.jpg)
.jpg)
រដ្ឋមន្រ្តីបរិស្ថាន៖ ចំនួនឧទ្យានុរក្សកាន់តែថយចុះ ដោយសារការលបបាញ់សម្លាប់ ពីជនល្មើស
- ថ្ងៃសុក្រ ទី២៥ ខែមេសា ឆ្នាំ២០២៥ ម៉ោង ៣:២៩ នាទី រសៀល
រូបថត៖ ក្រសួងបរិស្ថាន
ភ្នំពេញ៖«ពីមុនកម្ពុជាមានមន្រ្តីឧទ្យានុរក្ស ១ ២០០នាក់ ប៉ុន្តែមកទល់ពេលនេះ នៅសល់ ប្រហែល ១ ០០០នាក់ប៉ុណ្ណោះ។ ការថយចុះនេះបណ្ដាលមកពីភាពចាស់ជរា ជាពិសេស ការលបបាញ់សម្លាប់ពីសំណាក់ជនល្មើស។»។ នេះជាការអះអាងរបស់ លោក អ៊ាង សុផល្លែត រដ្ឋមន្រ្តីក្រសួងបរិស្ថាន ក្នុងកិច្ចពិភាក្សាគោលនយោបាយ ស្តីពីសមភាពយេនឌ័រ នាថ្ងៃទី២៥ ខែមេសា។
បើតាមរដ្ឋមន្រ្តី ការថយចុះកម្លាំងឧទ្យានុរក្សនៅពេលនេះ បានបង្កភាពលំបាកដល់ការងារយាមល្បាត និងគ្រប់គ្រងតំបន់ការពារធម្មជាតិដែលមានផ្ទៃដីរហូតដល់ ៧លានហិកតា។ លោក អ៊ាង សុផល្លែត ត្អូញត្អែរបែបនេះថា៖ «ឥឡូវយើងមានឧទ្យានុរក្សប្រហែល ១ ០០០នាក់ប៉ុណ្ណោះ ក្នុងការគ្រប់គ្រងតំបន់ការពារធម្មជាតិ ដែលផ្ទៃដីរហូតដល់ ៧ លានហិកតា។ ចំនួននេះ យើងល្បាតអត់គ្រប់ទេ។ ដើរអត់សព្វទេ។ យើងការពារអត់បានទេ ព្រោះយើងកំពុងតែប្រយុទ្ធជាមួយសត្រូវ ដែលគេអាចពួនបាន ហើយយើងដើរកណ្ដាលវាល។»។
ប្រមុខក្រសួងបរិស្ថានរូបនេះ ចាត់ទុកអាយុជីវិតមន្រ្តីឧទ្យានុរក្ស គឺជារឿងសំខាន់ ដែលមិនអាចទិញលក់បាន។ ដើម្បីកាត់បន្ថយគ្រោះថ្នាក់ដល់ឧទ្យានុរក្ស ក្រសួងបរិស្ថាន ត្រៀមដាក់ឱ្យប្រើប្រាស់ដ្រូន (Drone) ដើម្បីល្បាតវិញ ដោយការងារនេះ នឹងចាប់ពីផ្ដើមព្រៃឡង់មុនគេ។ ក្រៅពីដ្រូន ក្រសួងបរិស្ថាន ក៏បានប្រើប្រាស់ផ្កាយរណប និង Satellite ផងដែរ។ លោក អ៊ាង សុផល្លែត មានសុទិដ្ឋិនិយមថា ការប្រើប្រាស់ដ្រូន និងបច្ចេកវិទ្យា វែកមុខជនល្មើស គឺជាការធ្វើទំនើបកម្មដ៏មានប្រសិទ្ធភាព លឿន និងហានិភ័យទាបជាងការចេញទៅល្បាត ផ្ទាល់។
លោក អ៊ាង សុផល្លែត រដ្ឋមន្រ្តីក្រសួងបរិស្ថាន ក្នុងកិច្ចពិភាក្សាគោលនយោបាយស្តីពីសមភាពយេនឌ័រ នាថ្ងៃទី២៥ ខែមេសា។ រូបថត៖ ឈុំ ចន្ថា
លោក ថ្លែងដូច្នេះថា៖ «ឥឡូវនេះ យើងនឹងប្រើប្រាស់ដ្រូន ដើម្បីល្បាតព្រៃវិញ ព្រោះដ្រូន លឿនជាង មានប្រសិទ្ធភាពជាង និងមានហានិភ័យទាបផង។ គេ (ជនល្មើស) អាចបាញ់ ដ្រូនដែលមានតម្លៃ ៣ ០០០ ទៅ ៥ ០០០ដុល្លារបាន ប៉ុន្តែមិនស្មើនឹងអាយុជីវិតឧទ្យានុរក្សដែលយាម ហើយត្រូវបានគេបាញ់សម្លាប់ទេ។»។
សូមជម្រាបថា ក្នុងការងារបង្រ្កាបបទល្មើសធនធានធម្មជាតិនេះដែរ ក្រសួងបរិស្ថាន បានដាក់ចេញវិធានការអនុវត្តច្បាប់ ១០០ ភាគរយ ដោយមិនលើកលែងចំពោះបុគ្គលណា ដែលប្រព្រឹត្តិបទល្មើស មិនថា កាប់ដើមឈើ ឈូសឆាយព្រៃដើម្បីធ្វើកសិកម្ម និងសកម្មភាពខុសច្បាប់នានា៕
© រក្សាសិទ្ធិដោយ thmeythmey.com
Tag:
