.jpg)
.jpg)
នាយករដ្ឋមន្រ្តីថៃ កោតសរសើរចំពោះបដិសណ្ឋារកិច្ចរបស់កម្ពុជា
- ថ្ងៃព្រហស្បតិ៍ ទី២៤ ខែមេសា ឆ្នាំ២០២៥ ម៉ោង ៤:៥៩ នាទី រសៀល
នាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត់ (ឆ្វេង) ជាមួយសម្តេច ហ៊ុន ម៉ាណែត នាយករដ្ឋមន្រ្តីកម្ពុជា។ រូបភាព STPM
នាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត់ ដែលបានបញ្ចប់ទស្សនកិច្ចនៅកម្ពុជាក្នុងថ្ងៃទី២៤ ខែមេសា បានបង្ហាញការពេញចិត្តជាខ្លាំង ចំពោះបដិសណ្ឋារកិច្ចប្រកបដោយភាពកក់ក្តៅពីម្ចាស់ផ្ទះកម្ពុជា។ លោក Jirayu Huangsub អ្នកនាំពាក្យរដ្ឋាភិបាលថៃ បានបញ្ជាក់បែបនេះ ដោយបន្តថា ប្រទេសជិតខាងទាំងពីរ បានប្តេជ្ញាបន្តទំនាក់ទំនងទ្វេភាគីដ៏រឹងមាំ។
លោកស្រី ថែថងថាន ស៊ីណាវ៉ាត់ នាយករដ្ឋមន្រ្តីថៃ បានបំពេញទស្សនកិច្ចនៅកម្ពុជា ចាប់ពីថ្ងៃទី២៣ ដល់ថ្ងៃទី២៤ ខែមេសា ដោយប្រទេសទាំងពីរ បានចុះហត្ថលេខាលើឯកសារចំនួន០៧ ពាក់ព័ន្ធនឹងច្រកព្រំដែន, កម្លាំងពលកម្ម, ការងារ, បរិស្ថាន, និងស្ពានជាដើម។
ក្នុងដំណើរទស្សនកិច្ចរយៈពេល ២ថ្ងៃនេះ លោកស្រី ផែថងថាន ស៊ីណាវ៉ាត់ បានបង្ហាញការពេញចិត្តជាខ្លាំង ចំពោះការទទួលពីសំណាក់ម្ចាស់ផ្ទះកម្ពុជា។
«នាយករដ្ឋមន្រ្តីបានបង្ហាញការពេញចិត្តចំពោះការទទួលដ៏កក់ក្តៅ និងប្រកបដោយសេចក្តីថ្លៃថ្នូរពីសំណាក់រដ្ឋាភិបាលកម្ពុជា»។ សារព័ត៌មាន The Nation បានស្រង់សម្តីលោក Jirayu Huangsub អ្នកនាំពាក្យរដ្ឋាភិបាលថៃ បែបនេះ នៅថ្ងៃទី២៤ ខែមេសា។
ទន្ទឹមនេះ មេដឹកនាំថៃ ក៏បានពិភាក្សាជាមួយសម្តេច ហ៊ុន ម៉ាណែត នាយករដ្ឋមន្រ្តីកម្ពុជា ជុំវិញការដំឡើងពន្ធរបស់អាម៉េរិកផងដែរ។
តាមការបញ្ជាក់របស់លោក Jirayu ថៃ អាចនឹងប្រើប្រាស់យន្តការរួមរបស់អាស៊ាន ដើម្បីចរចារួមគ្នាជាមួយអាម៉េរិក ដ្បិតមេដឹកនាំថៃជឿថា កិច្ចសហប្រតិបត្តិការក្នុងក្របខណ្ឌអាស៊ាន អាចជួយឱ្យការចរចាមានប្រសិទ្ធភាពជាង។ មិនតែប៉ុណ្ណោះ ប្រទេសជិតខាងទាំងពីរ បានប្តេជ្ញាធ្វើការរួមគ្នា ដើម្បីដោះស្រាយបញ្ហាប្រឈមរួម ក្នុងគោលបំណងរកដំណោះស្រាយឈ្នះ-ឈ្នះ៕
© រក្សាសិទ្ធិដោយ thmeythmey.com
Tag:
