.jpg)
.jpg)
សហគ្រាសចំនួន៩៥ បានប្រយោជន៍ពីការចៀសវាងយកពន្ធត្រួតគ្នារវាងកម្ពុជា ជាមួយ១១ប្រទេស-តំបន់
- ថ្ងៃអាទិត្យ ទី២៧ ខែមេសា ឆ្នាំ២០២៥ ម៉ោង ៧:៥៩ នាទី ព្រឹក
លោក គង់ វិបុល អគ្គនាយកដ្ឋាននៃអគ្គនាយកពន្ធដារ។ រូបថត៖ GDT
ភ្នំពេញ៖ សហគ្រាសក្នុងស្រុកចំនួន៩៥ ទទួលបានអត្ថប្រយោជន៍ ស្តីពីការចៀសវាងការយកពន្ធត្រួតគ្នា (DTA) រវាងកម្ពុជា ជាមួយបណ្តាប្រទេស-តំបន់ចំនួន១១។ ក្នុងនោះ មានរដ្ឋបាលសារពើពន្ធប្រទេសថៃ សិង្ហបុរី ព្រុយណេ ចិន វៀតណាម តំបន់រដ្ឋបាលពិសេសហុងកុង ម៉ាឡេស៊ី ឥណ្ឌូនេស៊ី កូរ៉េខាងត្បូង តំបន់រដ្ឋបាលពិសេសម៉ាកាវ និងតួកគី។ នេះបើយោងតាមព្រឹត្តិបត្រព័ត៌មានរបស់អគ្គនាយកដ្ឋានពន្ធដារ នាថ្ងៃទី២៤ ខែមេសា។
បើតាមព្រឹត្តិបត្រព័ត៌មានរបស់អគ្គនាយកដ្ឋានពន្ធដារ នាថ្ងៃទី២៤ ខែមេសា កិច្ចព្រមព្រៀង ស្តីពីការចៀសវាងការយកពន្ធត្រួតគ្នា (DTA) បានដើរតួនាទីដ៏សំខាន់ ក្នុងការផ្តល់ទំនុកចិត្ត និងភាពប្រាកដប្រជាដល់វិនិយោគិនបរទេស។ អគ្គនាយកដ្ឋានពន្ធដារបានបញ្ជាក់ថា ៖ « កិច្ចព្រមព្រៀងនេះ ត្រូវបានធ្វើឡើងតាមរយៈការផ្តល់វិធានការច្បាស់លាស់ ក្នុងការកំណត់សិទ្ធិយកពន្ធរវាងរដ្ឋភាគី នៃកិច្ចព្រមព្រៀង បន្ធូរបន្ថយលើការអនុវត្ត ចំពោះប្រភេទពន្ធមួយចំនួន និងអត្ថប្រយោជន៍ផ្ទាល់ ដល់សហគ្រាសពីប្រទេស ដែលមានកិច្ចព្រមព្រៀង DTA ជាមួយកម្ពុជា»។
ក្នុងខែមីនា ឆ្នាំ២០២៥ អគ្គនាយកដ្ឋានពន្ធដារ សម្រេចផ្តល់អត្ថប្រយោជន៍ ក្រោមកិច្ចព្រមព្រៀង DTA ដល់សហគ្រាសដែលបានស្នើសុំចំនួន៥៥សហគ្រាស។ សរុបក្នុងរយៈពេល៣ខែ ដើមឆ្នាំ២០២៤ ចំនួនសហគ្រាសដែលទទួលបានអត្ថប្រយោជន៍ក្រោមកិច្ចព្រមព្រៀង DTA គឺមាន៩៥សហគ្រាស។
ដោយឡែក គិតត្រឹមខែមីនា ឆ្នាំ២០២៥ កម្ពុជាកំពុងអនុវត្តកិច្ចព្រមព្រៀងស្តីពី ការចៀសវាងការយកពន្ធត្រួតគ្នា ជាមួយរដ្ឋបាលសារពើពន្ធចំនួន១១។ ក្នុងនោះ មានរដ្ឋបាលសារពើពន្ធ ថៃ សិង្ហបុរី ព្រុយណេ ចិន វៀតណាម តំបន់រដ្ឋបាលពិសេសហុងកុង ម៉ាឡេស៊ី ឥណ្ឌូនេស៊ី កូរ៉េខាងត្បូង តំបន់រដ្ឋបាលពិសេសម៉ាកាវ និងតួកគី។
កិច្ចព្រមព្រៀង ស្តីពីការចៀសវាងការយកពន្ធត្រួតគ្នាចំនួន២ ក៏ត្រូវបានចុះហត្ថលេខារួចរាល់ ដោយកំពុងបន្តរៀបចំនីតិវិធី ក្នុងការដាក់កិច្ចព្រមព្រៀងចូលជាធរមាន។ រួមមាន DTA កម្ពុជា-ឡាវ និង DTA កម្ពុជា-ហ្វីលីពីន។ បន្ថែមពីលើនេះ DTA កម្ពុជា-មីយ៉ាន់ម៉ា ត្រូវបានបញ្ចប់កិច្ចចរចាកម្រិតបច្ចេកទេស និងរដ្ឋបាលសារពើពន្ធចំនួន ៦ ផ្សេងទៀត កំពុងស្ថិតក្នុងដំណាក់កាលនៃការចរចា រួមមាន អេមីរ៉ាតអារ៉ាប់រួម ជប៉ុន ម៉ារ៉ុក បារាំង កាតា និង អាស៊ែបៃហ្សង់៕
© រក្សាសិទ្ធិដោយ thmeythmey.com
Tag:
