.png)
.png)
.jpg)
.jpg)
មន្ទីរពេទ្យគន្ធបុប្ផា៖ ក្នុងខែមេសា កុមារជាង ៧ម៉ឺននាក់ បានពិគ្រោះជំងឺ ខណៈកុមារជាង ១ម៉ឺននាក់ឈឺធ្ងន់
- ថ្ងៃសៅរ៍ ទី៣ ខែឧសភា ឆ្នាំ២០២៥ ម៉ោង ៩:៥១ នាទី ព្រឹក
ភ្នំពេញ៖ កុមារចំនួន ៧៧ ១១៥នាក់ បានទៅពិនិត្យព្យាបាលជំងឺនៅផ្នែកពិគ្រោះជំងឺក្រៅ ខណៈមានកុមារឈឺធ្ងន់ចំនួន ១៥ ២០៣នាក់ ត្រូវបានដាក់ឱ្យសម្រាកព្យាបាលនៅក្នុងមន្ទីរពេទ្យគុន្ធបុប្ផា នៅក្នុងខែមេសា ឆ្នាំ២០២៥។ នេះបើយោងតាមរបាយការណ៍ពីមន្ទីរពេទ្យគន្ធបុប្ផា។
ក្នុងខែមេសា ឆ្នាំ២០២៥នេះ កុមារ និងស្រ្តីមានផ្ទៃពោះ ជាង១០ម៉ឺននាក់ បានទៅពិនិត្យ និងព្យាបាលជំងឺនៅមន្ទីរពេទ្យគន្ធបុប្ផារាជធានីភ្នំពេញ និងខេត្តសៀមរាប។ តួលេខរបស់មន្ទីរពេទ្យគន្ធបុប្ផា បង្ហាញថាកុមារមានជំងឺគ្រុនឈាម ២៦៩នាក់ បានព្យាបាលនៅក្នុងមន្ទីរពេទ្យ, កុមារ ២ ៥១២នាក់ ត្រូវបានទទួលការវះកាត់, វះកាត់បេះដូង និងភ្ជិតប្រហោងបេះដូងតាមសរសៃឈាម នៅគន្ធបុប្ផាភ្នំពេញ និងសៀមរាបមាន ៨០នាក់។
ចំណែកនៅផ្នែកសម្ភពនៃមន្ទីរពេទ្យជ័យវរ្ម័នទី៧(គន្ធបុប្ផាទី៣) ស្ត្រីមានផ្ទៃពោះ ៧ ៧៩០នាក់ បានទៅពិនិត្យតាមដានផ្ទៃពោះ និងព្យាបាល នៅក្នុងផ្នែកពិគ្រោះជំងឺក្រៅនៃមន្ទីរសម្ភព និងសម្រាប់អ្នកសម្រាលកូនមាន ១ ៦៦៦នាក់។
សូមជម្រាបថា មន្ទីរពេទ្យគន្ធបុប្ផា បានចូលរួមយ៉ាងសកម្មក្នុងការផ្តល់សេវាសុខាភិបាលដល់កុមារ និងស្រ្តីមានផ្ទៃពោះមកពីគ្រប់មជ្ឈដ្ឋានទាំងអស់ ដោយមិនគិតថ្លៃ។ មន្ទីរពេទ្យនេះ ពិតជាដើរតួនាទីយ៉ាងសំខាន់ក្នុងការចូលរួមបម្រើដល់គោលនយោបាយ លើកកម្ពស់សុខុមាលភាពសង្គម និងរួមចំណែកក្នុងការកាត់បន្ថយអត្រាមរណភាពមាតា និងទារកដោយមានប្រសិទ្ធភាពខ្ពស់៕
© រក្សាសិទ្ធិដោយ thmeythmey.com
.gif)