.png)
.png)
.jpg)
.jpg)
សហគ្រាសខ្មែរចំនួន៣ កំពុងកែច្នៃត្រីនាំចេញទៅអូស្រ្តាលី ខណៈ៥ទៀតត្រៀមនាំទៅអឺរ៉ុប
- ថ្ងៃអង្គារ ទី២៩ ខែមេសា ឆ្នាំ២០២៥ ម៉ោង ៦:៥៩ នាទី ល្ងាច
ភ្នំពេញ៖ សហគ្រាសចំនួន ៣របស់កម្ពុជា កំពុងកែច្នៃត្រីនាំចេញទៅអូស្រ្តាលី ខណៈសហគ្រាស ៥ទៀត ត្រៀមខ្លួនឆ្លើយតបនឹងលក្ខខណ្ឌតម្រូវនានា ដើម្បីឈានទៅរកការនាំចេញសម្រាប់ទីផ្សារអឺរ៉ុប។ នេះបើតាមការបញ្ជាក់របស់ លោក ពុំ សុថា ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល ក្នុងបទសម្ភាសជាមួយអ្នកសារព័ត៌មានឌីជីថលថ្មីៗ នាកម្មវិធី«អបអរសាទរទិវាភពផែនដី» នៅថ្ងៃទី២៩ ខែមេសា។
លោក ពុំ សុថា បានលើកឡើងថា បច្ចុប្បន្នកម្ពុជាបានចេញជលផលកែច្នៃចំនួន ២កុងតឺន័រ តាមរយៈសហគ្រាសក្នុងស្រុកចំនួន៣ ទៅកាន់តែទីផ្សារអូស្រ្តាលី។ ថ្វីបើបរិមាណនេះតិច ប៉ុន្តែ លោកសាទរ និង ចាត់ទុកថា វាគ្រាន់តែជំហានដំបូងប៉ុណ្ណោះ ខណៈសហគ្រាសចំនួន៥ទៀត បានត្រៀមខ្លួនរួចរាល់ក្នុងការឆ្លើយតបនឹងលក្ខខណ្ឌតម្រូវរបស់អគ្គនាយកដ្ឋានសុខភាព និងសុវត្ថិភាពអាហារនៃសហភាពអឺរ៉ុប (DG-SANTE) សម្រាប់ការធ្វើសវនកម្ម ដើម្បីនាំចេញទៅសហភាពអឺរ៉ុបនាពេលខាងមុខ។
លោក ថ្លែងបន្ថេមដូច្នេះថា៖«ការនាំចេញទៅអូស្រ្តាលីនេះ គឺយើងទើបតែនាំចេញបាន២កុងតឺន័រទេ។ និយាយទៅនេះទើបតែចាប់ផ្ដើមទេ ដូច្នេះហើយបានយើងធ្វើការជាមួយសហភាពអឺរ៉ុប និងអ្នកជំនាញនានា ដើម្បីធ្វើយ៉ាងឱ្យផលិតផលជលផលរបស់យើងមានគុណភាព និងសុវត្ថិភាពម្ហូបអាហារជាមុនសិន ទើបអាចនាំចេញទៅអឺរ៉ុប»។
គ្រប់សហគ្រាសដែលនាំចេញជលផលកែច្នៃទៅអូស្រ្តាលី និងអឺរ៉ុប ត្រូវឆ្លងកាត់ការបណ្ដុះបណ្ដាលពីគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) ដែលសហការអនុវត្តដោយរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ និងអង្គការ UNIDO មានគោលដៅគាំទ្រសមត្ថភាពបច្ចេកទេស លើកកម្ពស់ការប្រកួតប្រជែង និងអនុវត្តនូវប្រព័ន្ធស្តង់ដាម្ហូបអាហារគុណភាព(CQS)។
បច្ចុប្បន្ន មានសហគ្រាសចំនួន ១៩ហើយ ឱ្យទទួលបាន CQS។ ទន្ទឹមនេះ សហគ្រាស ១០បន្ថែមទៀត ក៏បានត្រៀមរួចរាល់ ដើម្បីទទួលបានCOS ផងដែរ។ ក្នុងដំណើរនាំចេញជលផលកែច្នៃទៅទីផ្សារអន្តរជាតិនេះ រដ្ឋបាលជលផល ក្រោមការគាំទ្ររបស់គម្រោង អភិវឌ្ឍន៍ជលផលក្រោយប្រមូលផល (CAPFISH-Capture) បានផ្ដល់ទុនវិនិយោគគាំទ្រសម្រាប់កែលម្អប្រព័ន្ធផលិតកម្ម ពង្រីកទីផ្សា និងអនុវត្តគោលការណ៍ សុវត្ថិភាពអាហារ ដល់សហគ្រាសកែច្នៃផលជលផល១៩ ដែលគិតជាទឹកប្រាក់មានចំនួន១,៤លានដុល្លារ៕
អត្ថបទទាក់ទង
© រក្សាសិទ្ធិដោយ thmeythmey.com
Tag:
