.png)
.png)
.jpg)
.jpg)
កម្មវិធីទូរសព្ទ «ទស្សនាអង្គរ» ជួយទេសចរឱ្យដឹងព័ត៌មាន និងមានជម្រើសទស្សនាច្រើនកន្លែង
- ថ្ងៃសុក្រ ទី៩ ខែឧសភា ឆ្នាំ២០២៥ ម៉ោង ៩:៥៩ នាទី យប់
កម្មវិធីទូរសព្ទ «ទស្សនា អង្គរ» ប្រកាសដាក់ឱ្យដំណើរការសាកល្បងជាផ្លូវការ
សៀមរាប៖ អាជ្ញាធរជាតិអប្សរា បានដាក់ឱ្យដំណើរការប្រើប្រាស់សាកល្បង នូវកម្មវិធីទូរសព្ទ ឬ App ដែលមានឈ្មោះថា «ទស្សនា អង្គរ» ឬ Visit Angkor។ កម្មវិធីនេះប្រមូលផ្តុំនូវព័ត៌មានពីប្រាសាទ វង់ទស្សនាតាមប្រាសាទ ចំណត តូបលក់ដូរ អាហារដ្ឋាន បន្ទប់ទឹក និងគោលដៅទេសចរណ៍ជាច្រើនទៀតនៅក្នុងខេត្តសៀមរាប ដែលអាចឱ្យទេសចរសម្រេចចិត្ត និងមានជម្រើសទស្សនា។
លោក សេង សុធារ៉ា ប្រធាននាយកដ្ឋានអភិវឌ្ឍន៍ទេសចរណ៍ និងវប្បធម៌ នៃអាជ្ញាធរជាតិអប្សរា បានឱ្យដឹងថា កម្មវិធីទស្សនាអង្គរ ត្រូវបានរៀបចំឡើងក្នុងបំណងលើកស្ទួយវិស័យទេសចរណ៍ ឱ្យដើរស្របតាមសម័យបច្ចេកវិទ្យា និងបង្កើតជម្រើសងាយស្រួលដល់ភ្ញៀវទេសចរ។ លោកបន្ថែមថា កម្មវិធីនេះមានព័ត៌មានពីប្រវត្តិប្រាសាទជាង១០០នៅ ខ្សែទស្សនា និងចំណុចទស្សនាប្រាសាទ ផែនទី ម៉ោងទស្សនាប្រាសាទ និងសម្បទាទេសចរណ៍។ ក្រៅពីនេះ ក៏មានព័ត៌មានក្រៅពីប្រាសាទផងដែរ ដូចជាព័ត៌មានអំពីប្រតិទិនព្រឹត្តិការណ៍ សារមន្ទីរ សហគមន៍ទេសចរណ៍ សកម្មភាពកម្សាន្ត ក្រមប្រតិបត្តិ និងបទបញ្ញត្តិនៃការទស្សនា។ ជាងនេះទៅទៀត សាធារណជនអាចឃើញពាក្យ សម្បទាទេសចរណ៍ ដែលអនុញ្ញាតឱ្យមានការបញ្ចេញមតិនានា ទាំងចំណុចល្អ និងចំណុចខ្វះខាតនៅតំបន់អង្គរ។ ក្នុងពិធីប្រកាសដាក់ឱ្យដំណើរការសាកល្បងកម្មវិធីទស្សនាអង្គរ នៅថ្ងៃទី៩ ឧសភា នៅស្នាក់ការអាជ្ញាធរជាតិអប្សរា លោក សុធារ៉ា សង្កត់ធ្ងន់ថា អាជ្ញាធរនឹងយកមតិទាំងនោះមកពិនិត្យ និងកែលម្អរាល់ចំណុចខ្វះខាតផ្សេងៗ។
លោក សេង សុធារ៉ា ក្នុងពិធីផ្សព្វផ្សាយ និងដាក់ឱ្យដំណើរការសាកល្បង App Visit Angkor
តាមការបញ្ជាក់ថាពីលោក សេង សុធារ៉ា App visit Angkor ត្រូវបានរៀបចំ និងគិតគូរច្រើនឆ្នាំមកហើយ ចាប់តាំងពីអំឡុងកូវីដ១៩។ លោកពន្យល់ថា រាល់ព័ត៌មានទាំងអស់មានភាពត្រឹមត្រូវ និងច្បាស់លាស់ ហើយប្រវត្តិសាស្រ្តប្រាសាទ សុទ្ធសឹងត្រូវបានឆ្លងកាត់ការត្រួតពិនិត្យពីអ្នកជំនាញ។ យ៉ាងណា លោក សុធារ៉ា អះអាងថា កម្មវិធីនេះនឹងធ្វើបច្ចុប្បន្នភាពរហូត ដើម្បីឱ្យស្របតាមតថភាពជាក់ស្ដែង។ មន្រ្តីអាជ្ញាធរជាតិអប្សរារូបនេះក៏រំពឹងថា វានឹងត្រូវបានប្រើប្រាស់យ៉ាងទូលំទូលាយ ហើយអាជ្ញាធរនឹងព្យាយាមកែលម្អ រាល់ចំណុចខ្វះខាតណាមួយ។
លោក សេង សុធារ៉ា បន្ថែមថា៖« យើងសង្ឃឹមថា កម្មវិធីនេះនឹងជួយតំបន់អង្គរក្លាយជាតំបន់ឆ្លាតវៃជាងមុន យើងមានកម្មវិធីផ្តល់ព័ត៌មាន ដែលមានភាពរហ័សជាងមុន និងមានប្រតិទិនព្រឹត្តិការណ៍កម្មវិធីនានា ដើម្បីឱ្យទេសចរដឹងមុន និងរៀបចំគម្រោងមកកម្សាន្ត ដូចជាកម្មវិធីរត់ម៉ារ៉ាតុន សមរាត្រី ជាដើម»៕
© រក្សាសិទ្ធិដោយ thmeythmey.com
Tag:
.gif)