.jpg)
.jpg)
រដ្ឋមន្រ្តីធនធានទឹក ជំរុញអាស៊ានផ្លាស់ប្ដូរទិន្នន័យគ្នា ដើម្បីឆ្លើយតបនឹងការប្រែប្រួលអាកាសធាតុ
- ថ្ងៃព្រហស្បតិ៍ ទី២៤ ខែមេសា ឆ្នាំ២០២៥ ម៉ោង ៧:៥៩ នាទី ល្ងាច
ទិដ្ឋភាពរដូវប្រាំង នៅមុខព្រះបរមរាជវាំង ក្រុងភ្នំពេញ។ រូបថត៖ ហេង ស្រីលីន
ភ្នំពេញ៖ លោក ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម ជំរុញឱ្យអាស៊ានផ្លាស់ប្ដូរទិន្នន័យ ចំណេះ និងបច្ចេកវិទ្យា ដើម្បីឆ្លើយតបនឹងការប្រែប្រួលអាកាសធាតុ។ រដ្ឋមន្រ្តីជំរុញបែបនេះ នៅក្នុងវេទិកា «ទស្សនវិស័យអាកាសធាតុអាស៊ានលើកទី២៤ (ASEANCOF-24)» ដែលកម្ពុជាធ្វើជាម្ចាស់ផ្ទះ នាថ្ងៃទី២៤ ខែមេសា។
លោក ថោ ជេដ្ឋា ចាត់ទុក ការប្រែប្រួលអាកាសធាតុគឺជាកង្វល់ដ៏ធំ ដែលប៉ះពាល់ដល់ការអភិវឌ្ឍទីក្រុង កំណើនសេដ្ឋកិច្ច និងវឌ្ឍនភាពសង្គម ជាពិសេសបង្កការរំខាន និងរារាំងដល់កិច្ចខិតខំប្រឹងប្រែងអភិវឌ្ឍន៍ពហុវិស័យ។ ការណ៍នេះ ចាំបាច់ឱ្យអាស៊ានពង្រឹងកិច្ចសហប្រតិបត្តិការផ្លាស់ប្ដូរទិន្នន័យ បច្ចេកវិទ្យា និងចំណេះដឹង ដែលធ្វើយ៉ាងណាឱ្យការព្យាករបានត្រឹមត្រូវជាងមុន ដើម្បីឆ្លើយតបចំពោះបាតុភូតធម្មជាតិនានាទាំងក្នុងពេលបច្ចុប្បន្ន និងអនាគត។
ក្រៅពីនោះ លោកក៏លើកទឹកចិត្តឱ្យមានការសិក្សាស្វែងរកឫសគល់នៃបាតុភូតធម្មជាតិ ដើម្បីដោះស្រាយជាមួយនឹងគ្រោះថ្នាក់នៃការប្រែប្រួលអាកាសធាតុរយៈពេលវែង និងបញ្ហាប្រឈមជាច្រើនពីគ្រោះមហន្តរាយធម្មជាតិដូចជា ព្យុះត្រូពិក ខ្យល់កន្ត្រាក់ ផ្គររន្ទះ ទឹកជំនន់ គ្រោះរាំងស្ងួត និងការកើនឡើងកម្ពស់ទឹកសមុទ្រជាដើម។
លោក ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម ថ្លែងក្នុងវេទិកា «ទស្សនវិស័យអាកាសធាតុអាស៊ានលើកទី២៤ (ASEANCOF-24)» ។ រូបថត៖ ក្រសួងធនធានទឹក
វេទិកាទស្សនវិស័យអាកាសធាតុអាស៊ានលើកទី២៤ មានការចូលរួមពីគណៈប្រតិភូតំណាងអង្គការឧតុនិយមពិភពលោក (WMO) មជ្ឈមណ្ឌលឯកទេសឧតុនិយមអាស៊ាន(ASMC) អង្គការប្រព័ន្ធជូនដំណឹងជាមុនក្នុងតំបន់សមាហរណកម្មពហុមហន្តរាយ(RIMES) ការិយាល័យឧតុនិយមចក្រភពអង់គ្លេស(UKMO) ព្រមទាំងគណៈប្រតិភូបណ្តាប្រទេសអាស៊ានទាំង១១ ជាច្រើនរូប ដោយផ្ទាល់ និងតាមប្រព័ន្ធវីដេអូផងដែរ។
លោករដ្ឋមន្ត្រី ថោ ជេដ្ឋា ជឿជាក់ថា វេទិកាថ្នាក់តំបន់នេះ នឹងទទួលបានលទ្ធផលល្អ ដើម្បីជាមូលដ្ឋាន ក្នុងការអភិវឌ្ឍផែនការយុទ្ធសាស្រ្តជាក់ស្តែងសម្រាប់គ្រប់វិស័យពាក់ព័ន្ធ និងពហុភាគី ជាពិសេសអាចលើកកម្ពស់ចំណេះដឹង និងសមត្ថភាពផ្នែកវិទ្យាសាស្ត្រអាកាសធាតុ ការប្រែប្រួលអាកាសធាតុ និងការបន្សាំអាកាសធាតុ។
យោងតាមសន្ទស្សន៍ហានិភ័យអាកាសធាតុនេះ កុមារកម្ពុជាជិត២លាននាក់ ឬស្មើជាងមួយភាគបី នៃកុមារកម្ពុជាសរុប កំពុងរស់នៅប្រឈមនឹងការប្រែប្រួលអាកាសធាតុ ដូចជា គ្រោះរាំងស្ងួត។ ចំណែកកុមារជាងពាក់កណ្តាលទៀត ប្រឈមមុខខ្លាំងនឹងការកើនទ្បើងកម្តៅ ខ្យល់កន្ទ្រាក់ និងទឹកជំនន់ជាដើម។ មូលដ្ឋានប្រឈមនឹងបញ្ហាការប្រែប្រួលអាកាសធាតុ ភាគច្រើនស្ថិតនៅតំបន់ដាច់ស្រយាលមួយចំនួន ក្នុងភូមិភាគឦសាន តំបន់ជុំវិញបឹងទន្លេសាប និងផ្នែកខ្លះ នៃតំបន់វាលទំនាប៕
អត្ថបទទាក់ទង
© រក្សាសិទ្ធិដោយ thmeythmey.com
Tag:
