ភ្នំពេញ៖ អ្នកតាមដានសង្គម បានសាទរ ចំពោះបំណងរបស់រាជរដ្ឋាភិបាល ក្នុងការ​បញ្ចប់​មិន​ឱ្យ​មាន​ការ​ដាក់ក្រវិលកំប៉ុងស្រាបៀរ ឬគម្របភេសជ្ជៈ ក្នុងពេលឆាប់ៗ។ អ្នក​តាម​ដាន​សង្គម ជឿ​ថា នៅពេលក្រវិលកំប៉ុងស្រាបៀរគ្មានរង្វាន់ នឹងចូលរួម​កាត់បន្ថយការប្រើ​គ្រឿង​ស្រ​វឹង នឹង​មិន​ត្រឹមចូលរួមកាត់បន្ថយការប្រើប្រាស់គ្រឿងស្រវឹង កាត់បន្ថយគ្រោះ​ថ្នាក់​ចរាចរណ៍ និងចូលរួមធានានូវសុខភាពសាធារណៈ ពីជំងឺមិនឆ្លងនានាជាដើម។ ក្រៅពី​នេះ អ្នកតាមដានបញ្ហាសង្គម ក៏ជំរុញឱ្យរាជរដ្ឋាភិបាល ពន្លឿនការរៀបចំ សេចក្ដីព្រាងច្បាប់​គ្រប់​គ្រង​ការ​ប្រើប្រាស់គ្រឿងស្រវឹងផងដែរ។

​លោក ប៉ា ច័ន្ទរឿន អ្នកតាមដានសង្គម យល់ថា ហាមឃាត់ការផ្ដល់រង្វាន់តាមក្រវិលកំប៉ុង ឬ​​​គម្របនៃផលិតផលគ្រឿងស្រវឹង និងភេសជ្ជៈ ជាការបង្ហាញពីឆន្ទៈយកចិត្តទុកដាក់ ​​របស់​រដ្ឋា​ភិបា​ល​អាណត្តិថ្មី ក្នុងការកាត់បន្ថយបញ្ហាសង្គម ដែល​បង្កពីឥទ្ធិពលនៃ​គ្រឿង​ស្រ​វឹង​។

 សម្រាប់ លោក ប៉ា ច័ន្ទរឿន លើសពីគ្រឿងស្រវឹង ប៉ុន្តែរដ្ឋក៏គួររឹតបន្តឹងការផ្សព្វផ្សាយ និងហាមឃាត់ការផ្ដល់រង្វាន់​លើ​ភេសជ្ជៈផ្អែម មានជាតិស្ករខ្ពស់ ដែលកំពុងរីកដូច​ផ្សិតនៅលើទីផ្សារ ពិសេសការ​ផ្សព្វផ្សាយ​ប្រកួត​ប្រជែង​រង្វាន់ដ៏ច្រើនសន្ធឹកដូចគ្នា។ ទាំងគ្រឿងស្រវឹង និងភេសជ្ជៈផ្អែម ហាក់កំពុងប្រជែងរង្វាន់ និងពេញនិយមខ្លាំង ពិសេស​ក្នុងចង្កោមយុវជន ដែលបង្កជាក្ដីបារម្ភពីការប្រឈមបញ្ហាគ្រោះថ្នាក់ និងសុខុមាលភាព​សង្គម​។ លោក ប៉ា ច័ន្ទរឿន លើកឡើងដូច្នេះថា៖ «ប្រទេសកម្ពុជាយើងកន្លងមកនេះ កំពុងលង់ជាមួយគ្រឿងស្រវឹង ភេសជ្ជៈផ្អែម ដោយសារតែរឿងផឹកបានរង្វាន់ គាស់ក្រវិលកំប៉ុង​បានរង្វាន់ហ្នឹងឯង។ មិនមែនតែអ្នកធ្វើការងារសង្គមស៊ីវិលអ្នកបង្ហាញពីការបារម្ភទេ សូម្បីតែក្រសួងសុខាភិបាល សឹងតែប្រកាសអាសន្ន ពីផលវិបាកនៃការកើនឡើងស្រវឹងក្នុងសង្គម ជាពិសេសការកើនឡើងនៃចំនួនពលរដ្ឋមានជំងឺមិនឆ្លង ដូចជាជំងឺទឹកនោមផ្អែម ជំងឺមហារីក»។

លោក ប៉ា ច័ន្ទរឿន នាយកប្រតិបត្តិវិទ្យាស្ថានប្រជាធិបតេយ្យកម្ពុជា។ រូបភាពពីទំព័រហ្វេសប៊ុក លោក ប៉ា ច័ន្ទរឿន

លោកបន្តថា យ៉ាងណាបញ្ហាសុខភាពបង្កពីការប្រើប្រាស់គ្រឿងស្រវឹង និងភេសជ្ជៈផ្អែម នឹង​ក្លាយ​ជាបន្ទុករបស់រដ្ឋនាពេលអនាគត ដែលរដ្ឋនឹងត្រូ​វបង្កើនការចំណាយលើ​ការ​ចូលរួមចំណែកថែទាំសុខភាព និងព្យាបាលជំងឺ ដែលអាចការពារបាននេះ។ 

«ខ្ញុំសង្ឃឹមថាពីឆន្ទៈនយោបាយ នឹងក្លាយជាការអនុវត្តជាក់ស្ដែង ដើម្បីបញ្ឈប់កុំឱ្យមានការផ្សព្វផ្សាយពាណិជ្ជកម្មផ្ដល់រង្វាន់បន្តទៀត ពីព្រោះវាប៉ះពាល់ធ្ងន់ធ្ងរ ដល់ទាំងសុខុមាលភាពសង្គម សុខភាពពលរដ្ឋ និងប៉ះពាល់ដល់ការខិតខំប្រឹងប្រែងរបស់រដ្ឋាភិបាលក្នុងការលើកកម្ពស់សុខុមាលភាព និងសុខភាពរបស់ពលរដ្ឋក្នុងសង្គមទូទៅផងដែរ»។ នេះជាការលើកឡើងរបស់លោក ប៉ា ច័ន្ទរឿន។

មិនខុសពីលោក ប៉ា ច័ន្ទរឿន អ្នកតាមដានសង្គមម្នាក់ទៀត លោក ឈត ប៊ុនថង ក៏យល់​ស្របលើឆន្ទៈ​របស់រដ្ឋាភិបាល លើការហាមឃាត់ការផ្ដល់រង្វាន់លើក្រវិលកំប៉ុងគ្រឿងស្រវឹង និងភេសជ្ជៈផងដែរ។ លោកយល់ថា សកម្មភាពធ្វើទីផ្សារ របស់ក្រុមហ៊ុនផលិតគ្រឿង​ស្រ​វឹង ដែលផ្ដល់រង្វាន់ចំពោះអតិថិជន មិនខុសពីការលើកទឹកចិត្ត និងជំរុញឱ្យយុវជននាំ​គ្នា​សេពគ្រឿងស្រវឹងឡើយ។ 

«ការអនុញ្ញាតឱ្យមានរង្វាន់ ទាំងនៅលើក្រវិលកំប៉ុង វាជាការជំរុញឱ្យមនុស្សកាន់តែសេព​គ្រឿង​ស្រវឹងកាន់តែច្រើន។ បើសិនជាគាស់បានៗ ជារង្វាន់ស្រាបៀរ ជាលុយ ឬ​ជា​អ្វី​ផ្សេង​ក៏ដោយ ក៏វាជាកម្លាំងជំរុញខ្លាំងដែរ»។ នេះជាការលើកឡើងរបស់លោក ឈត ប៊ុន​ថង ប្រាប់សារព័ត៌មានឌីជីថលថ្មីៗ ដែលបន្តថា ជាក់ស្ដែងបញ្ហាពីឥទ្ធិពលនៃ​គ្រឿងកើត​​ឡើង​ច្រើនក្នុងសង្គម មានគ្រោះថ្នាក់ចរាចរណ៍ អំពើហិង្សាក្នុងគ្រួសារ និងតាមទីសាធារណៈ រំលោភបំពាន និងបញ្ហាសុខភាពជាដើម។

លោក ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា។ រូបភាពពី ហ្វេសប៊ុកលោក ឈត ប៊ុន ថង។

សម្រាប់ លោក ប៊ុនថង យល់ថា ការហាមឃាត់ការផ្ដល់រង្វាន់លើក្រវិលកំប៉ុងគ្រឿងស្រវឹង និងភេសជ្ជៈរបស់រដ្ឋាភិបាល ជាមធ្យោបាយមួយ​ក្នុងការកាត់បន្ថយការប្រើប្រាស់​គ្រឿង​ស្រវឹង ក្នុងចំណោមមធ្យោបាយ ឬយន្តការជាច្រើនផ្សេងទៀត។ យ៉ាងណា លោកក៏រំពឹងថា ការប្រើប្រាស់គ្រឿងស្រវឹង នឹងអាចកាត់បន្ថយ ពិសេសក្នុងចង្កោមយុវជន។

 ទន្ទឹមនឹងការអនុវត្តការហាមឃាត់ការផ្ដល់រង្វាន់លើក្រវិលកំប៉ុងគ្រឿងស្រវឹង និងភេសជ្ជៈ ដើម្បីកាត់បន្ថយការប្រើប្រាស់គ្រឿងស្រវឹង លោក ឈត ប៊ុនថង ចង់ឱ្យរដ្ឋពន្លឿន ការ រៀបចំសេចក្ដីព្រាង​ច្បាប់គ្រប់គ្រងការប្រើប្រាស់ និងផ្សព្វផ្សាយគ្រឿងស្រវឹងផងដែរ។ «សម្រាប់ខ្ញុំ ខ្ញុំគិតថាច្បាប់ទោះបីមានច្រើនក៏ដោយ តែច្បាប់គ្រប់គ្រង រហូតដល់ផ្សព្វផ្សាយគ្រឿងស្រវឹងនេះជាអាទិភាពមួយដែរ ដែលរដ្ឋាភិបាលគួរពិចារណា។ ខ្ញុំចង់ឱ្យអនុម័តច្បាប់នេះឱ្យបានឆាប់ ហើយត្រូវចាត់ទុកថាច្បាប់គ្រប់គ្រងគ្រឿងស្រវឹង គឺជាច្បាប់អាទិភាពបន្ទាន់មួយដែរ។ សួរថាហេតុអ្វី? ដោយតែយើងឃើញថាសព្វថ្ងៃពលរដ្ឋយើងដែលប៉ះពាល់ដោយសារគ្រឿងស្រវឹងក៏ច្រើន»។ នេះជាការលើកឡើងរបស់លោក ឈត ប៊ុនថង។

យោងតាមលិខិតមួយចុះហត្ថលេខាដោយ លោក ហ៊ីង ថូរ៉ាក់ស៊ី រដ្ឋលេខាធិការប្រចាំការទីស្តីការគណៈរដ្ឋមន្ត្រី ចុះថ្ងៃទី២៤ ខែមេសា សម្តេច​ ហ៊ុន​ ម៉ាណែត​ នឹងបិទមិនឱ្យមានការផ្តល់រង្វាន់​ តាមរយៈក្រវិលកំប៉ុង​ស្រាបៀរ​ និងគម្របភេសជ្ជៈ​។ យោងតាមលិខិតដដែលនេះ ​ សម្តេចនាយករដ្ឋមន្ត្រី​ បានឯកភាពថា​ ក្នុងករណីមានការហាមឃាត់ចំពោះការផ្តល់រង្វាន់​ តាមរយៈក្រវិលកំប៉ុង​ ឬគម្របនៃផលិតផលគ្រឿងស្រវឹង​ និងភេសជ្ជៈនោះ ត្រូវទុកពេលសមរម្ប​ ដូចជា៦ខែឬ១ឆ្នាំ ដើម្បីឱ្យក្រុមហ៊ុនទាំងនោះអាចត្រៀមខ្លួន។ ប្រមុខរាជរដ្ឋាភិបាល

​ក៏នឹងធ្វើជាអធិបតីភាព​នៃកិច្ចប្រជុំរវាងម្ចាស់ក្រុមហ៊ុនផលិតស្រាបៀរនិងភេសជ្ជៈ និងក្រសួង ស្ថាប័នពាក់ព័ន្ធ​ ដើម្បីបញ្ចប់ការផ្តល់រង្វាន់​លើផលិតគ្រឿងស្រវឹងនិងភេសជ្ជៈ​ ក្នុងពេលវេលាសមស្រប។

 កន្លងមក មុនពេលរដ្ឋាភិបាលឯកភាព ហាមឃាត់ការផ្ដល់រង្វាន់តាមក្រវិលកំប៉ុង ឬគម្រប នៃផលិតផលគ្រឿងស្រវឹង និងភេសជ្ជៈ រដ្ឋបាលខេត្តមួយចំនួន ក៏បានបញ្ជាឱ្យ ទម្លាក់ផ្ទាំង ប៉ាណូ និងបដាផ្សព្វផ្សាយគ្រឿងស្រវឹងតាមភូមិសាស្រ្តខេត្តរៀងៗខ្លួនផងដែរ។ ជាក់ស្ដែង ដូចជាខេត្តកំពង់ស្ពឺ កែប សៀមរាប និងទីតាំងមួយចំនួនផ្សេងទៀតផងដែរ។

 យ៉ាងណា ផ្ទាំងប៉ាណូ និងបដាផ្សព្វផ្សាយគ្រឿងស្រវឹងនៅតែច្រើនតាមដងផ្លូវ ទី​សា​ធារណៈ ពិសេសបណ្ដាសង្គម ក្រសួងព័ត៌មានក៏បានណែនាំអង្គភាពប្រព័ន្ធផ្សព្វផ្សាយ ក្រុមហ៊ុនផលិត ចែកចាយ នាំចូល និងក្រុមហ៊ុនផ្តល់សេវាផ្សាយពាណិជ្ជកម្មគ្រឿង​ស្រវឹងទាំងអស់ ឱ្យយកចិត្តទុកដាក់អនុវត្តតាមលិខិតជូនដំណឹង និងគោលការណ៍ ក្រមប្រតិបត្តិ ស្តីពីការផ្សព្វផ្សាយពាណិជ្ជកម្មគ្រឿងស្រវឹង។ 

 ជុំវិញការដាក់គោលការណ៍ក្រមប្រតិបត្តិស្តីពីការផ្សព្វផ្សាយពាណិជ្ជកម្មគ្រឿងស្រវឹង លោក នេត្រ ភក្រ្តា រដ្ឋមន្រ្តីក្រសួងព័ត៌មាន ធ្លាប់បានរំលឹកថា ៖«ហាមផ្សាយពាណិជ្ជកម្ម ផ្តល់រង្វាន់ ដោយប្រើសកម្មភាពជំរុញ លើកទឹកចិត្ត ឬ អូសទាញប្រជាពលរដ្ឋឱ្យឈ្លក់វង្វេង ផ្សង សំ​ណាងយករង្វាន់ និងពាក្យស្លោកដែលមានចរិតលើកទឹកចិត្តហួសហេតុពេក, ហាមយកស្ត្រី និងអនីតិជនក្រោមអាយុ១៨ឆ្នាំ ផ្សាយពាណិជ្ជកម្មគ្រឿងស្រវឹង ដែលធ្វើឱ្យប៉ះពាល់ ដល់​សិទ្ធិ និងសេចក្តីថ្លៃថ្នូររបស់ស្ត្រីខ្មែរ»។ 

 ជាមួយគ្នានេះ ទាក់ទងនឹងបញ្ហាសុខភាព ក្រសួងសុខាភិបាល ​ក៏បានចេញសេចក្ដីប្រកាស ព័ត៌មានស្ដីពីផលប៉ះពាល់សុខភាពដោយសារការប្រើប្រាស់គ្រឿងស្រវឹងផងដែរ។ ​ជាតិ អាល់កុលក្នុងផលិតផលគ្រឿងស្រវឹងប៉ះពាល់ដល់សុខភាពអ្នកប្រើប្រាស់ភ្លាមៗ និង​រយៈ​​ពេលយូរ។ ក្រសួងសុខាភិបាល បញ្ជាក់ដូច្នេះ ដោយបន្ថែមថា ក្នុងរយៈពេលតែ​២ទៅ ៣នាទីតែប៉ុណ្ណោះ ជាតិអាល់កុលអាចជ្រៀបចូលដល់ខួរក្បាល ហើយអាចបង្ករោគសញ្ញា ទៅតាមកំហាប់ជាតិអាល់កុល ការចាប់ផ្តើមនិយាយច្រើន ចលនាអន់ថយ គំហើញថយចុះ ក្អួតចង្អោរ ឬបាត់បង់ស្មារតី ហើយការទទួលគ្រឿងស្រវឹងច្រើនពេក អាចបង្កឱ្យសន្លប់ ប្រឈមនឹងជំងឺឆ្លងដូចជាជំងឺអេដស៍ និងជំងឺផ្សេងៗទៀត។

គ្រឿងស្រវឹងបង្ករផលប៉ះពាល់រយៈពេលវែង ដូចជា ជំងឺក្រិនថ្លើម ខូចថ្លើម, ជំងឺមហារីក​មាត់ បំពង់ក បំពង់អាហារ ថ្លើម ពោះវៀនធំ សុដន់។ល។, ជំងឺមហារីកឈាម, ប្រព័ន្ធភាព​ស៊ាំចុះខ្សោយ ងាយធ្លាក់ខ្លួនឈឺដោយសារការបង្ករោគ, បញ្ហាសុខភាពផ្លូវចិត្ត៖ ជំងឺថប់​បារម្ភ (Anxiety) ជំងឺធ្លាក់ទឹកចិត្ត (Depression) មានជំងឺវង្វេងពេលឈានចូលវ័យ​ចំណាស់ (Dementia)៕