.jpg)
.jpg)
កម្ពុជា ទទួលបានភ្ញៀវទេសចរអន្តរជាតិ ១,៨លាននាក់ ក្នុងត្រីមាសទី ១
- ថ្ងៃសុក្រ ទី៩ ខែឧសភា ឆ្នាំ២០២៥ ម៉ោង ៦:៥៩ នាទី ល្ងាច
ភ្នំពេញ៖ កម្ពុជាទទួលភ្ញៀវទេសចរអន្តរជាតិចំនួន ១,៨៣៨,២០៨នាក់ នៅក្នុងត្រីមាសទី១ ឆ្នាំ២០២៥ ។ ចំនួននេះ កើនឡើង១៦,១ភាគរយ ធៀបនឹងរយៈពេលដូចគ្នាកាលឆ្នាំ២០២៤។
របាយការណ៍របស់ក្រសួងទេសចរណ៍ ដែលចេញផ្សាយជាសាធារណៈនាថ្ងៃទី៩ ខែឧសភា បានបង្ហាញថា ក្នុងចំណោមភ្ញៀវទេសចរអន្តរជាតិទាំង១,៨៣៨,២០៨នាក់នេះ គឺមាន១,៣៨៣,៥៧៨ នាក់ មកធ្វើដំណើរកម្សាន្តវិស្សមកាល និងមាន៤១៩,៨២៣នាក់មកធ្វើដំណើរធុរកិច្ច ខណៈ៣៤,៨០៧ នាក់ទៀតមកកម្ពុជា ក្នុងគោលបំណងផ្សេងៗ។
បើតាមក្រសួងទេសចរណ៍ ភ្ញៀវទេសចរអន្តរជាតិដែលមកលេងកម្សាន្តច្រើនជាងគេក្នុងត្រីមាសទី១នេះ គឺជនជាតិថៃ មានទៅដល់៥០១,៦៦៦នាក់។ បន្ទាប់មក ជនជាតិវៀតណាមមាន៣០៤,៦៣៤នាក់ , ជនជាតិចិនមាន២៨៦,១៥៦នាក់ និងជនជាតិអាម៉េរិកមាន ៧៣,៧៨៣នាក់។
លំដាប់បន្ទាប់ គឺទេសចរជនជាតិឡាវ ដែលមាន៦៤,៤០៧នាក់, ជនជាតិកូរ៉េខាងត្បូងមាន ៦៣,០៥៥នាក់, ជនជាតិបារាំងមាន៥២,២៧៤នាក់, ជនជាតិអង់គ្លេសមាន៥០,៣៨៦នាក់, ជនជាតិឥណ្ឌូនេស៊ី ៤០,៦៤៣នាក់ និងភ្ញៀវទេសចរជាជនជាតិជប៉ុនមាន ៣៤,៦៣៥នាក់។
បើតាមក្រសួងទេសចរណ៍ ភ្ញៀវទេសចរមកកម្ពុជា តាមផ្លូវអាកាសចំនួន ៧៨៩,៣៨៤នាក់ ក្នុងត្រីមាសទី១។ ក្នុងនោះ មកតាមអាកាសយានដ្ឋានអន្តរជាតិភ្នំពេញ មាន៥៤៤,៧៦៤នាក់, តាមរយៈអាកាសយានដ្ឋានអន្តរជាតិសៀមរាបអង្គរ ២៣១,៧០១នាក់ និងតាមអាកាសយានដ្ឋានអាកាសយានដ្ឋានអន្តរជាតិព្រះសីហនុ ១២,៩១៩នាក់។
ដោយឡែក ភ្ញៀវទេសចរដែលធ្វើដំណើរតាមផ្លូវទឹក និងផ្លូវគោក គឺមាន ១,០៤៨,៨២៤ នាក់។
រដ្ឋាភិបាល តាមរយៈក្រសួងទេសចរណ៍ បន្តជំរុញ និងផ្តល់គោលការណ៍លើកទឹកចិត្តនានា ដល់វិស័យឯកជន ដើម្បីទាក់ទាញភ្ញៀវទេសចរអន្តរជាតិ។ ការបញ្ចុះតម្លៃវីសា (e-Visa)របស់កម្ពុជា បានចាប់ផ្តើមអនុវត្តតាំងពីថ្ងៃទី១ ខែមករា ឆ្នាំ២០២៥មកទល់បច្ចុប្បន្ន។ ក្នុងនោះ វីសាប្រភេទ (T) ត្រូវបានបញ្ចុះ ពី ៣៦ ដុល្លារមកនៅត្រឹម៣០ដុល្លារ, វីសាប្រភេទ (E) visa បញ្ចុះតម្លៃ ពី ៤២ ដុល្លារ មកនៅ ៣៥ដុល្លារ។
នាថ្មីៗនេះ ក្រសួងទេសចរណ៍បានដាក់ចេញគោលការណ៍ផ្លាស់ប្តូររដូវខ្សត់ភ្ញៀវឬរដូវ Low Season ទៅជា «រដូវកាលបៃតង» ដើម្បីបង្កើតទេសភាពស្រស់ស្អាត និងធ្លាក់ភ្លៀងត្រជាក់ត្រជុំ តាមតំបន់ទេសចរណ៍នានា។ តាមគោលការណ៍នេះ ក្រសួងបានស្នើវិស័យឯកជនទាំងអស់ បញ្ចុះតម្លៃកន្លែងស្នាក់នៅតាមសណ្ឋាគារ និងម្ហូបអាហារ ជាពិសេសការពង្រឹងបដិសណ្ឋារកិច្ចឱ្យល្អ និងកក់ក្តៅ។
គួរជម្រាបថា ពេញមួយឆ្នាំ២០២៤ កម្ពុជាទទួលបានភ្ញៀវទេសចរអន្តរជាតិសរុប៦,៧លាននាក់ កើនឡើង ២៣ភាគរយ ធៀបនឹងឆ្នាំ២០២៣។ សម្រាប់ឆ្នាំ២០២៥ កម្ពុជារំពឹងចំនួនភ្ញៀវទេសចរអន្តរ ពី៧,២លាននាក់ ទៅ៧,៥លាននាក់៕
© រក្សាសិទ្ធិដោយ thmeythmey.com
Tag:
