ភ្នំពេញ៖ រយៈពេល៣ឆ្នាំ មជ្ឈមណ្ឌលបណ្ដុះធុរកិច្ចថ្មីតេជោ (Techo Startup Center) បាន​ផ្តល់​ការបណ្ដុះបណ្តាលចំណេះដឹងផ្នែកឌីជីថល ដល់ម្ចាស់សហគ្រាស និងធនធាន​មនុស្ស ក្នុងសហគ្រាស ធុនតូច-មធ្យម និងមីក្រូ (MSMEs) ចំនួន ៦៣ ០០០នាក់ តាមរយៈកម្មវិធី បដិវត្តកម្មឌីជីថលសហគ្រាស Enterprises Go Digital (EGD)។ កម្មវិធីនេះ បង្កើតឡើងក្នុង​គោលបំណង ពង្រឹងសមត្ថភាពការចាប់យកឌីជីថល របស់សហគ្រាសគ្រប់កម្រិត ក្នុង​ជំនាន់សេដ្ឋកិច្ច និងធុរកិច្ចឌីជីថល និងបង្កើនការរួមចំណែក​របស់វិស័យឯកជន ក្នុងការអភិវឌ្ឍសេដ្ឋកិច្ច និងធុរកិច្ចឌីជីថល ប្រកបដោយភាពធន់ ចីរភាព និងបរិយាបន្ន។ មជ្ឈមណ្ឌលបណ្ដុះធុរកិច្ចថ្មីតេជោ ទទួលបន្ទុកអនុវត្តកម្មវិធីនេះ ដោយមានការគាំទ្រពីក្រសួងសេដ្ឋកិច្ច និងមូលនិធិអភិវឌ្ឍន៍ជំនាញ (SDF)។

មជ្ឈមណ្ឌលបណ្ដុះធុរកិច្ចថ្មីតេជោ បានរៀបចំសិក្ខាសាលាផ្សព្វផ្សាយអំពី នីតិវិធីរួមនៃការគ្រប់គ្រងកម្មវិធីបរិវត្តកម្មឌីជីថលសហគ្រាស ក្រោមប្រធានបទ «តស់! ចាប់យកឌីជីថល» ដែលមានអ្នកចូលរួមពីបណ្ដាសហគ្រាស និងអាជីវកម្មគ្រប់ធុនប្រមាណ១៧០នាក់។ សិក្ខាសាលានេះ ស្ថិតក្នុងកម្មវិធីបដិវត្តកម្មឌីជីថលសហគ្រាស ដែលទទួលបានការគាំទ្រពីក្រសួងសេដ្ឋកិច្ច និងហិរញ្ញវត្ថុ និងមូលនិធិអភិវឌ្ឍន៍ជំនាញ (SDF) រៀបចំឡើងនៅសណ្ឋាគារសុខាភ្នំពេញ។

ក្នុងសិក្ខាសាលា លោក គី សុខគីម នាយកប្រតិបត្តិ នៃមូលនិធិអភិវឌ្ឍន៍ជំនាញ លើកឡើង​ថា កន្លងមកមូលនិធិអភិវឌ្ឍន៍ជំនាញ បានរួមចំណែកគាំទ្រដល់ការបណ្ដុះ​បណ្ដាលជំនាញ​លើគ្រប់វិស័យសម្រាប់សហគ្រាសធុនតូច-មធ្យម និងមីក្រូ សរុបចំនួន ៣៥ ០០០នាក់។ ក្នុង​នោះវិស័យឌីជីថលមានចំនួន ៩ ២០០នាក់ ស្មើនឹង២០ភាគរយ។

លោក គី សុខគីម បញ្ជាក់ថា តាមរយៈកិច្ចសហការគាំទ្ររវាងមូលនិធិអភិវឌ្ឍន៍ជំនាញ និង​មជ្ឈមណ្ឌលបណ្ដុះធុរៈកិច្ចថ្មីតេជោ សម្រាប់កម្មវិធីបដិវត្តកម្មឌីជីថលសហគ្រាស បាន​បណ្ដុះបណ្ដាលសហគ្រិនចំនួន ៦៣ ០០០នាក់ លើជំនាញឌីជីថល ដែលមានទាំងបុគ្គលិក ថ្នាក់​ដឹកនាំ និងម្ចាស់សហគ្រាស។ លោក សុខគីម អះអាងថា EGD ជាកញ្ចប់កម្មវិធី ដែល​មាន​ទាំងការបណ្ដុះបណ្ដាលសមត្ថភាព​​​ ពង្រីកចំណេះដឹងបច្ចេកវិទ្យា ដើម្បីផ្សាភ្ជាប់ទៅខ្សែ​ច្រវ៉ាក់ផលិតកម្មក្នុងស្រុក និងក្នុងតំបន់ អនុវត្តបានរយៈពេល៣ឆ្នាំហើយ។

លោក សុខគីម លើកឡើងថា៖ «ទាក់ទងនឹងវិស័យឌីជីថល ក្នុងចំណោម ៣៥ ០០០នាក់ គឺ​យើងជួយបាន ៩ ២០០នាក់ ស្មើនឹង ២០ភាគរយ។ ទាក់ទងនឹងមជ្ឈមណ្ឌលបណ្ដុះធុរកិច្ចថ្មី​តេជោ បានជួយដល់ ៦ ៣០០នាក់ អនុវត្តបានរយៈពេល៣ឆ្នាំ ជាកញ្ចប់កម្មវិធី ដែលមាន​ទាំង​ការបណ្ដុះបណ្ដាលសមត្ថភាព​​​ ពង្រីកចំណេះដឹងបច្ចេកវិទ្យា ដើម្បីផ្សាភ្ជាប់ទៅខ្សែ​ច្រវ៉ាក់​ផលិតកម្មក្នុងស្រុក និងក្នុងតំបន់»។

 ក្រៅពីមជ្ឈមណ្ឌលបណ្ដុះធុរកិច្ចថ្មីតេជោ មូលនិធិអភិវឌ្ឍន៍ជំនាញ (SDF) ក៏បាន​សហការ​ជាមួយរោងចក្រសហគ្រាសចំនួន ៤៥០ សមាគមធុរកិច្ចចំនួន២២ និងគ្រឹះស្ថានបណ្ដុះ​បណ្ដាលចំនួន៦២ ដើម្បីគាំទ្រដល់ការបណ្ដុះបណ្ដាលជំនាញដល់បុគ្គលិក ថ្នាក់ដឹកនាំ និង​ម្ចាស់សហគ្រាស លើផ្នែកបច្ចេកទេស ទាំងជំនាញរឹង និងជំនាញទន់ មានដូចជាការគ្រប់​គ្រង ទំនាក់ទំនង ដំណោះស្រាយបញ្ហា និងប្រើប្រាស់បច្ចេកវិទ្យាជាដើម។

លោក តាំង ងួនលី នាយកប្រតិបត្តិមជ្ឈមណ្ឌលបណ្ដុះធុរកិច្ចថ្មីតេជោ លើកឡើងថា កម្មវិធី​បដិវត្តកម្មឌីជីថលសហគ្រាស Enterprises Go Digital (EGD) បង្កើតឡើង​ក្នុង​​បំណង​ពង្រឹង​សមត្ថភាពការចាប់យកឌីជីថលរបស់សហគ្រាស តាមរយៈការធ្វើបដិវត្តកម្ម​ឌីជីថល​របស់សហគ្រាស ដើម្បីជំរុញឱ្យសហគ្រាសគ្រប់កម្រិត​អាចក្លាយជាភ្នាក់ងារដ៏សកម្ម ក្នុងជំ​នាន់សេដ្ឋកិច្ចនិងធុរកិច្ចឌីជីថល និងបង្កើនការរួមចំណែករបស់វិស័យឯកជន​ក្នុង​ការអភិវឌ្ឍ សេដ្ឋកិច្ច និងធុរកិច្ចឌីជីថល។ 

 «កម្មវិធីបដិវត្តកម្មឌីជីថលសហគ្រាស Enterprises Go Digital (EGD)​ នឹងក្លាយជាផ្នែកមួយ​ជួយជំរុញការចាប់យកឌីជីថលរបស់សហគ្រាសគ្រប់កម្រិត និងគ្រប់វិស័យ ដើម្បីពង្រឹង​ប្រសិទ្ធភាព ប្រតិបត្តិការធុរកិច្ច ធានាបាននូវចីរភាពនៃអាជីវកម្ម បង្កើនផលិតភាព ពង្រីក​ទីផ្សារ ភ្ជាប់នឹងខ្សែច្រវាក់ផលិតកម្ម និងបង្កើនប្រសិទ្ធិភាពសេដ្ឋកិច្ច»។ នេះជាការលើកឡើងរបស់លោក តាំង ងួនលី។

កម្មវិធីបដិវត្តកម្មឌីជីថលសហគ្រាស EGD បែងចែកការបណ្ដុះបណ្ដាលលើ​កម្មវិធី​ចម្បង​ចំនួន​៦ មានការស្វែងយល់ពីបដិវត្តកម្មឌីជីថល,​ការចាប់ផ្ដើមដំណើរបដិវត្តកម្មឌីជីថល​សហគ្រាស, ការធ្វើសមាហរណកម្មក្នុងខ្សែច្រវាក់តម្លៃ, ការពង្រឹងសមត្ថភាពប្រកួត​ប្រជែង, តស់ចាប់យកឌីជីថល និងបដិវត្តកម្មឌីជីថលសម្រាប់សេដ្ឋកិច្ចឌីជីថល។

 លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា ដែលជាដៃគូ​បណ្ដុះ​បណ្ដាលជំនាញ ក្នុងកម្មវិធីបដិវត្តកម្មឌីជីថល សហគ្រាស EGD លើកឡើងថា សហ​គ្រាស​តូច-មធ្យមកម្ពុជា បច្ចុប្បន្ននៅមានកម្រិត ពិសេសក្នុងវិស័យឌីជីថល។

លោក តែ តាំងប៉ យល់ថា ការបណ្ដុះបណ្ដាលជំនាញលើផ្នែកបច្ចេកវិទ្យាឌីជីថល ដល់​សហគ្រិនតូច មធ្យម និងមីក្រូសហគ្រាស គឺជាកត្តាចម្បង និងសំខាន់ក្នុងការជំរុញល្បឿន​នៃសេដ្ឋកិច្ច និងការធ្វើទីផ្សារអាជីវកម្មល្អប្រសើរស្របតាមបរិបទឌីជីថលបច្ចុប្បន្ន។ អ្នក​ជំ​នាញរូបនេះ យល់ថា សហគ្រាសតូច និងមធ្យម រួមទាំងមីក្រូសហគ្រាស ចាំបាច់បំផុតត្រូវ មានចំណេះដឹងផ្នែកឌីជីថល ដើម្បីផ្សារភ្ជាប់អាជីវកម្មខ្លួនក្នុងបរិបទឌីជីថល។

 «បើយើងមិនជំរុញគាត់ (សហគ្រិន) ទេ SMEs យើងមិនអាចភ្ជាប់ក្នុងសម័យទំនើបទេ។ បញ្ហាប្រឈមដូចសព្វថ្ងៃ ធនធានយើងនៅមានកម្រិតទាប មិនដូចបណ្ដាប្រទេសគេទេ ។ គេចេញពីសាលាមក គេចេះប្រើទាំងអស់ ក្នុងប្រទេសជឿនលឿន តែយើងអត់ទេ។ SMEs យើងនៅមានកម្រិតទាប។ ឥឡូវមិនត្រឹម SMEs ទេ ឈានដល់ MSMEs អាជីវកម្មក្រៅ ប្រព័ន្ធ ដែលមានជាង ៧០ម៉ឺនសហគ្រាស​ ក្នុងឆ្នាំ២០២៤»។ នេះជាការលើកឡើង​របស់ លោក តែ តាំងប៉ ដែលបានបន្តលើកទឹកចិត្ត ​ម្ចាស់អាជីវកម្មក្រៅប្រព័ន្ធ និងសហគ្រាស ធុន​តូច-មធ្យមទាំងអស់ ឱ្យស្វែងយល់ និងសិក្សាពីបច្ចេកវិទ្យានានា ដើម្បីអភិវឌ្ឍន៍​អាជីវកម្ម​ខ្លួន​ឱ្យកាន់តែប្រសើរ និងបង្កើនសេដ្ឋកិច្ច៕