ភ្នំពេញ៖ ក្រសួងអប់រំ យុវជន និងកីឡា ធ្វើយុទ្ធនាការសុវត្ថិភាពចំណីអាហារក្នុងសាលារៀន ក្រោមប្រធានបទ «សុខភាពកុមារ និងជាតិដែក» ដើម្បីកាត់បន្ថយភាពស្លេកស្លាំងដោយសារកង្វះជាតិដែកលើកុមារ និងផ្សព្វផ្សាយការអនុវត្តសុវត្ថិភាពចំណីអាហារតាមសាលារៀននៅកម្ពុជា។ យុទ្ធនាការនេះ ត្រូវបានធ្វើឡើងក្រោមវត្តមានលោកហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ នាថ្ងៃទី៧ ខែឧសភា។

យុទ្ធនាការសុវត្ថិភាពចំណីអាហារក្នុងសាលារៀនក្រោមប្រធានបទ «សុខភាពកុមារ និងជាតិដែក» គឺជាគំនិតផ្តួចផ្តើមរួមគ្នា ដោយក្រសួងអប់រំ និងក្រុមហ៊ុន Danone ប្រចាំតំបន់អាស៊ីអាគ្នេយ៍ ដើម្បីរួមគ្នាកាត់បន្ថយភាពស្លេកស្លាំងដោយសារកង្វះជាតិដែកលើកុមារ។ បើសេចក្តីប្រកាសព័ត៌មានរបស់ក្រសួងអប់រំក្រុមហ៊ុនគាំទ្រ និងបន្តកិច្ចសហការជាមួយក្រសួងអប់រំ ក្នុងការចូលរួមកាត់បន្ថយភាពស្លេកស្លាំង ដោយសារកង្វះជាតិដែក ដើម្បីធានាបានថា កុមារទទួលបានអ្វីដែលល្អបំផុត តាមរយៈការបង្កើនចំណេះដឹង ការត្រួតពិនិត្យភាពស្លេកស្លាំង និងការផ្តល់អាហារូបត្ថម្ភមានជាតិដែក និងវីតាមីនស៊ី។ ទាំងនេះជាដំណោះស្រាយសុខភាព ដែលអាចជួយឱ្យកុមារលូតលាស់បានយ៉ាងពេញលេញ។

លោករដ្ឋមន្រី្តអប់រំ វាយតម្លៃខ្ពស់ចំពោះក្រុមហ៊ុនបានយកចិត្តទុកដាក់លើកកម្ពស់សុខុមាលភាព និងសុខភាពប្រជាជនកម្ពុជា ក៏ដូចជាសិស្សានុសិស្ស តាមរយៈយុទ្ធនាការសុវត្ថិភាពចំណីអាហារតាមសាលារៀន។ លោក ហង់ជួន ណារ៉ុន ជឿជាក់ថា ការណ៍នេះ នឹងផ្តល់ការអប់រំទៅដល់គណៈគ្រប់គ្រងសាលារៀន លោកគ្រូ អ្នកគ្រូ មាតាបិតា សិស្សនុសិស្ស និងសាធារណជនឱ្យកាន់តែយល់ដឹងអំពីការបង្កើតទម្លាប់បរិភោគអាហារប្រចាំថ្ងៃ ៣ក្រុម។ នោះគឺ អាហារថាមពល អាហារសាងសង់ និងអាហារការពារ (តិចខ្លាញ់ តិចអំបិល តិចស្ករ)។

លោក Danish Rahman នាយកគ្រប់គ្រងទូទៅក្រុមហ៊ុន Danone ប្រចាំតំបន់អាស៊ីអាគ្នេយ៍។

ជាមួយគ្នានេះ សាធារណជនកាន់តែយល់ដឹងអំពី អាហារូបត្ថម្ភមានជាតិដែក និងវីតាមីនស៊ី រួមទាំងការចៀសវាងនូវភេសជ្ជៈផ្អែម។

« យុទ្ធនាការសុវត្ថិភាពចំណីអាហារតាមសាលារៀន នឹងក្លាយជាវេទិកាមួយយ៉ាងសំខាន់ នៃការលើកកម្ពស់ការយល់ដឹងរបស់សិស្សលើផ្នែកសុវត្ថិភាពចំណីអាហារ សម្រាប់ការវិនិយោគរយៈពេលវែងលើការអភិវឌ្ឍធនធានមនុស្ស»។ នេះជាការលើកឡើងរបស់លោក ហង់ជួន ណារ៉ុន ដោយមើលឃើញយុទ្ធនាការនេះ នឹងដើរតួនាទីយ៉ាងសំខាន់ក្នុងការលើកកម្ពស់សុខភាពកុមារ និងជាតិដែក ការប្រយុទ្ធប្រឆាំងនឹងបញ្ហាកង្វះអាហារូបត្ថម្ភ ភាពស្លេកស្លាំង និងការជំរុញភាពលូតលាស់ ក្នុងគោលដៅកសាងមូលធនមនុស្សជំនាន់ក្រោយប្រកបដោយសុខភាព ការអប់រំ និងភាពធន់ដែលនឹងរួមចំណែកដល់ការអភិវឌ្ឍ​សេដ្ឋកិច្ច​និង​សង្គមប្រកបដោយគុណភាព និងចីរភាព។​

លោក​ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា

គួរជម្រាបថា ក្នុងយុទ្ធសាស្ត្របញ្ចកោណដំណាក់កាលទី១ និងវិធានការគន្លឹះរបស់ប្រមុខរដ្ឋាភិបាលសម្តេច ហ៊ុន ម៉ាណែត ​លើវិធានការទី៣ «ការថែរក្សាសុខភាពសិស្ស តាមរយៈកម្មវិធីអាហារូបត្ថម្ភរបស់កុមារ និងការត្រួតពិនិត្យគុណភាពអាហារនៅតាមសាលារៀន» ក្រសួងបានដាក់ចេញនូវគោលនយោបាយជាច្រើន ដើម្បីធានាបានសុវត្ថិភាពចំណីអាហារ និងអាហារូបត្ថម្ភ ព្រមទាំងគាំទ្រការអភិវឌ្ឍសេដ្ឋកិច្ចសហគមន៍មូលដ្ឋាន សំដៅឆ្លើយតបទៅនឹងបញ្ហាកង្វះអាហារូបត្ថម្ភ អសន្តិសុខស្បៀងក្នុងគ្រួសារនិងសហគមន៍ ការជំរុញភាពលូតលាស់ និងដើម្បីលើក​កម្ពស់​ការសិក្សា​របស់​កុមារ។ ក្នុងនោះ មាននូវគោលនយោបាយស្តីពី «សុខភាពសិក្សា« «អាហារូបត្ថម្ភ»និង «ការផ្តល់អាហារតាមសាលារៀន ឆ្នាំ២០២៤-២០៣៥« ដោយប្រើប្រាស់កសិផលក្នុងសហគមន៍ ​ស្របតាម «ក្របខ័ណ្ឌគោលនយោបាយជាតិគាំពារសង្គមឆ្នាំ២០២៥»៕