.png)
.png)
.jpg)
.jpg)
រដ្ឋបាលរាជធានីភ្នំពេញ សង់បន្ទប់ទឹក ៤០បន្ថែមសម្រួលអ្នកដើរកម្សាន្តតាមផ្លូវថ្មើរជើង
- ថ្ងៃសៅរ៍ ទី៣ ខែឧសភា ឆ្នាំ២០២៥ ម៉ោង ២:៤០ នាទី រសៀល
ភ្នំពេញ៖ រដ្ឋបាលរាជធានីភ្នំពេញ ចាប់ផ្តើមសាងសង់បន្ទប់ទឹកសាធារណៈចំនួន ៤០បន្ថែមទៀត នៅមាត់ទន្លេជាប់ស្ថានីយបូមទឹកព្រះគន្លង់តាមបណ្ដោយតីរវិថីព្រះសុវត្ថិ។ ការសាងសង់នេះដើម្បីសម្រួល ពលរដ្ឋដែលមកដើរលេងកម្សាន្ត និងហាត់ប្រាណតាមមាត់មាត់ទន្លេ ជាពិសេសផ្លូវថ្មើរជើង នាចុងសប្តាហ៍។
លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ បញ្ជា់ក់ថា បន្ទប់ទឹកសាធារណៈចំនួន៤០នេះ ចាយរយៈពេល ៣ខែដោយចាប់ផ្តើមសាងសង់នៅដើមខែឧសភា ដល់ខែកក្កដា ឆ្នាំ២០២៥។ លោកស្រីបន្ថែមថា រដ្ឋបាលរាជធានីភ្នំពេញគ្រោងសាងសង់បន្ទប់ទឹក និងបន្ទប់ទឹកចល័តបន្ថែមទៀត នៅតាមទីតាំងផ្សេងដើម្បីសម្រួលភ្ញៀវជាតិ និងអន្តរជាតិដើរលេងកម្សាន្តតាមបណ្តោយមាត់ទន្លេ។
សូមរំលឹកថា រដ្ឋបាលរាជធានីភ្នំពេញ បានដំណើរការសាកល្បងផ្លូវថ្មើរជើង កាលពីថ្ងៃទី១ ខែកុម្ភៈ។ ផ្លូវនេះ រៀបចំឡើងនៅលើផ្ទៃដី ៥៧ហិកតា ស្ថិតក្នុងភូមិសាស្ត្រ ខណ្ឌដូនពេញ តាមបណ្ដោយវិថីព្រះស៊ីសុវិត្ថ ចាប់ពីមុខប្រៃសណីយ៍កម្ពុជា ពីផ្លូវលេខ៩៤ ដល់ផ្លូវលេខ២៤០។
តាមគម្រោង ផ្លូវថ្មើរជើងនេះ ត្រូវបែងចែកជា ៣តំបន់ផ្សេងគ្នា ដោយមានទាំងហាងទំនិញ ភោជនីយដ្ឋាន សណ្ឋាគារ បារ និងរៀបចំជា pub street ដើម្បីបម្រើដល់ការកម្សាន្ត និងដើរទិញទំនិញនៅពេលយប់ របស់ភ្ញៀវទេសចរជាតិ និងអន្តរជាតិ។ តំបន់ទាំង ៣នេះ នឹងបិទមិនឱ្យឡាន និងម៉ូតូ ចូលធ្វើចរាចណ៍នោះទេ ចាប់ពីម៉ោង៦ល្ងាច ដល់ម៉ោង១១យប់ ដើម្បីឱ្យការថ្មើរជើងកម្សាន្តរបស់ពលរដ្ឋ ងាយស្រួល៕
© រក្សាសិទ្ធិដោយ thmeythmey.com
Tag:
.gif)