.png)
.png)
.jpg)
.jpg)
វត្ថុបុរាណចំនួន២០ ដែលថៃព្រមប្រគល់មកវិញ នឹងត្រូវបញ្ជូនមកដល់កម្ពុជានៅខែសីហា
- ថ្ងៃព្រហស្បតិ៍ ទី២៤ ខែមេសា ឆ្នាំ២០២៥ ម៉ោង ៥:២៩ នាទី ល្ងាច
រូបភាព Thai PBS World
ភ្នំពេញ៖ វត្ថុបុរាណចំនួន ២០ ដែលរាជរដ្ឋាភិបាលថៃ បានឯកភាពប្រគល់មកកម្ពុជាវិញ នឹងត្រូវបញ្ជូនមកកម្ពុជា នៅខែសីហា ឆ្នាំ២០២៥នេះ។ នេះបើតាម លោក ស៊ុំ ម៉ាប់ រដ្ឋលេខាធិការ និងជាប្រធានក្រុមអ្នកនាំពាក្យក្រសួងវប្បធម៌ និងវិចិត្រសិល្បៈ បញ្ជាក់ប្រាប់សារព័ត៌មានឌីជីថលថ្មីៗតាមប្រព័ន្ធតេឡេក្រាម។
អ្នកនាំពាក្យរូបនេះ បានឱ្យដឹងថា វត្ថុបុរាណចំនួន ២០នេះ ស្ថិតក្នុងចំណោមវត្ថុបុរាណចំនួន ៤៣ ដែលជនទុច្ចរិតបានលួចគាស់កកាយតាមប្រាសាទខ្មែរ នៅអំឡុងសង្គ្រាម ហើយនាំចូលទៅប្រទេសថៃដោយខុសច្បាប់។
លោក ស៊ុំ ម៉ាប់ បញ្ជាក់ដូច្នេះថា៖ «វត្ថុបុរាណចំនួន ២០នេះ ស្ថិតក្នុងកិច្ចព្រមព្រៀងប្រគល់វត្ថុបុរាណចំនួន៤៣ ដែលបានលួចយកចូលថៃ ដោយត្រូវបានអាជ្ញាធររឹបអូសបាន។ ក្រសួងវប្បធម៌ប្រទេសទាំងពីរ(កម្ពុជា-ថៃ) បានឯកភាពប្រគល់ជូននៅខែកក្កដា នាទីក្រុងបាងកក ហើយដឹកមកកម្ពុជានៅខែសីហា។»។
ការប្រគល់វត្ថុបុរាណចំនួន២០នោះ មកកម្ពុជា ពីសំណាក់ភាគីថៃ គឺធ្វើឡើងតបតាមសំណើរបស់ក្រសួងវប្បធម៌ និងវិចិត្រសិល្បៈ និងដោយផ្អែកលើកិច្ចព្រមព្រៀងទ្វេភាគីរវាងប្រទេសទាំងពីរ។ នេះបើតាមអ្នកនាំពាក្យក្រសួងវប្បធម៌ ដោយលោក បានបន្ថែមថា កន្លងមក វត្ថុបុរាណចំនួន ២៣ផ្សេងទៀត ត្រូវបានថៃប្រគល់មកឱ្យកម្ពុជារួចហើយ នៅក្នុងឆ្នាំ២០០៨ និង២០១៥។
ក្នុងដំណើរទស្សនកិច្ចជាផ្លូវការ របស់នាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត់ នៅកម្ពុជា នៅថ្ងៃទី២៣ ដល់ថ្ងៃទី២៤ ខែមេសា សម្តេចនាយករដ្ឋមន្ត្រី ហ៊ុន ម៉ាណែត បានអរគុណការសម្រេចចិត្តរបស់ថៃ ក្នុងការប្រគល់ជូនកម្ពុជាវិញ នូវវត្ថុបុរាណខ្មែរចំនួន ២០នេះ។ សម្រាប់ប្រមុខរាជរដ្ឋាភិបាល ទេវរូបទាំងនេះ មិនមែនត្រឹមតែជាវត្ថុបុរាណប៉ុណ្ណោះទេ តែក៏ជាដួងព្រលឹងនៃបុព្វបុរសរបស់ខ្មែរ ដែលបានព្រាត់ប្រាស់ពីមាតុភូមិ ដោយសារសង្រ្គាមនៅពេលកន្លងទៅ»។
សម្តេច ហ៊ុន ម៉ាណែត បានថ្លែងបែបនេះ នៅក្នុងសន្និសីទសារព័ត៌មាន ជាមួយនាយករដ្ឋមន្រ្តីថៃ លោកស្រី ផែថងថាន ស៊ីណាវ៉ាត់ នៅថ្ងៃទី២៣ ខែមេសា។
គួរំលឹកថា គិតចាប់តាំងពីឆ្នាំ១៩៩៦ រហូតដល់ឆ្នាំ២០២៤ កម្ពុជាទទួលបានវត្ថុបុរាណខ្មែរ សរុបចំនួន ១០៩៨ ពីប្រទេសចំនួន ១៥ រួមមានសហរដ្ឋអាម៉េរិក បារាំង អូស្ត្រាលី អង់គ្លេស ចិន និងថៃជាដើម។ ក្នុងចំណោមវត្ថុបុរាណទាំង ១ ០៩៨ មាន ៥៧១ វត្ថុបុរាណ ដែលសប្បុរសជន បានប្រគល់មកឲ្យវិញ និងវត្ថុបុរាណចំនួន ៥២៧ ប្រគល់ដោយរដ្ឋាភិបាល ឬស្ថាប័ននានា៕
© រក្សាសិទ្ធិដោយ thmeythmey.com
Tag:
.gif)