបតី ដូណាល់ ត្រាំ។ រដ្ឋាភិបាលអាមេរិករបស់លោក ត្រាំ បានប្រកាសផ្តាច់ជំនួយប្រមាណ ៨០% របស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) កាលពីខែមីនា។ ភ្លាមៗ ក្រោយការប្រកាសផ្តាច់ជំនួយនេះ កម្មវិធីស្បៀងអាហារពិភពលោក ក៏ធ្លាប់បានព្រមាន ដោយក្តីរំឭកថា កូនក្មេង ចំនួនមិនតិចជាង ១ លាននាក់នោះទេដែលត្រូវរងគ្រោះខ្វះអាហារូបត្ថម្ភជាបន្ទាន់ ហើយទង្វើដូច្នេះជាឧក្រិដ្ឋកម្ម។
កាលពីសប្តាហ៍មុន អង្គការសហប្រតិបត្តិការនិងអភិវឌ្ឍន៍សេដ្ឋកិច្ច OCDE ជាស្ថាប័នមួយរបស់អង្គការសហប្រជាជាតិ បានផ្សាយរបាយការណ៍មួយ ដោយបញ្ជាក់ថា ជំនួយអន្តរជាតិ ពីសំណាក់ស្ថាប័នសាធារណៈ ត្រូវកាត់បន្ថយ ៧,១% បើប្រៀបធៀបនឹងឆ្នាំ២០២៣។ ការបន្ថយជំនួយនេះ កើតមានជាទូទៅ មិនថា ជំនួយសម្រាប់អ៊ុយក្រែន ជំនួយមនុស្សធម៌អន្តរជាតិ និងជំនួយសម្រាប់ជនភៀសខ្លួននោះឡើយ គឺត្រូវកាត់បន្ថយគ្រប់ទិសទី។
ការប្រកាសផ្តាច់ជំនួយឧបត្ថម្ភរបស់កម្មវិធីស្បៀងអាហារពិភពលោក នៅពេលនេះ កាន់តែបន្ថែមបន្ទុកលំបាកវេទនាចំពោះប្រទេសអេត្យូពី។ អេត្យូពី ជាប្រទេសធំមួយនៅអាហ្វ្រិកខាងកើត មានប្រជាជនប្រមាណ ១៣០ លាននាក់ គឺត្រូវប្រឈមមុខនឹងវិបត្តិរាប់រយជំពូក ព្រោះតែសង្គ្រាមច្រើនប្រភពនិងច្រើនប្រភេទ។ បើគិតត្រឹមតែចន្លោះពីឆ្នាំ២០២០ទៅឆ្នាំ២០២២ ជម្លោះប្រដាប់អាវុធនិងសង្គ្រាមស៊ីវិលនៅអេត្យូពី បានបណ្តាលឲ្យស្លាប់ជីវិតមនុស្ស ប្រមាណ ៦ សែននាក់ ហើយប្រជាជនជាច្រើនលាននាក់ត្រូវបង្ខំចិត្តរត់ភៀសខ្លួន។
ទីភ្នាក់ងាររបស់អង្គការសហប្រជាជាតិ បានគូសបង្ហាញថា ជម្លោះប្រដាប់អាវុធ អស្ថិរភាពក្នុងតំបន់ ការផ្លាស់ទីលំនៅ បញ្ហាវិបត្តិអាកាធាតុ និងវិបត្តិសេដ្ឋកិច្ច បានធ្វើឲ្យពលរដ្ឋអេត្យូពី មិនតិចជាង ១០ លាននាក់ ជួបគ្រោះអត់ឃ្លាន និងត្រូវការជំនួយអាហារូបត្ថម្ភ ជាចាំបាច់៕
ដោយ៖ ហេង ឧត្តម (RFI ខេមរភាសា)
© រក្សាសិទ្ធិដោយ thmeythmey.com
