.jpg)
.jpg)
កម្ពុជា គ្រោងរៀបចំទស្សនីយភាពសម្ដែងដ៏ធំ ក្នុងព្រឹត្តិការណ៍បិទកីឡាយុវជនអាស៊ី នៅបារ៉ែន
- ថ្ងៃសៅរ៍ ទី២៦ ខែមេសា ឆ្នាំ២០២៥ ម៉ោង ២:៣៥ នាទី រសៀល
ទស្សនីយភាពសម្ដែង ក្នុងព្រឹត្តិការណ៍ស៊ីហ្គេម លើកទី៣២ នៅប្រទេសវៀតណាម
ក្រសួងអប់រំ យុវជន និងកីឡា និងក្រសួងវប្បធម៌ និងវិចិត្រសិល្បៈ នឹងរៀបចំទស្សនីយភាពសម្ដែងដ៏អធិកអធមមួយ នៅពិធីទទួលទង់ធ្វើជាម្ចាស់ផ្ទះកីឡាយុវជនអាស៊ី លើកទី៤ ឆ្នាំ២០២៩ (4th Asian Youth Games) ពីប្រទេសបារ៉ែន នៅថ្ងៃទី៣១ ខែតុលា ខាងមុខ នេះ។ លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា បានបញ្ជាក់កាលពីថ្ងៃទី២៥ ខែមេសា នៅឯមជ្ឈមណ្ឌលជាតិហ្វឹកហ្វឺនកីឡាថា ការសម្តែងទស្សនីយភាព សិល្បៈនេះ គឺដើម្បីបង្ហាញពីវប្បធម៌ និងទេសចរណ៍កម្ពុជា ដែលក្នុងពិធីទទួលទង់នោះ មាន៤៥ប្រទេសចូលរួម។
បារ៉ែន នឹងត្រូវធ្វើជាម្ចាស់ផ្ទះ ព្រឹត្តិការណ៍យុវជនអាស៊ី លើកទី៣ ឆ្នាំ២០២៥ នៅខែតុលា ហើយកម្មវិធីបិទព្រឹត្តិការណ៍ នឹងត្រូវធ្វើនៅថ្ងៃទី៣១ ខែតុលា។ នោះក៏ជាពេល ដែលកម្ពុជា ទៅទទួលទង់ធ្វើជាម្ចាស់ផ្ទះ ព្រឹត្តិការណ៍លើកទី៤ ឆ្នាំ២០២៩ ផងដែរ។
ទស្សនីយភាពសម្ដែង ក្នុងព្រឹត្តិការណ៍ស៊ីហ្គេម លើកទី៣២ នៅប្រទេសវៀតណាម
ក្រសួងអប់រំ និងក្រសួងវប្បធម៌ ក្នុងកិច្ចប្រជុំវិញស្តីពីការទទួលទង់កីឡាយុវជនអាស៊ី ដែលកម្ពុជា នឹងត្រូវធ្វើជាម្ចាស់ផ្ទះ បន្ទាប់ពីប្រទេសបារ៉ែនកាលពីថ្ងៃទី២៥ ខែមេសា។ ក្នុងកិច្ចប្រជុំនោះ លោក វ៉ាត់ ចំរើន បានបញ្ជាក់ថា ក្នុងពិធីទទួលទង់កីឡានេះ កម្ពុជា នឹងរៀបចំឲ្យមានការសម្ដែងទស្សនីយភាព ដ៏អធិកអធម ដែលទស្សនីយភាពបង្ហាញពីវប្បធម៌ និងទេសចរណ៍កម្ពុជា។
រដ្ឋលេខាធិការរូបនេះ បានបញ្ជាក់ថា៖«ទស្សនីយភាពនេះ គឺយើងផ្ដោតខ្លឹមសារទី១ ទៅលើការបង្ហាញនូវវប្បធម៌ជាតិរបស់យើង ក្នុងការសម្ដែងនូវទស្សនីយភាពដ៏ធំនោះ។ ទី២ គឺបង្ហាញពីទេសចរណ៍ លក្ខណៈពិសេសនៃទេសចរណ៍ឯករបស់ប្រទេសយើង។ ទី៣ គឺពាក់ព័ន្ធជាមួយនឹងកីឡាដែរ គឺកីឡាយុវជន ដែលមានយុវវ័យក្រោម ១៨ឆ្នាំ មិនមែនអាយុពេញវ័យទេ។ នេះ គឺជាខ្លឹមសាររួម។»។
ទស្សនីយភាពសម្ដែង ក្នុងព្រឹត្តិការណ៍ស៊ីហ្គេម លើកទី៣២ នៅប្រទេសវៀតណាម
កម្ពុជា ធ្លាប់មានបទពិសោធន៍សម្ដែងទស្សនីយភាពធំបែបនេះម្ដងរួមកហើយ ដោយមាន ១១ប្រទេសចូលរួមទស្សនា គឺក្នុងពេលដែលទទួលទង់ធ្វើជាម្ចាស់ផ្ទះស៊ីហ្គេម លើកទី៣២ ក្នុងពិធីបិទស៊ីហ្គេម នៅវៀតណាម កាលពីឆ្នាំ២០២២។
ក្នុងដំណើរទៅធ្វើជាម្ចាស់ផ្ទះព្រឹត្តិការណ៍កីឡាយុវជនអាស៊ី លើកទី៤ ឆ្នាំ២០២៩ លោក វ៉ាត់ ចំរើន បានស្នើឲ្យពលរដ្ឋកម្ពុជា បន្ដគាំទ្រ និងផ្សព្វផ្សាយ ពីព្រឹត្តិការណ៍កីឡានេះ ឱ្យដូចកាលពីការ ចូលរួមក្នុងដំណើរការធ្វើជាម្ចាស់ផ្ទះ ស៊ីហ្គេម លើកទី៣២ កាលពីឆ្នាំ២០២៣៕
ទស្សនីយភាពសម្ដែង ក្នុងព្រឹត្តិការណ៍ស៊ីហ្គេម លើកទី៣២ នៅប្រទេសវៀតណាម
ទស្សនីយភាពសម្ដែង ក្នុងព្រឹត្តិការណ៍ស៊ីហ្គេម លើកទី៣២ នៅប្រទេសវៀតណាម
© រក្សាសិទ្ធិដោយ thmeythmey.com
Tag:
.gif)