.png)
.png)
.jpg)
.jpg)
លោកម៉ាក្រុងនៅតែរឹងទទឹងទទួលមេដឹកនាំថ្មីរបស់ស៊ីរី ទោះរងការរិះគន់ពីអ្នកនយោបាយបារាំង
- ថ្ងៃសុក្រ ទី៩ ខែឧសភា ឆ្នាំ២០២៥ ម៉ោង ៩:២៩ នាទី ព្រឹក
French President Emmanuel Macron, left, shakes hands with Syria's interim President Ahmad al-Sharaa before their talks Wednesday, May 7, 2025 at the Elysee Palace in Paris. (AP Photo/Michel Euler) AP - Michel Euler
ប្រមុខដឹកនាំថ្មីរបស់ស៊ីរី លោក Ahmed al Charaa បានបំពេញទស្សនកិច្ចនៅប្រទេសបារាំងកាលពីថ្ងៃពុធទី ៧ឧសភា។ នៅក្នុងដំណើរទស្សនកិច្ចជាលើកទី១ នៅទឹកដីអឺរ៉ុប ប្រធានាធិបតីស្តីទី ដែលបានចូលកាន់អំណាចដឹកនាំស៊ីរីនៅក្រោយផ្តួលរំលំរបបផ្តាច់ការរបស់លោកបាស្ហា អាល់អាសាដបានទាមទារឲ្យអឺរ៉ុបដកទណ្ឌកម្មដែលបានបំបាក់សេដ្ឋកិច្ចស៊ីរីឲ្យសឹងដល់ចំណុចសូន្យ។ នៅក្នុងសន្និសីទកាសែតនៅវិមានអេលីហ្សេ លោកប្រធានាធិបតីបារាំងម៉ាក្រុងបាននិយាយការពារជំហររបស់បារាំងក្នុងការទទួលមេដឹកនាំស៊ីរី ដែលធ្លាប់ជាគ្នីគ្នារបស់ក្រុមអាល់កៃដា ក្រុមជីហាត ប៉ុន្តែ លោកបានទាមទារឲ្យប្រធានាធិបតីស្តីទីរបស់ស៊ីរីត្រូវតែការពារប្រជាជនស៊ីរីដោយមិនរើសអើងសាសនា ក្រុមជាតិពន្ធុអ្វីទាំងអស់។
នៅវិមានប្រធានាធិបតីបារាំង លោកលោកអេម៉ានុយអែល ម៉ាក្រុងបានទទួលយ៉ាងរាក់ទាក់ មេដឹកនាំថ្មីរបស់ស៊ីរី លោក Ahmed al Charaa ដែលទើបទទួលជ័យជំនះផ្តួលរំលំអំណាចរបស់ប្រធានាធិបតីស៊ីរីលោកបាស្ហា អាល់អាសាដកាលពីខែធ្នូ ឆ្នាំមុន។ ដោយទទួលស្វាគមលោក Ahmed al Charaa ដែលប្តូរឯកសណ្ឋានពីទាហានជីហាត មកជាជនស៊ីវិលដឹកនាំស៊ីរី លោកប្រធានាធិបតីម៉ាក្រុងបានរងការរិះគន់ពីអ្នកនយោបាយស្តាំនិយមក្នុងប្រទេសថា កំពុងផ្តល់កិត្តិយសដល់ក្រុមជីហាត ទទួលភេរវជនដែលធ្លាប់ប៉ងធ្វើភេរវកម្មនៅទឹកដីបារាំង។
ប៉ុន្តែ លោកម៉ាក្រុងបាននិយាយការពារការអញ្ជើញរបស់លោក ព្រោះថា ប្រធានាធិបតីស្តីទីរបស់ស៊ីរី លោក Ahmed al Charaa ជាអ្នកដែលបានជួយបិទបញ្ចប់សង្រ្គាមស៊ីវិលដែលមានរយៈពេល១៤ឆ្នាំ ដោយផ្តួលរំលំអំណាចផ្តាច់ការរបស់លោកបាស្ហា អាល់អាសាដ ដែលសហគមន៍អន្តរជាតិថ្កោលទោស។
ម្យ៉ាង បើតាមប្រធានាធិបតីបារាំង លោក Ahmed al Charaa ជាមនុស្សដែលយល់ដឹងពីស្ថានការណ៍ និងបានសន្យាកសាងប្រទេសស៊ីរីឡើងវិញ។
យ៉ាងណាក៏ដោយ ថ្លែងនៅក្នុងសន្និសីទកាសែតរួមកាលពីថ្ងៃពុធ លោកម៉ាក្រុងបានទាមទារឲ្យរបបដឹកនាំថ្មីនៅស៊ីរីត្រូវតែការពារប្រជាជនស៊ីរីទាំងអស់ ដោយមិនប្រកាន់រើសអើងជាតិសាសន៍ ជាតិពន្ធុអ្វីឡើយ។
ប្រធានាធិបតីបារាំងចង់និយាយដល់ការប៉ះទង្គិចអាវុធដ៏ហិង្សាកាលពីខែមីនាកន្លង រវាងកងកម្លាំងរក្សាសន្តិសុខស៊ីរីរបស់រដ្ឋអំណាចថ្មី និងក្រុមប្រដាប់អាវុធជាតិពន្ធុនៅស៊ីរី ដែលសម្លាប់មនុស្សជាង១៧០០នាក់។ ចំពោះប្រធានាធិបតីបារាំង អំពើហិង្សា ការសម្លាប់រង្គាលសាជាថ្មីនៅស៊ីរី បានធ្វើឲ្យសហគមន៍អន្តរជាតិ ជាពិសេសបណ្តាប្រទេសលោកខាងលិចដែលបោះដៃទៅរករបបថ្មី រន្ធត់ចិត្តខ្លាំង។
លោកម៉ាក្រុងបានទាមទារឲ្យមេដឹកនាំស៊ីរីថ្មីត្រូវតែដាក់ទោសលើជនដៃដល់ ខណៈបារាំងកំពុងទាមទារឲ្យគេបញ្ចូលឈ្មោះអ្នកទទួលខុសត្រូវលើការសម្លាប់រង្គាលលើជនពន្ធុនៅស៊ីរីទៅក្នុងបញ្ជីដាក់ទណ្ឌកម្មរបស់សហភាពអឺរ៉ុប។
ជាការឆ្លើយតបនឹងការទាមទាររបស់ប្រធានាធិបតីបារាំង មេដឹកនាំថ្មីរបស់ស៊ីរី បាននិយាយថា រដ្ឋាភិបាលថ្មីរបស់លោកបានប្តេជ្ញាដាក់ទោស រាល់អ្នកដែលរំលោភច្បាប់ស៊ីរីដោយមិនលើកលែងឡើយ។ ប៉ុន្តែ ការដាក់ទោសត្រូវធ្វើឡើងនៅក្រោយការស៊ើបអង្កេតគ្រប់ជ្រុងជ្រោយ។
នៅក្រោយការដួលរលំរបបផ្តាច់ការស៊ីរី កាលពីចុងឆ្នាំមុន ការប្រយុទ្ធគ្នាសងសឹកគ្នារវាងក្រុមប្រដាប់អាវុធរបស់រដ្ឋអំណាចថ្មីនៅស៊ីរី និងក្រុមយោធាគាំទ្ររបបដឹកនាំស៊ីរីចាស់របស់លោកបាស្ហា អាល់អាសាដ បានបន្តសម្លាប់ជីវិត ទាហាន ប្រជាជនស៊ីវិលជាច្រើនពាន់នាក់ ក្នុងនោះក៏មានក្រុមជាតិពន្ធុ Druzeដែលអ៊ីស្រាអែលសន្យាចេញមុខជួយការពារក្នុងទឹកដីស៊ីរី។ ការណ៍នេះបានធ្វើឲ្យសហគមន៍អន្តរជាតិបារម្ភ និងសង្ស័យពីសមត្ថភាព ឥទ្ធិពលរបស់មេដឹកនាំស៊ីរីថ្មីទៅលើក្រុមប្រដាប់អាវុធដែលបែងចែកគ្នាជាច្រើនក្រុមនៅស៊ីរី។
ដូចដំណើរទស្សនកិច្ចនៅបណ្តាប្រទេសអារ៉ាប់ នៅប្រទេសបារាំង លោក Ahmed al Charaaមានបំណងស្វែងរកជំនួយហិរញ្ញវត្ថុ កសាងប្រទេសស៊ីរីឡើងវិញ តាមរយៈការអំពាវនាវឲ្យអឺរ៉ុបដកចោលទណ្ឌកម្មសេដ្ឋកិច្ចដែលអឺរ៉ុបបានដាក់លើរបបចាស់។ ប្រធានាធិបតីបារាំង លោកម៉ាក្រុងយល់ស្រប និងចង់ឲ្យអឺរ៉ុបលុបចោលទណ្ឌកម្មលើស៊ីរី ចាប់ពីខែមិថុនាខាងមុខ។ មេដឹកនាំបារាំងក៏ចង់ឲ្យសហរដ្ឋអាមេរិកធ្វើដូចអឺរ៉ុបដែរ ប៉ុន្តែ ត្រូវរក្សាវត្តមានទ័ពនៅស៊ីរី ដើម្បីជួយធានាស្ថិរភាពនៅទឹកដីស៊ីរីបន្តទៀត។
ដោយជំនះរាល់ការរិះគន់ ដើម្បីទទួលមេដឹកនាំស៊ីរីថ្មី ដែលធ្លាប់ជាប្រធានក្រុមជីហាតដែលជាសាខាមួយរបស់ក្រុមភេរវនិយមអាល់កៃដានៅស៊ីរី បារាំងដែលធ្លាប់ជាអតីតប្រទេសធ្វើអាណានិគមនៅទឹកដីស៊ីរី ចង់ចូលទៅជិតស្និទ្ធនឹងមេដឹកនាំស៊ីរីថ្មីដើម្បីបានប្រយោជន៍សេដ្ឋកិច្ច និងឥទ្ធិពលនយោបាយ ខណៈពេលដែលរុស្ស៊ីបានចុះសាបឥទ្ធិពលនៅស៊ីរី នៅក្រោយការដួលរលំ របបស៊ីរីចាស់របស់លោកបាស្ហាអាល់អាសាដ ជាសម្ព័ន្ធមិត្តរបស់រុស្ស៊ី៕
ដោយ៖ ឈាង បុប្ផា (RFI ខេមរភាសា)
© រក្សាសិទ្ធិដោយ thmeythmey.com
.gif)