.jpg)
.jpg)
រយៈពេល៥ឆ្នាំ អង្គការ iDE ជួយបង្កើនចំណូលដល់កសិករជាង ៦ពាន់គ្រួសារ និងអាជីវកម្មកសិកម្មជាង៣០០
- ថ្ងៃសុក្រ ទី២៥ ខែមេសា ឆ្នាំ២០២៥ ម៉ោង ៨:៥៩ នាទី ព្រឹក
ក្នុងរយៈពេល ៥ ឆ្នាំ អង្គការ iDE កម្ពុជា បានលើកកម្ពស់សុខុមាលភាពគ្រួសារកសិករខ្នាតតូចជាង ៦០០០គ្រួសារ និងអាជីវកម្មកសិកម្មជាង ៣០០។ បើតាមសេចក្ដីប្រកាសព័ត៌មានរបស់អង្គការ iDE ក្នុងចំណោមនោះ មាន៤៣ភាគរយ ដឹកនាំដោយស្រ្តី និងបានជួយដល់គ្រួសារកសិករខ្នាតតូចបង្កើនប្រាក់ចំណេញ ដោយពង្រឹងភាពធន់នឹងការប្រែប្រួលអាកាសធាតុ និងវិបត្តិសេដ្ឋកិច្ចផងដែរ។
អង្គការ iDE កម្ពុជា បានពិធីបិទបញ្ចប់គម្រោង «ការធ្វើពាណិជ្ជកម្មសាកវប្បកម្មវៃឆ្លាតក្នុងលក្ខខណ្ឌបម្រែបម្រួលអាកាសធាតុ » (ហៅកាត់ថា ស៊ីស្មាត) នៅខេត្តសៀមរាប ក្រោយដាក់ដំណើរការកាលពីឆ្នាំ២០១៩។ គម្រោងនេះ ទទួលបានការគាំទ្រថវិកាពីក្រសួងការបរទេស និងពាណិជ្ជកម្មនៃប្រទេសនូវែលសេឡង់ ដែលមានថវិកា ៥,៤លានដុល្លារ សម្រាប់គាំទ្រដល់កសិករអាជីពនៅខេត្តបី គឺខេត្តសៀមរាប បន្ទាយមានជ័យ និងឧត្តរមានជ័យ។
តាមរយៈគម្រោងខាងលើ អង្គការ iDE បានណែនាំបច្ចេកទេស និងបច្ចេកវិទ្យាកសិកម្មឆ្លាតវៃនឹងអាកាសធាតុ លើកកម្ពស់ការអនុវត្តកសិកម្មល្អធានាសុវត្ថិភាពទាំងកសិដ្ឋាន និងផលិតផលស្បៀង។ ក្រៅពីនេះ គម្រោងក៏បណ្ដុះការកសាងសមត្ថភាព និងផ្សាភ្ជាប់ទំនាក់ទំនងរវាងតួអង្គក្នុងវិស័យសាធារណៈ និងឯកជន ព្រមទាំងលើកកម្ពស់ប្រព័ន្ធទីផ្សារដែលប្រកបដោយបរិយាប័ន្ន និងមានភាពធន់ផងដែរ។
បើតាមសេចក្ដីប្រកាសព័ត៌មានខាងលើ តាមរយៈការគាំទ្រផ្នែកបច្ចេកទេស និងការអនុវត្តកសិកម្មល្អ រួមជាមួយនឹងការបង្កើនលទ្ធភាពទទួលបានសេវាកម្មកសិកម្ម និងទីផ្សារកាន់តែប្រសើរពីអង្គការiDE កសិករបានបង្កើនប្រាក់ចំណេញប្រចាំឆ្នាំរបស់ពួកគេពី ៨៣០ ទៅប្រមាណជាង ៣ ៧០០ដុល្លារ។
លោក Kevin Robbins នាយកប្រចាំប្រទេសនៃអង្គការ iDE កម្ពុជា បានថ្លែងក្នុងកម្មវិធីបិទបញ្ចប់គម្រោងថា៖ «ស៊ីស្មាស្អាត គឺជាសាច់រឿងនៃភាពធន់ និងវឌ្ឍនភាព។ យើងបានផ្តោតលើការកសាងផ្នត់គំនិតសហគ្រិនភាពក្នុងចំណោមកសិករ និងតួអង្គនៅក្នុងទីផ្សារ ដោយជួយពួកគេឱ្យមើលឃើញថា ដីស្រែចម្ការរបស់ពួកគេអាចប្រែក្លាយទៅជាអាជីវកម្មមួយដែលអាចផ្តល់នូវប្រាក់ចំណេញដ៏ប្រសើរបាន»។
អង្គការ IDE បានសហការជាមួយតួអង្គរដ្ឋាភិបាល និងឯកជន ដើម្បីធានាបាននូវការលើកកម្ពស់គុណភាពធាតុចូលកសិកម្ម លើកកម្ពស់ការប្រើប្រាស់ជីគីមី និងថ្នាំកសិកម្មប្រកប ដោយទំនួលខុសត្រូវ និងផ្តល់ការបណ្តុះបណ្តាលបច្ចេកទេសជាក់ស្តែងតាមរយៈកសិដ្ឋាន។ អង្គការ iDE កម្ពុជា បន្តថា កិច្ចខិតខំប្រឹងប្រែងទាំងនេះ បានកសាងប្រព័ន្ធទីផ្សារមួយដែលមានបរិយាប័ន្ន និងមានភាពធន់ ផ្តល់អត្ថប្រយោជន៍ដល់កសិករ និងអ្នកពាក់ព័ន្ធទាំងអស់នៅក្នុងប្រព័ន្ធទីផ្សារ។
នាយកប្រចាំប្រទេសនៃអង្គការ iDE កម្ពុជា បន្ថែមថា៖«ជាមួយនឹងការគិតបែបប្រព័ន្ធ និងប្រើប្រាស់វិធីសាស្រ្តផ្អែកលើការចូលរួម យើងបានធ្វើការជាមួយតួអង្គទីផ្សារនៅក្នុងខ្សែច្រវាក់ទីផ្សារជាច្រើន រួមមាន កសិករ និងក្រុមកសិករ អ្នកផ្គត់ផ្គង់ ធាតុចូលកសិកម្ម ឈ្មួញកណ្តាល សហគ្រិនកសិកម្ម ក្រុមហ៊ុនចែកចាយធាតុចូលកសិកម្ម អ្នកទិញទ្រង់ទ្រាយធំ និងមន្ត្រីរដ្ឋាភិបាល។ យើងក៏បានជួយកសាងទំនាក់ទំនង សមត្ថភាព និងគំរូអាជីវកម្មថ្មីៗ ដែលនឹងអាចបន្តទៅ ថ្ងៃខាងមុខដោយតួអង្គទាំងអស់ បើទោះបីជាគម្រោងបញ្ចប់ក៏ដោយ»។
ចំណែកលោកស្រី Dana AVRAM លេខាទីមួយផ្នែកអភិវឌ្ឍន៍នៃស្ថានទូតនូវែលសេឡង់ប្រចាំកម្ពុជា ឡាវ និងថៃ បានមានប្រសាសន៍ថា៖ «យើងមានមោទនភាពយ៉ាងខ្លាំង ចំពោះការងាររបស់អង្គការ iDE ដែលបាននាំយកនូវ បច្ចេកវិទ្យាវៃឆ្លាតនឹងអាកាសធាតុមកកម្ពុជា។ វាប្រៀបបាននឹងអំណោតដ៏ប្រសើរមួយនៅពេលមើលឃើញថា កសិករដែលយើងបានគាំទ្រ មិនត្រឹមតែលើកកម្ពស់ជីវភាពរស់នៅរបស់ខ្លួនប៉ុណ្ណោះទេ ប៉ុន្តែថែមទាំងបាន កសាងសមត្ថភាពយ៉ាងប្រសើរក្នុងការទប់ទល់នឹងវិបត្តិផ្សេងៗនាពេលអនាគត»។
សូមបញ្ជាក់ថា ស៊ីស្មាត គឺជាគម្រោងចុងក្រោយបង្អស់របស់កម្មវិធី«សម្របសម្រួលការអភិវឌ្ឍជំនួញកសិកម្មកម្ពុជា» (ហៅកាត់ថា CADF) ក្រោមជំនួយរបស់ MFAT។ CADF ដែលរួមមានគម្រោងផ្សេងគ្នា បានចាប់អនុវត្តតាំងពីឆ្នាំ ២០០៥ មកទល់ពេលនេះ បានបង្កើតផលវិជ្ជមានគួរឱ្យកត់សម្គាល់ដល់កសិករប្រមាណជាង ២០.០០០នាក់ និង អភិវឌ្ឍខ្សែច្រវាក់តម្លៃនៃដំណាំមួយចំនួន។
ដោយឡែក អង្គការ iDE គឺជាអ្នកណែនាំប្រព័ន្ធស្រោចស្រពដំណាំប្រភេទដំណក់ទឹក ដំបូងគេនៅកម្ពុជានិងបានផ្សព្វផ្សាយនូវបច្ចេកវិទ្យា និងការអនុវត្តកសិកម្មឆ្លាតវៃនឹងអាកាសធាតុនានា ខណៈពេលដែលណែនាំនូវមុខដំណាំថ្មីៗដូចជា៖ ខ្ទឹមបារាំង ការ៉ុត ត្រសក់ផ្អែម និងដំណាំថ្មីៗ ជាច្រើនទៀត ចូលទៅក្នុងទីផ្សារកម្ពុជា៕
© រក្សាសិទ្ធិដោយ thmeythmey.com
