រាជរដ្ឋាភិបាលកម្ពុជា ប្តេជ្ញាចិត្តក្នុងការពង្រឹងនីតិវិធីបង្ការ និងទប់ស្កាត់ការក្លែងបន្លំ​ដើម​កំណើត​ទំនិញ និងជំរុញការអនុវត្តច្បាប់ស្តីពីវិធានដើមកំណើតទំនិញប្រកបដោយ​តម្លា ភាពសម្រាប់ការនាំចេញទំនិញមួយចំនួន ទៅកាន់ទីផ្សារអាម៉េរិក។ លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា​(CDC) បញ្ជាក់ដូច្នេះ នាជំនួបជាមួយ លោកស្រី Reva Price ប្រធានគណៈកម្មការត្រួតពិនិត្យសេដ្ឋកិច្ច និង​សន្តិ​សុខ​អាម៉េរិក-ចិន (The U.S.-China Economic and Security Review Commission – USCC) កាលពីថ្ងៃ​ទី៨ ខែឧសភា។

ការបញ្ជាក់បែបនេះ គឺឆ្លើយនឹងបញ្ហាដែលប្រតិភូ USCC បានកត់សម្គាល់ថា ប្រតិបត្តិការ​ផ្ទេរមធ្យោបាយដឹកជញ្ជូន (Transshipment) ជាហេតុផលមួយ ដែល​នាំឱ្យដើមកំណើត​ទំនិញមួយចំនួន មានការកែប្រែ មុននឹង​នាំចេញទៅកាន់ទីផ្សារអាម៉េរិក។

ទំព័រហ្វេសប៊ុករបស់ CDC បានស្រង់សម្តីរបស់លោក ស៊ុន ចាន់ថុល ចុះផ្សាយបន្ថែមដូច្នេះ ថា ក្នុងន័យស្ថាបនាបញ្ហានេះ រាជរដ្ឋាភិបាលកម្ពុជា បានដាក់ចេញនូវប្រកាសអន្តរក្រសួង រវាងក្រសួងសេដ្ឋកិច្ច និងហិរញ្ញវត្ថុ ជាមួយក្រសួងពាណិជ្ជកម្ម ស្តីពី វិធានការសម្រាប់បង្ការ​និងទប់ស្កាត់ការក្លែងបន្លំដើមកំណើតទំនិញ សម្រាប់ការនាំចេញទំនិញមួយចំនួនទៅកាន់​ទី ផ្សារ​អាម៉េរិក និងប្រកាសក្រសួងពាណិជ្ជកម្ម ស្តីពីនីតិវិធីក្នុងការស្នើសុំ និងការចេញលិខិត​ អនុញ្ញាតបញ្ជាក់ដើមកំណើតទំនិញ សម្រាប់ការនាំចេញទំនិញមួយចំនួន ទៅកាន់​ទីផ្សារ​​អាម៉េរិក។

ទន្ទឹងនឹងការប្តេជ្ញានេះ លោកឧបនាយករដ្ឋមន្ត្រី ក៏បញ្ជាក់ដែរថា កម្ពុជា បាននិងកំពុងអ​នុ​វត្តយ៉ាងយកចិត្តទុកដាក់ ​កិច្ចសម្របសម្រួលទំនាក់ទំនងពាណិជ្ជកម្ម និងវិនិយោគទ្វេ​ភាគី កម្ពុជា- អាម៉េរិក ដែលរួមមានជំនួបពិភាក្សាតាមប្រព័ន្ធវីដេអូពីចម្ងាយ (Zoom) ជាមួយ​ភាគី​តំ​ណាងពាណិជ្ជកម្មអាម៉េរិក (United States Trade Representative – USTR) ចំនួ​ន​២​លើក និងកិច្ចការពាក់ព័ន្ធផ្សេងៗទៀត។ បើតាម CDC លោក ស៊ុន ចាន់ថុល ក៏បានរំឭក​ប្រាប់​​ប្រតិភូ USCC អំពីសាវតា បេសកកម្ម និងចក្ខុវិស័យរបស់CDC ព្រមទាំងសក្តានុពល​វិនិយោគនៅកម្ពុជា ក៏ដូចជាបេសកកម្មគោះទ្វារទាក់ទាញវិនិយោគរបស់ CDC ទៅកាន់​​បណ្តាប្រទេសនានាជុំវិញពិភពលោកផងដែរ។

លោកស្រី Reva Price ប្រធានគណៈកម្មការត្រួតពិនិត្យសេដ្ឋកិច្ច និងសន្តិសុខអាម៉េរិក-ចិន (USCC)។ រូបភាព៖ ហ្វេសប៊ុក CDC

ក្នុងជំនួបនោះ លោកស្រី Reva Price ប្រធានគណៈកម្មការ USCC បានបញ្ជាក់ថា USCC ដែលជាទីភ្នាក់ងារឯករាជ្យ មួយនៃសាខានីតិបញ្ញត្តិរបស់​អាម៉េរិក ទទួលបន្ទុក​លើការត្រួត​ពិនិត្យ ស៊ើបអង្កេត និងរាយការណ៍​ទៅសភា​អាម៉េរិក​អំពីកិច្ចការនានា​ពាក់ព័ន្ធនឹងសន្តិសុខ​នៃទំនាក់ទំនងពាណិជ្ជកម្ម និងសេដ្ឋកិច្ចទ្វេភាគី រវាង​អាម៉េរិក និង​ចិន។

 រូបភាព៖ ហ្វេសប៊ុក CDC

សូមបញ្ជាក់ថា ចាប់ពីថ្ងៃទី១២ ខែឧសភា ឆ្នាំ២០២៥តទៅកម្ពុជា នឹងចាប់អនុវត្តវិធានការ​សម្រាប់បង្ការ និងទប់ស្កាត់ការក្លែងបន្លំដើមកំណើតទំនិញ សម្រាប់ការនាំចេញទំនិញមួយ​ចំនួន ទៅកាន់ទីផ្សារសហរដ្ឋអាម៉េរិក។ ការអនុវត្តនូវវិធានការនេះឡើង​ គោលបំណងរួមគ្នា​បង្ការ និងទប់ស្កាត់ការក្លែងបន្លំដើមកំណើតទំនិញ សំដៅលើការជំរុញការអនុវត្តច្បាប់ស្តី​ពី​វិធានដើមកំណើតទំនិញ ប្រកបដោយតម្លាភាពសម្រាប់ការនាំចេញទំនិញមួយចំនួនទៅ​កាន់​​ទីផ្សារ​អាម៉េរិក៕