.png)
.png)
.jpg)
.jpg)
លោក អ៊ុក វណ្ណដេ សង្ឃឹមថាការអាននៅសាធារណៈនៅតែមានរូបរាង ទោះទេសចរណ៍អំណានបញ្ចប់
- ថ្ងៃព្រហស្បតិ៍ ទី១ ខែឧសភា ឆ្នាំ២០២៥ ម៉ោង ៤:៥៩ នាទី រសៀល
លោក អ៊ុក វណ្ណដេ និយាយពីកម្មវីធីទេសចរណ៍អំណាន នៅថ្ងៃទី៣០មេសា ឆ្នាំ២០២៥ នៅក្រុងសៀមរាប។ រូបភាពពីហ្វេសប៊ុកលោក អ៊ុក វណ្ណដេ៕
សៀមរាប៖ បន្ទាប់ពីត្រាចចរអស់ជាច្រើនខេត្ត«ទេសចរណ៍អំណាន» មកដល់ខេត្តសៀមរាប។ បន្ទាប់ពីដើរបាន៩ខេត្តរួចមក លោក វណ្ណដេ ថាបើទោះបីទេសចរណ៍អំណានបញ្ចប់សកម្មភាព លោកសង្ឃឹមថាការអានជាសាធារណៈនៅបន្តមានជារូបភាព។ លោកក៏ជំរុញឱ្យខេត្តនីមួយៗ គួររៀបចំការអាននៅសាធារណៈរៀងរាល់ចុងសប្ដាហ៍ផងដែរ។
ដើម្បីជ្រាបច្បាស់សូមលោកអ្នកនាងទស្សនាវីដេអូសម្ភាសដូចតទៅ៖
ចេញពីកំពូលភ្នំគិរីរម្យ ខេត្តកំពង់ស្ពឺ កាលពីដើមឆ្នាំ២០២៥ បច្ចុប្បន្នកូនឡានទឹកក្រូច «ទេសចរណ៍អំណាន» ក៏បានមកដល់ខេត្តសៀមរាប។ ទេសចរណ៍អំណាន បង្កើតឡើងដោយលោក អ៊ុក វណ្ណដេ ដើម្បីជំរុញការអាននៅទីសាធារណៈ តាមរយៈបណ្ណាល័យចល័ត និងមានបេសកកម្ម ធ្វើដំណើរទៅគ្រប់បណ្ដា២៥រាជធានី-ខេត្តទូទៅប្រទេស។
សប្ដាហ៍មុនកូនឡានទឹកក្រូច ដែលផ្ទុកដោយសៀវភៅប្រមាណ ២ ០០០ក្បាលនេះ បានមកដល់ខេត្តសៀមរាប។ សៀវភៅរាប់រយចំណងជើង ត្រូវបានតម្រៀបពេញតុលើសួនច្បារខ្លះ ក្នុងក្រុងសៀមរាប រាប់ចាប់ពីសៀវភៅរឿងនិទាន, សៀវភៅលើកទឹកចិត្ត និងរឿងប្រលោមលោកជាដើម។
ពលរដ្ឋក្នុងក្រុងសៀមរាប នាំគ្នាមកអានសៀវភៅ នៅសួនជិតទីសក្ការៈព្រះអង្គចេក ព្រះអង្គចម នៅថ្ងៃចុងសប្ដាហ៍។
សៀមរាបជាខេត្តទី១០ហើយ ដែលលោក វណ្ណដេ បានមកដល់។ មកដល់ខេត្តសៀមរាប លោកកត់សម្គាល់ឃើញថា ពលរដ្ឋនៅទីនេះជាអ្នកអានសៀវភៅនៅ ជាពលរដ្ឋមានសុជីវធម៌ក្នុងរស់នៅ ប្រជាជនចិត្តល្អ និងមានសណ្ដាប់ធ្នាប់។
បេសកកម្មរបស់ លោក វណ្ណដេ គឺបំផុសបំផុលឱ្យមានការអាននៅសាធារណៈ។ លោកលើកឡើងថា បច្ចុប្បន្នពលរដ្ឋស្ទើរបាត់បង់ទម្លាប់អាន ជាពិសេសការអាននៅទីសាធារណៈស្ទើរតែលែងមានទៅហើយ។លោក សង្កត់ធ្ងនដូច្នេះ៖«ស្រុកខ្មែរយើង មានសៀវភៅតែគ្មានអ្នកអាន មានបណ្ណាល័យតែគ្មានអ្នកចូល មកពីពលរដ្ឋយើងខ្វះទម្លាប់អាន ហើយខ្ញុំកំពុងកសាងទម្លាប់»។
ផ្ទុយនឹងការសប្បាយចិត្តដែលឃើញរូបភាពពលរដ្ឋច្រើននាំគ្នាមកអានសៀវភៅ លោកក៏មានក្ដីបារម្ភដែរ។ លោកលើកឡើងពីកង្វល់ខ្លួនដូច្នេះ៖«ខ្ញុំរំពឹងថាវាអាចមានថ្ងៃនេះឡើង ប៉ុន្តែខ្ញុំក៏មានក្ដីបារម្ភដែរ គឺបារម្ភថាពេលខ្ញុំទៅបាត់រូបភាពបែបនេះនឹងស្លាប់ចោលខ្ញុំ»។
ជាមួយនឹងក្ដីបារម្ភនេះ លោកក៏សង្ឃឹមថាបណ្ដារាជធានី-ខេត្តទូទាំងប្រទេស ចាប់ផ្ដើមធ្វើសកម្មភាពលើកកម្ពស់ការអាននៅសាធារណៈ ដោយខេត្តរៀងៗខ្លួន បើទោះជាគ្មានវត្តមានទេសចរណ៍អំណាន ហើយលោកនៅបន្តជួយផ្នែកបច្ចេកទេស ឬផ្សព្វផ្សាយ ប្រសិនបើខេត្តទាំងនោះត្រូវការ។
គួររំឭកបន្តិចថា ទេសចរណ៍អំណាន នឹងបន្តដាក់សៀវភៅឱ្យសាធារណជនក្នុងខេត្តសៀមរាបអាន រហូតដល់ថ្ងៃទី៧ ខែឧសភា ឆ្នាំ២០២៥ មុនបន្តដំណើរទៅកាន់ខេត្តបាត់ដំបង។ បណ្ណាល័យចល័យបើកឱ្យសាធារណជនចូលអានដោយសេរី ចាប់ពីម៉ោង៣រសៀលរហូតដល់ម៉ោង១០យប់ ជារៀងរាល់ថ្ងៃ។ បណ្ណាល័យចល័យនេះ នឹងបញ្ចប់បេសកកម្មរបស់ខ្លួន នៅដើមឆ្នាំ២០២៦៕
© រក្សាសិទ្ធិដោយ thmeythmey.com
Tag:
.gif)