.png)
.png)
.jpg)
.jpg)
អ្នកស្រី ទុយ ហេង សប្បាយពេលឃើញពលរដ្ឋយល់ពីការទុកដាក់សំរាមបានល្អ
- ថ្ងៃចន្ទ ទី៥ ខែឧសភា ឆ្នាំ២០២៥ ម៉ោង ៨:០០ នាទី ព្រឹក
អ្នកស្រី ទុយ ហេង ពេលកំពុងសម្អាតនៅក្នុងកសិន្ធុអង្គរវត្ត
សៀមរាប៖ អ្នកស្រី ទុយ ហេង ជាកម្មករសម្អាតបរិស្ថានក្នុងទឹកកសិន្ធុប្រាសាទអង្គរ។ ទោះបីអ្នកខ្លះមើលមិនឃើញពីតម្លៃការងារនេះក៏ដោយ ប៉ុន្តែជាអ្នករស់នៅតំបន់អង្គរមួយរូប អ្នកស្រីពិតជាមានមោទកភាពណាស់ ដែលបានចូលរួមសម្អាតតំបន់ប្រាសាទឱ្យបានស្អាត ពិសេសសម្អាតទឹកឱ្យបានថ្លាខួបប្រាំងវស្សា។
ឆ្នាំនេះអ្នកស្រី ទុយ ហេង ធ្វើការជាកម្មករសម្អាតបរិស្ថាននៅតំបន់អង្គររយៈពេល៩ឆ្នាំហើយ។ ចូលធ្វើការនៅក្នុងឆ្នាំ២០១៦ អ្នកភូមិថ្នល់បណ្ដោយ ឃុំព្រះដាក់ ស្រុកបន្ទាយស្រីរូបនេះ មានមោទកភាពចំពោះការងារតូចតាចមួយនេះ។ អ្នកស្រីមានស្នាមញញឹមនៅពេលទឹកកសិន្ធុប្រាសាទអង្គរវត្ត ថ្លាស្អាត និងមានមនុស្សម្នាមកអង្គុយលេងច្រើន។
រៀងរាល់ថ្ងៃក្រុមការងារអ្នកស្រី ហេង ដែលមានគ្នា៤នាក់ មានទូក២គ្រឿងចង់ផ្អោបគ្នា អុំទូកចុះឡើងៗ តាមមាត់ច្រាំងកសិន្ធុខាងត្បូងប្រាសាទអង្គរវត្ត។ អ្នកដំណើរដែលជិះកាត់តាមនោះ តែងប្រទះឃើញក្រុមស្រ្តីទាំងនេះ កាត់ ដួសស្មៅ ស្លែ ឬរុក្ខជាតិទឹក ជាប់ជានិច្ច។ អ្នកស្រី ហេង ប្រាប់សារព័ត៌មានថ្មីៗនៅថ្ងៃទី២ ឧសភា ថា នៅជ្រុងខាងត្បូងកសិន្ធុនេះ មានក្រុមសម្អាត៤ក្រុម ដែលចែកជាកំណាត់ ឬប្រវែងគ្នាដើម្បីសម្អាត ដោយធ្វើយ៉ាងណា មិនឱ្យមានសំរាមដុះបាំងសោភ័ណភាពទឹកឡើយ។ ក្នុងរដូវនេះ ស្មៅ ឬស្លែ មិនសូវមានច្រើនប៉ុន្មានទេ ដោយសារកត្តាអាកាសធាតុផង និងក្រុមការងារចល័តសម្អាតច្រើនផង។ នេះជាការកត់សម្គាល់របស់ អ្នកស្រី ហេង ដែលប្រាប់អ្នកសារព័ត៌មាន។
ក្រុមការងារសម្អាតនៅកសិន្ធុជ្រុងខាងត្បូងអង្គរវត្ត
ចំពោះបញ្ហាសំរាមនៅតំបន់ប្រាសាទវិញ កម្មករក្រុមហ៊ុនសម្អាតបរិស្ថាន HCC ដដែលកត់សម្គាត់ឃើញថា ឥរិយាបថរបស់ប្រជាពលរដ្ឋ រួមនិងភ្ញៀវទេសចរនៅពេលមកលេងតំបន់ប្រាសាទ ក៏ដូចជាប្រាសាទអង្គរវត្ត មានការផ្លាស់ប្ដូរច្រើន។ ពួកគេយល់ពីការវេចខ្ចប់សំរាមដាក់ក្នុងធុងបានត្រឹមត្រូវ ដែលការណ៍នេះខុសពីប៉ុន្មានឆ្នាំមុន។ ទង្វើទាំងនេះ បានជួយដល់កម្មករសម្អាតមួយផ្នែកផងដែរ។ អ្នកស្រី ទុយ ហេង និយាយដោយទឹកមុខរីករាយដូច្នេះថា៖« ការចោលសំរាមកាត់បន្ថយច្រើនពេលបុណ្យទាន មិនដូចមុនទេ ពួកគាត់ហូបហើយ មានវេចខ្ចប់ដាក់ធុងត្រឹមត្រូវ កាត់បន្ថយបានជាង៥០ភាគរយដែរ។ សប្បាយពេលទេសចរយល់ដឹង វាកាត់បន្ថយ និងដូចជួយអ្នកសម្អាតដែរ»។
ស្ថិតក្នុងវ័យ៤៦ឆ្នាំ អ្នកស្រី ហេង រីករាយជាខ្លាំងនៅពេលការងាររបស់អ្នកស្រី រួមចំណែកជួយឱ្យទឹកថ្លា និងទាក់ទាញអ្នកមកអង្គុយលេងតាមច្រាំងកសិន្ធុច្រើន ពិសេសនៅពេលរសៀល។ យ៉ាងណា កម្មករសម្អាតអនាម័យរូបនេះ នៅតែទទូចឱ្យអ្នកដែលចូលចិត្តយកអាហារមកហូប និងអ្នកយកត្រីមកព្រលែង ជួយយកថង់ ឬសំរាមទាំងនោះដាក់ក្នុងធុងឱ្យបានត្រឹមត្រូវ ជៀសវាងការប៉ើង ឬហើរចូលក្នុងទឹក ដែលប៉ះពាល់ទាំងសោភ័ណភាព និងគុណភាពទឹកក្នុងកសិន្ធុ។
ទោះបីមិនមានជីវភាពធូរធារដូចគេឯងពិតមែន ប៉ុន្តែការងារជាអ្នកសម្អាត បានរួមចំណែកមួយផ្នែកធំ ជួយទ្រទ្រង់ជីវភាពប្រចាំថ្ងៃរបស់គ្រួសារអ្នកស្រី ហេង ដែលមានប្តីអ្នកធ្វើសំណង់ និងឡើងត្នោត។ អ្នកស្រីបានពោលដូច្នេះថា៖« ការងារនេះសមរម្យ អាចដោះស្រាយបានប្រចាំថ្ងៃ មិនចង់ផ្លាស់ប្ដូរទៅណាទេ កម្លាំងយើងអាចធ្វើបាន មិនធ្ងន់ និងមិនស្រាលពេកទេ»៕
© រក្សាសិទ្ធិដោយ thmeythmey.com
Tag:
.gif)