.jpg)
.jpg)
ក្មេង៣នាក់ស្លាប់ ក្នុងហេតុការណ៍អគ្គិភ័យមួយកន្លែងនៅខេត្តព្រះសីហនុ
- ថ្ងៃព្រហស្បតិ៍ ទី៨ ខែឧសភា ឆ្នាំ២០២៥ ម៉ោង ៩:៥៣ នាទី ព្រឹក
ភ្នំពេញ៖ មនុស្ស៣នាក់ ពីអាយុ១៣-១៨ឆ្នាំ បានស្លាប់ក្នុងហេតុការណ៍គ្រោះអគ្គិភ័យមួយកន្លែង ស្ថិតក្នុងភូមិព្រែកប្រស់ ឃុំទឹកថ្លា ស្រុកព្រៃនប់ ខេត្តព្រះសីហនុ នាយប់អធ្រាត្រថ្ងៃទី៧ ខែឧសភា។ ហេតុការណ៍នេះ បានកើតឡើងដោយសារការឆេះរថយន្តដឹកប្រេង១គ្រឿង រួចបន្តឆេះរាលដាលដល់ផ្ទះប្រជាពលរដ្ឋចំនួន២ខ្នង។
នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ បានបញ្ជាក់ថា ម្ចាស់ផ្ទះរងគ្រោះទី១ ឈ្មោះ អ៊ុត ភាព ភេទស្រី អាយុ៤៩ឆ្នាំ មុខរបរកម្មកររោងចក្រ ផ្ទះសង់អំពីឈើដំបូលប្រក់សង្ក័សីមានទំហំទទឹង៤ម៉ែត្រ×បណ្ដោយ៦ម៉ែត្រ។
ម្ចាស់ផ្ទះរងគ្រោះមួយទៀតមាន ឈ្មោះ មន ភក្ដី អាយុ ៤០ឆ្នាំ ត្រូវជាប្ដី និងប្រពន្ធឈ្មោះ បាត ស្រីមុំ អាយុ៣៥ឆ្នាំ មុខរបរលក់ដូរ។ អ្វីដែលគួរឱ្យសោកសង្រេងនោះ គឺម្ចាស់ផ្ទះរងគ្រោះទី២បានបាត់បង់ជីវិតកូនចំនួន៣នាក់ ដែលមានអាយុចន្លោះពី១៣ឆ្នាំ-១៨ឆ្នាំ ខណៈភរិយាវ័យ៣៥ឆ្នាំ រងរបួសស្រាល។ ផ្ទះជនរងគ្រោះនេះ គឺត្រូវបានធ្វើឡើងដោយដំបូលប្រក់សង្ក័សី មានទំហំទទឹង៧ម៉ែត្រ×បណ្ដោយ១៥ម៉ែត្រ ក៏បានឆេះអស់ទាំងស្រុងនៅក្នុងគ្រោះអគ្គិភ័យនោះដែរ។
បើតាមប្រភពដដែល មូលហេតុនៃសោកនាដកម្មនេះ គឺមកពីកូនប្រុសវ័យ១៧ឆ្នាំរបស់ម្ចាស់រងគ្រោះ ឈ្មោះ ភក្តី គារ៉ា បានបង្ហូរសាំងដាក់ប៊ីដុងពីរថយន្តដឹកប្រេង ដែលអ្នកបើកបររថយន្តរបស់ក្រុមហ៊ុន CLEAN ENERGlES បានបង្ហូរសាំងលក់ឱ្យទៅម្ចាស់ផ្ទះខាងលើ រួចរូបគេបានបង្ហូរសាំងបាន២ប៊ីដុង ក៏លើកយកមកទុកក្នុងផ្ទះ។ បន្ទាប់មក រូបគេក៏បានបង្ហូរសាំងបន្ថែមទៀត ទើបតែបានកន្លះប៊ីដុង ស្របពេលដែលម្ដាយរបស់ខ្លួនកំពុងអាំងងាវហូបនៅពីមុខផ្ទះ ភ្លាមៗនោះស្រាប់តែឆាបឆេះជាអគ្គិភ័យកើតឡើងតែម្ដង។
ក្នុងហេតុការណ៍ខាងលើនេះ ក្រៅតែធ្វើឱ្យក្មេងបាត់បង់ជីវិត៣នាក់ហើយនោះ ក៏បានបំផ្លាញនូវទ្រព្យសម្បត្តិច្រើនដែរ ក្នុងនោះមានរថយន្តដឹកប្រេង១គ្រឿង ផ្ទះ២ខ្នង ម៉ូតូ៥គ្រឿង និងទ្រព្យសម្បត្តិមួយចំនួនទៀត ដែលគិតជាប្រាក់ប្រមាណ៥ម៉ឺនដុល្លារ៕
© រក្សាសិទ្ធិដោយ thmeythmey.com
Tag:
.gif)