ភ្នំពេញ៖ រយៈពេលជិត៦ឆ្នាំហើយ ដែលលោកគ្រូ អ្នកគ្រូ នៅអនុវិទ្យាល័យសង្គមថ្មី ដឹកនាំ​សិស្សានុសិស្សដាំបន្លែជាច្រើនប្រភេទ និងចិញ្ចឹមត្រីក្នុងទីធ្លាសាលា។ គោលបំណងដែ​ល​សាលា​ឱ្យសិស្សធ្វើកសិកម្មនេះ ដើម្បីឱ្យសិស្សានុសិស្ស អាចស្វែងយល់ពី​សកម្មភាព​នៃ​ការរស់នៅប្រចាំថ្ងៃ ចេះដាំដំណាំ និងចូលរួមថែរក្សាបរិស្ថាន ហើយជាមូលដ្ឋានគ្រឹះដល់​សិស្សក្នុងការយកជំនាញកសិកម្ម ទៅដាំនៅតាមសាលារៀន ផ្ទះ ឬកសិដ្ឋាន​ណាមួយ​នៅថ្ងៃអនាគត។

ស្ថិតក្នុងភូមិតាសែងកណ្ដាល ឃុំរណសិរ្ស ស្រុកសង្គមថ្មី ខេត្តព្រះវិហារ អនុវិទ្យាល័យ​សង្គមថ្មី តម្រូវឱ្យសិស្សចាប់ពីថ្នាក់ទី៧ ដល់ទី៩ ត្រូវអនុវត្តនៅរាល់ម៉ោងកសិកម្ម និង​បំណិនជីវិត។ លោក លី ថុន នាយកសាលាអនុវិទ្យាល័យសង្គមថ្មី លើកឡើងថា ការ​អប់រំបំណិននេះ គឺអនុវត្តនៅពេលសិស្សទំនេរពីការសិក្សាតែប៉ុណ្ណោះ។

បន្លែដែលអនុវិទ្យាល័យសង្គមថ្មីដាំនោះ មានដូចជា ស្ពៃ ត្រកួន ត្រប់ តាសក់ និង​​ស្លឹក​គ្រៃ ដែល​ការដាំ​ដោយគឺ​ប្រើប្រាស់​ជីធម្មជាតិ និង​មានការ​ថែទាំ​យ៉ាង​ដិតដល់ ​ពី​លោកគ្រូ អ្នកគ្រូ និង​សិស្ស​ថា្នក់​ទី​៧​ដល់​ថ្នាក់​ទី​៩ ស្រោច​ទឹក និង​បោចស្មៅ​ជាប្រចាំ​ថ្ងៃ​។ បន្ថែមពីនេះ សា​លា ក៏មានសកម្មភាពមួយចំនួនផ្សេងទៀតដូចជា ការចិញ្ចឹមត្រី ការធ្វើជីកំប៉ុស្តសម្រាប់​ស្រោចដំណាំ និងប្រមូលសំរាមក្នុងបរិវេណសាលាជាដើម។ 

លោក លី ថុន នាយកសាលាអនុវិទ្យាល័យសង្គមថ្មី​ បញ្ជាក់ថា៖ « យើង​បណ្តុះ​គំនិត​ឱ្យ​សិស្ស សម្រាប់​ទៅ​ថ្ងៃក្រោយ​ទៀត​។ យើងនឹងបន្តសកម្មភាពបែបនេះរហូត ដើម្បីឱ្យពួក​គាត់​ចេះដាំ ចេះថែទាំបន្លែ និងស្គាល់ពីប្រភេទបន្លែ ជាពិសេសនៅតំបន់សាលា​​អនុវិទ្យា​ល័យ​សង្គមថ្មី គឺនៅឆ្ងាយពីផ្សារ។ បន្លែទាំងនេះ ជាប្រភេទបន្លែដែលផ្តល់ផលលឿន ងាយ​ស្រួលដាំ និងថែទាំ។ ការដាំប​ន្លែ និងចិញ្ចឹមត្រីរួមគ្នានេះ បង្ហាញពី​សាមគ្គី​ភាព ទំនាក់ទំនង​រវាងគ្រូ និងសិស្ស ដោយ​ផ្ដល់ប្រយោជន៍មួយផ្នែកដល់សាលារបស់យើងផងដែរ។»។ 

រូបភាពពី៖ អនុវិទ្យាល័យសង្គមថ្មី

បន្ថែមពីនេះ ការថែទាំបន្លែ និងចិញ្ចឹមត្រី មានលោកគ្រូផ្នែកកសិកម្ម និងសិស្សនុ​សិស្ស​នាំគ្នាស្រោចទឹករាល់ថ្ងៃផងដែរ។ សម្រាប់គ្រាប់ពូជដំណាំ និងសម្ភារៈប្រើប្រាស់ផ្សេងៗ គឺ​ត្រូវចំណាយថវិការបស់សាលា។ ទន្ទឹមនឹងនោះ សិស្សានុសិស្ស អាចបេះបន្លែ និងចាប់ត្រី​ដែលដាំនៅក្នុងសាលាទៅបរិភោគបាន។ 

«បន្លែទាំងអស់នោះ គឺយើងយកលក់ឱ្យសហគមន៍។ ថវិកាដែលទទួលបានពីការលក់​បន្លែនោះ ​សាលាយកទិញគ្រាប់ពូជដាំ។ សល់លុយខ្លះសម្រាប់សិស្សានុសិស្ស និងយក​ទៅដាក់ក្នុងកញ្ចប់អភិវឌ្ឍន៍សាលា ទាំងហេដ្ឋារចនាសម្ព័ន្ធ និងបរិស្ថាន។»។ នេះជាការ​អះអាងបន្ថែម របស់លោកនាយកសាលាអនុវិទ្យាល័យសង្គមថ្មី។

លោក លី ថុន បន្តថា ការដឹកនាំសិស្សដាំបន្លែ​នេះ បានជំរុញ និងលើកទឹកចិត្តដល់សិស្ស​ស្រឡាញ់បរិស្ថាន និងចូលរួមក្នុងសកម្មភាពដាំដំណាំ កាន់តែប្រសើរ​ថែមទៀត។ នាយក​សាលារូបនេះ សង្កេតឃើញថា សិស្សានុសិស្សបានចូលរួមយ៉ាងសកម្ម ក្នុងការ​ថែទាំដំណាំ​យ៉ាង​ដិតដល់ ហើយសិស្សយល់ដឹងច្រើនទាក់ទងទៅនឹងការដាំបន្លែ និងចិញ្ចឹមត្រី ​ក្នុង​ទីធ្លា​សាលា។ 

រូបភាពពី៖ អនុវិទ្យាល័យសង្គមថ្មី

លើសពីនេះ សួនដាំបន្លែ​ក្នុង​សាលា​នេះ ក៏បាន​ក្លាយជា​កន្លែង​អប់រំ និង​កន្លែង​កម្សាន្ត​សម្រាប់​សិស្ស​ក្នុងពេល​កំពុង​សិក្សា ហើយ​សួន​នេះ ក៏បាន​ដើរតួ​យ៉ាងសំខាន់​ក្នុងការ​ផ្លាស់​ប្តូរ​ទម្លាប់ និង​ទំនាក់ទំនង​រវាង​គ្រូ ​និង​សិស្ស​ដែរ​។​ លោក លី ថុន សង្ឃឹមថា ផ្នត់គំនិតដឹកនាំ​សិស្សានុសិស្សដាំបន្លែ និងចិញ្ចឹមត្រីនេះ នឹងកើតមាននៅគ្រប់សាលា ដើម្បីចូលរួមអប់រំ សិស្សឱ្យចេះកសិកម្ម យល់​ពី​បច្ចេកទេស​ដាំ​បន្លែ ដោយ​មិន​ប្រើ​គីមី​ និងរួមចំណែកការពារ​បរិស្ថានផងដែរ។ 

ក្រៅពីនេះ លោក លី ថុន នាយកសាលាអនុវិទ្យាល័យសង្គមថ្មី ស្ថិតក្នុងភូមិតាសែង កណ្ដាល ឃុំរណសិរ្ស ស្រុកសង្គមថ្មី ខេត្តព្រះវិហារ យល់ថាសកម្មភាពទាំងនេះ ពិត​ជាមាន​សារៈ​ប្រយោជន៍​ច្រើន​ក្នុង​វិស័យ​អប់រំ និង​មាន​ឥទ្ធិពល​ដល់​ការរស់នៅ​ប្រចាំថ្ងៃ​របស់​សិស្ស ទាំង​ផ្នែក​បរិស្ថាន និង​សុខភាព​ទៀតផង​៕