.jpg)
.jpg)
នាយករដ្ឋមន្ត្រី ឱ្យអភិបាលខេត្តនីមួយៗ ប្រកួតគ្នាអភិវឌ្ឍន៍ខេត្តរៀងខ្លួន
- ថ្ងៃអង្គារ ទី២៩ ខែមេសា ឆ្នាំ២០២៥ ម៉ោង ២:៥៩ នាទី រសៀល
សម្ដេច ហ៊ុន ម៉ាណែត នាយករដ្ឋមន្ត្រី ចូលរួមសម្ពោធដាក់ឱ្យប្រើប្រាស់ជាផ្លូវការ ផ្លូវជាតិលេខ៣១ ផ្លូវជាតិលេខ៣៣ និងផ្លូវជាតិលេខ៤១ ប្រវែងសរុប ២០១,៣៨៥គីឡូម៉ែត្រ នៅតាកែវ នាថ្ងៃទី២៩មេសា។ រូបពី STPM
ភ្នំពេញ៖ សម្ដេច ហ៊ុន ម៉ាណែត នាយករដ្ឋមន្ត្រី អំពាវនាវឱ្យវិស័យឯកជន និងអ្នកធុរកិច្ច ងាកមើលហើយចាប់យកឱកាសវិនិយោគ នៅតំបន់សក្តានុពលនាប៉ែកនិរតី ដើម្បីរួមគ្នាអភិវឌ្ឍន៍ជាមួយរដ្ឋាភិបាល។ ប្រមុខរាជរដ្ឋាភិបាល ក៏ចង្អុលបង្ហាញឱ្យ អាជ្ញាធរថ្នាក់ក្រោមជាតិ ពិសេសអភិបាលខេត្ត ឱ្យប្រឹងប្រកួតប្រជែងគ្នា ពីការបម្រើសេវាឱ្យកាន់តែប្រសើរ ការបង្កើតគម្រោងទាក់ទាញការវិនិយោគ និងភ្ញៀវទេសចរ។
នៅក្នុងពិធីសម្ពោធដាក់ឱ្យប្រើប្រាស់ជាផ្លូវការ ផ្លូវជាតិលេខ៣១ ផ្លូវជាតិលេខ៣៣ និងផ្លូវជាតិលេខ៤១ ប្រវែងសរុប ២០១,៣៨៥គីឡូម៉ែត្រ នៅខេត្តតាកែវ នាថ្ងៃទី២៩ ខែមេសា នាយករដ្ឋមន្ត្រី អំពាវនាវឱ្យវិស័យឯកជន និងធុរកិច្ច ងាកទៅចាប់អារម្មណ៍ទាញយកសក្តានុពលពីផ្លូវ ដែលទើបកសាងនេះឡើង។
សម្ដេច ហ៊ុន ម៉ាណែត ចាត់ទុកតំបន់និរតី ជាខេត្តមានសក្តានុពល សម្រាប់វិនិយោគ និងបង្កើនកំណើនសេដ្ឋកិច្ច សម្រាប់ក្នុងនិងក្រៅប្រទេស។ ជាមួយគ្នាដែរ នាយករដ្ឋមន្ត្រីអះអាងថា នឹងបន្តជំរុញការវិនិយោគនៅតំបន់នេះ ហើយស្នើឱ្យអាជ្ញាធរខិតខំប្រកួតគ្នា ទាក់ទាញការវិនិយោគផងដែរ។
សម្ដេច ហ៊ុន ម៉ាណែត ចង្អុលបង្ហាញឱ្យមន្ត្រីថ្នាក់ក្រោមជាតិ ពិសេសអភិបាលខេត្តនីមួយៗប្រកួតគ្នាបែបនេះ៖ «ប្រកួតប្រជែងគ្នា! ផ្លូវមកដល់ហើយ យើងទាញផ្លូវនេះ ដើម្បីទាញឆ្នាំងបាយមកចូលផ្ទះយើង។ ប្រកួតគ្នាទៅ សេវាសាធារណៈ បូកជាមួយសក្តានុពលនៃរដ្ឋ។ ត្រូវគិតចេះ! អ្វីដែលយើងឃើញហើយថា តើវាអាចទាញអ្វីឱ្យយើង(ប្រយោជន៍រួម) សុំកុំនិយាយ ថាវាអាចទាញអ្វីឱ្យខ្ញុំ។ ដូរនិយមន័យ កុំឃើញគេមកថាតើខ្ញុំបានអ្វីជាផ្ទាល់ខ្លួន ត្រូវថាតើខេត្តខ្ញុំ ប្រជាជនខ្ញុំ នៅភូមិនេះ បានអ្វីឱ្យច្រើន (ប្រយោជន៍រួមក្នុងភូមិ) ទើបយើងដាក់ទិសដៅ បម្រើសេវាបានល្អ»។
ជាមួយគ្នាដែរ នាយករដ្ឋមន្ត្រី ពន្យល់បន្ថែម ពីកិច្ចខិតខំរបស់អាជ្ញាធរក្នុងខេត្ត ស្រុក ឃុំ ភូមិ មានភាពរីកចម្រើន នឹងនាំឱ្យពលរដ្ឋមានសេដ្ឋកិច្ចប្រសើរ ហើយមន្ត្រីក្នុងខេត្តក៏មានមុខមាត់ដែរ។ សម្ដេច សង្កាត់ធ្ងន់បែបនេះ៖ «ខ្ញុំសុំបញ្ជាក់ ទោះបីជារដ្ឋាភិបាលទាញ គោលនយោបាយវិនិយោគល្អយ៉ាងណាក៏ដោយ ចង់តម្រង់ទិសទៅខេត្ត តាមរយៈការធ្វើផ្លូវ ឬធ្វើអ្វីក៏ដោយ ប៉ុន្តែបើគេទៅដល់សេវាពិបាក គេទៅខេត្តជិតហ្នឹង ដែលសេវាស្រួលហើយ! ជឿចុះ»។
បើការទាកទាញការវិនិយោគនៅតាមខេត្តនីមួយៗ មានសេវាល្អ និងគម្រោងទាក់ទាញកាន់សម្បូរបែប សម្ដេច ធានាថាមន្ត្រីថ្នាក់ជាតិ នឹងកាន់តែស្រួលជជែកជាមួយអ្នកវិនិយោគ៕
© រក្សាសិទ្ធិដោយ thmeythmey.com
Tag:
.gif)