.jpg)
.jpg)
ព្រះរាជពិធីច្រត់ព្រះនង្គ័លឆ្នាំនេះ នឹងប្រារព្ធនៅទីព្រះស្រែ ក្នុងកីឡដ្ឋានក្រុងកំពង់ឆ្នាំង
- ថ្ងៃអង្គារ ទី២៩ ខែមេសា ឆ្នាំ២០២៥ ម៉ោង ៧:៥៩ នាទី ព្រឹក
រូបភាពពីរដ្ឋបាលខេត្តកំពង់ឆ្នាំង
ព្រះករុណា ព្រះបាទ សម្ដេច ព្រះបរមនាថនរោត្ដម សីហមុនី ព្រះមហាក្សត្រនៃកម្ពុជា នឹងយាងចូលរួមជាព្រះរាជាធិបតីភាព ក្នុងព្រះរាជពិធីច្រត់ព្រះនង្គ័ល នៅថ្ងៃទី១៥ ខែឧសភា នាទីព្រះស្រែ ក្នុងកីឡដ្ឋានក្រុងកំពង់ឆ្នាំង ខេត្តកំពង់ឆ្នាំង។ នេះបើតាមគណៈកម្មាធិការជាតិរៀបចំបុណ្យជាតិ-អន្តរជាតិ។
ព្រះរាជពិធីច្រត់ព្រះនង្គ័ល ត្រូវបានប្រារព្ធធ្វើឡើងក្នុងខែពិសាខ ជារៀងរាល់ឆ្នាំ ជានិមិត្តរូប នៃការចាប់ផ្ដើមប្រកាសរដូវធ្វើស្រែចម្ការ និងដាំណាំផ្សេងៗរបស់ប្រជាកសិករ និងផ្សងមើលប្រផ្នូលស្រុក ទេស តាមរយៈគោឧសភរាជ។ ព្រះរាជពិធីច្រត់ព្រះនង្គ័លក្នុងឆ្នាំនេះ នឹងប្រារព្ធនៅក្រុងកំពង់ឆ្នាំង ខេត្តកំពង់ឆ្នាំង រយៈពេល៤ថ្ងៃ។
បើតាមគណៈកម្មាធិការជាតិរៀបចំបុណ្យជាតិ-អន្តរជាតិ ថ្ងៃទី១២-១៤ ឧសភា ជាថ្ងៃប្រារព្ធហោមពិធី និងពិធីតាមរោងមណ្ឌលជាកិច្ចរបស់ក្រុមបារគូ។ ដោយឡែកថ្ងៃទី១៥ ឧសភា ជាថ្ងៃប្រារព្ធព្រះរាជពិធីច្រត់ព្រះនង្គ័លជាផ្លូវការ។
ព្រះរាជពិធីច្រត់ព្រះនង្គ័លកាលឆ្នាំ២០២៤ នៅខេត្តកំពង់ស្ពឺ។ រូបភាពពីរដ្ឋសភា។
ក្នុងព្រះរាជពិធីនេះ ព្រាហ្មណ៍ព្រះរាជគ្រូ សូធ្យពាក្យអធិដ្ឋានផ្សងគោឧសភរាជ ដែលទឹមច្រត់ព្រះ នង្គ័ល នោះ ឱ្យស៊ីផឹករបស់៧យ៉ាង ដែលរៀបដាក់តុប្រាក់ធំៗ ដែលរួមមាន គ្រាប់ស្រូវ១តុ គ្រាប់សណ្ដែក១តុ គ្រាប់ពោត១តុ គ្រាប់ល្ង១តុ ស្មៅស្រស់១តុ ទឹក១តុ និងស្រា១តុ។
សូធ្យចប់ព្រាហ្មណ៍ព្រះរាជគ្រូ យកទឹកមន្ដប្រោះក្បាលគោឧសភរាជ ហើយមន្ត្រី ដឹកគោឧសភរាជ ទៅជិតរបស់ទាំង៧យ៉ាងនោះ ឱ្យគោឧសភរាជ ស៊ីផឹកអ្វី ក៏ស៊ីផឹកទៅ ដោយមិនបង្ខំឡើយ។ កាលណា គោឧសភរាជ ស៊ីផឹកអ្វីមួយយ៉ាង ឬពីរយ៉ាង ព្រាហ្មណ៍ ក៏ទាយផលប្រផ្នូលទៅតាមនោះ៕
ព្រះរាជពិធីច្រត់ព្រះនង្គ័លកាលឆ្នាំ២០២៤ នៅខេត្តកំពង់ស្ពឺ។ រូបភាពពីរដ្ឋសភា។
ព្រះរាជពិធីច្រត់ព្រះនង្គ័លកាលឆ្នាំ២០២៤ នៅខេត្តកំពង់ស្ពឺ។ រូបភាពពីរដ្ឋសភា។
© រក្សាសិទ្ធិដោយ thmeythmey.com
Tag:
